又到聖誕，又到聖誕～日本一直係香港人聖誕節好鍾意去嘅國家，之前幾年因為封關無得去，今年終於可以再去日本過聖誕啦！唔知大家買咗機票未呢？小編幫大家整合咗2022年日本各地嘅聖誕活動，燈飾、市集，應有盡有！即刻一齊睇下有咩玩，計劃定行程啦！咁耐無去過日本，去之前記住睇埋2022日本自由行懶人包，同埋羽田機場交通攻略、成田機場交通攻略、關西機場 -大阪市區京都交通攻略！
【神奈川縣相模湖森林遊樂園——相模湖Illumillion角落生物燈飾】
之前講咗一路玩過山車一路睇嘅燈飾，今日同大家介紹搭住纜車睇嘅燈飾，重要係同角落生物合作！
相模湖森林遊樂園位於東京近郊神奈川縣嘅相模原市，距離東京市區大概一個鐘車程，入面除咗有機動遊戲、遊樂設施之外，仲可以BBQ同埋露營，係一個結合咗大自然美景嘅遊樂園。佢哋每年冬天嘅點燈活動非常出名，已經連續四年獲得「關東三大燈飾活動」認證。今年更加首次同角落生物合作，場內使用600萬顆LED燈泡，睇見都覺得壯觀！活動由即日起去到下年4月2日，就算敢唔切聖誕去都唔使驚～
遊客進入會場後都需先乘坐雙腳懸空嘅纜車，經過長達250 米嘅「彩虹地毯」。搭纜車嘅時候燈飾就喺你腳下，呢個睇燈飾嘅方法夠晒新鮮。抵達山頂後就會見到角落生物藝術光板迎接大家！樂園分為五個園區，每個園區都有以角落生物角色為主題嘅燈飾，部分仲會結合埋旋轉木馬、摩天輪等遊樂設施。除此之外，園內仲有主題餐點同埋聯名系列商品，角落生物fans一定要搵時間去一轉！
相模湖森林遊樂園
經KKday預訂
【日本環球影城】2023年活動整合｜UNIVERSAL COOL JAPAN 2023——《SPYxFAMILY》、《名偵探柯南》合作確定！
【東京讀賣樂園——Jewellumination燈飾噴泉水舞表演】
嫌就咁睇燈飾太悶？一路坐過山車一路睇燈飾夠晒刺激啦掛？
日本讀賣樂園於1964年開幕，係東京都內最大嘅遊樂園。從新宿搭乘電車前往大約只需30分鐘，交通十分方便。由世界級燈光設計師石井幹子所開發嘅冬季燈飾「Jewellumination」，每年都吸引唔少人前往觀賞。今年以「LIGHT IS HAPPINESS!」為主題，使用多達650萬顆閃爍燈泡，係東京最大規模嘅燈飾，日期由即日起去到下年4月9日。除此之外，呢度嘅另一大賣點係噴泉水舞表演。表演結合咗圓環型噴泉、聲效、光影，同埋舞蹈員嘅演出，睇過嘅人都話好震撼！
讀賣樂園本身最受矚目嘅就係超過30年歷史嘅「Bandit過山車」，而每逢冬季仲會變得加特別，因為遊客乘搭過山車嘅時候會穿梭於燈飾之間。用呢個方法睇燈飾真係夠晒刺激！
讀賣樂園
經KKday預訂
東京開關5個必去新景點｜藏壽司 SKYTREE、Volks秋葉原HOBBY天國2、東京迪士尼旗艦店、Daiso 旗艦店｜日本旅遊景點2022
【四國高知城——ART+ +高知城 ひかりの花図鑑】
日本三大夜城之一嘅高知城冬季點燈活動「ART+ +高知城 ひかりの花図鑑」已經開始咗啦！
高知城位於日本四國高知縣，2014年被日本全國約4300位「夜景鑑賞師」評定為日本三大夜城之一，意思係喺月光或者燈光照耀之下，夜晚會散發出同日間截然不同景色嘅城堡。今年嘅點燈活動「ART+ +高知城 ひかりの花図鑑」由即日起去到下年1月29日。呢個活動嘅賣點係透過大型投影同埋立體音響，將與「日本植物學之父―牧野富太郎」淵源極深嘅植物，以及同時代印象派畫家嘅作品以光雕科技呈現出黎，係一場沉浸式嘅光影藝術體驗。
活動分咗好多個區域，一共有九大亮點，例如天守閣嘅「光之花夜城」、二之丸樓梯嘅「梵高的向日葵小徑」、二之丸嘅「莫內之庭」，全部都好靚！透過專屬手機APP，仲可以蒐集高知城入面嘅花卉插圖，再喺三之丸「高知城植物圖鑑」 欣賞採集到嘅花卉，有得打卡又有得玩！
高知城
- 地址： 日本高知県高知市丸ノ内１丁目 2-1 (地圖)
- 電話：+81 88-824-5701
- ART+ +高知城 ひかりの花図鑑官方網站
【神戶布引香草花園——古堡聖誕節2022】
有無諗過喺日本都可以過一個異國風情嘅聖誕呢？號稱日本最大香草園嘅「神戶布引香草花園」今年將會帶俾你一個不一樣的聖誕節！
「神戶布引香草花園」入面種植咗200種花卉同埋香草，加埋有成75,000株植物！距離神戶市區唔算太遠，只需要乘搭10分鐘纜車就可以抵達。由即日起到12月25日更加會舉辦「古堡聖誕節2022」期間限定慶祝活動，當中最受觸目嘅一定係25米高嘅金色聖誕樹。呢棵聖誕樹用咗約1000顆聖誕燈飾裝飾，睇落金光閃閃，氣氛一流！
除咗聖誕樹可以打卡之外，呢度仲有其他嘢可以玩。例如「古城的聖誕節」就係以中世紀德國古城「瓦爾特堡」為主題打造嘅瞭望廣場，利用園區裏面嘅花草樹木營造出「Botanical Chrsitmas」嘅感覺。園內仲有「神戶聖誕市集」，售賣聖誕雜貨、美食，同埋特色飲品。小編都好想去感受下氣氛啊！
神戶布引香草花園
- 地址： 日本兵庫県神戸市中央区北野町1丁目 4-3 (地圖)
- 電話：+81 78-271-1160
- 神戶布引香草花園官方網站
【伊豆Granpal公園——伊豆高原Granillumi】
位於日本靜岡縣嘅伊豆Granpal公園今年舉辦第8屆伊豆高原Granillumi！
伊豆高原Granillumi係日本首創嘅體驗型燈飾表演，由推出至今已經獲得多項殊榮。有別於一般燈飾，呢個活動結合咗遊樂設施、燈光表演等等項目，睇燈飾之餘仲可以有唔同互動體驗。今年第8屆嘅活動主題係「大冒險」，主場地以大海為設計概念，利用各式各樣嘅燈泡打造出波浪、船隻、魚群，非常壯觀。園內仲分為唔同主題，每一區都設有多個打卡點。展出日期由即日起去到下年8月，一定要搵時間去下先得！
伊豆高原Granillumi
- 地址： 日本静岡県伊東市富戸1090 (地圖)
- 電話：+81 557-51-1122
- 伊豆高原Granillumi官方網站
【日本環球影城——NO LIMIT! Christmas】
全世界最高嘅聖誕樹回歸日本環球影城！「NO LIMIT! Christmas」活動終於翻黎啦！
日本環球影城嘅「NO LIMIT! Christmas」之前因為疫情停辦咗兩年，今年終於再度舉辦，活動日期由即日起到下年1月9日。園區入面唔止有一棵30米嘅巨型聖誕樹，Minions仲會換上聖誕服裝同大家歡度佳節。講開呢棵聖誕樹就勁啦！佢獲得兩項健力士世界紀錄，除咗高度獲得健力士世界紀錄認證之外，樹頂長達3米高嘅雪花裝飾都同時創下「世界最大雪花裝飾」嘅紀錄，打卡嗰陣一定好壯觀。
另外，為咗彌補呢3年無舉辦「NO LIMIT! Christmas」嘅遺憾，今年園區內所有人氣角色都會參與呢場盛事，其中就有由Minions領軍嘅「Minions Happy Christmas Greeting」。除咗Minions之外仲會有其他角色登場，例如「Hello Kitty快樂銅管樂隊」等等嘅慶祝活動， 小編都好想去日本環球影城過聖誕啊！
日本環球影城下年都會有好多新活動，包括同多部日本人氣動漫合作，想知道就記得睇埋日本環球影城2023活動整合啦！
日本環球影城
- 地址： 日本大阪府大阪市櫻島二丁目1番33號 (地圖)
- 電話：+81 570-200-606
- 日本環球影城官方網站
【橫濱紅磚倉庫聖誕市集、橫濱地標大廈哈利波特合作】
踏入12月，聖誕氣氛越黎越濃厚！今年日本橫濱都好有聖誕氣氛，因為橫濱紅磚倉庫同埋橫濱港未來21都有一系列嘅聖誕活動，最吸引嘅係仲會同哈利波特聯手合作，fans一定要去打卡！
橫濱紅磚倉庫今年已經係第13年舉辦聖誕市集，每一年都吸引好多本地人同埋遊客前往。今年嘅活動日期係由即日起去到12月25日。會場最受觸目嘅就係約10米高嘅聖誕樹，同埋佈置晒裝飾嘅小木屋。小木屋入面會賣好多特色美食同埋歐洲雜貨，例如烤香腸、德國熱甜酒。
另一方面，橫濱港未來21今年同哈利波特合作，舉辦一連串以「與哈利波特的魔法旅程相遇」為主題嘅聖誕活動。橫濱地標大廈 (横浜ランドマークタワー) 一樓嘅Sakata Seed Garden Square有一棵以「霍格華滋的魔法樹」為設計概念嘅聖誕樹，每日16:00至23:30都會有燈光表演。MARK IS港未來唔單止佈滿晒哈利波特嘅打卡點同埋互動式裝置，現場仲有好多期間限定嘅哈利波特主題美食同埋商品，fans一定要去打卡啦！
橫濱紅磚倉庫
- 地址： 日本神奈川県横浜市中区新港1丁目1 (地圖)
- 電話：+81 045-211-1515
- 橫濱紅磚倉庫官方網站
橫濱地標大廈
- 地址： 日本神奈川県横浜市西区みなとみらい2丁目 2-1 (地圖)
- 電話：+81 045-222-5015
- 橫濱地標大廈官方網站
【京都平安神宮——NAKED YORU MO-DE】
你有無諗過古色古香嘅神社夜晚都可以搖身一變成為燈光投影嘅場地呢？平時嘅神社多數都只可以喺日間參拜，但係由日本創意藝術團隊「NAKED」打造嘅「NAKED YORU MO-DE」就帶俾遊客一個夜間參拜嘅體驗！
呢個活動之前已經喺豐川稻荷神社、神田明神舉辦過而且大受好評，今年佢哋同位於京都嘅平安神宮合作，活動日期由即日起去到12月25日。除咗將燈光藝術投影喺建築物上面之外，活動嘅一大賣點就係打造互動式嘅體驗，例如「NAKE Distance 燈籠®︎」就係俾遊客拎住一個燈籠，而每一盞燈籠映照出嚟嘅花卉圖案啱啱好就係最佳嘅社交距離。除此之外燈籠嘅燈光仲會融入唔同嘅藝術作品，令遊客成為藝術作品嘅一部分。「NAKED Tsukubai®︎」更加將酒精消毒器同埋投影設備結合，每當遊客消毒雙手嘅時候，手上除咗有消毒酒精之外仲會有一朵花喺手中綻放，真係好有創意又好夢幻啊！相信呢個活動會吸引到唔少平時對參觀古建築物無乜興趣嘅遊客，小編都好想去打卡啊！
平安神宮NAKED YORU MO-DE
- 地址： 日本京都府京都市左京区岡崎西天王町 (地圖)
- 電話：+81 0570-200-888
- NAKED YORU MO-DE官方網站
【東京晴空塔——DREAM CHRISTMAS 2022】
東京晴空塔由即日起至12月25日期間都會舉辦一連串聖誕活動！晴空廣場除咗遍布以金色為基調嘅燈飾之外，仲設置咗一棵高達8米嘅巨型白色聖誕樹可以打卡，晴空塔嘅吉祥物「SORAKARAちゃん」更會換上聖誕服裝同大家見面！
晴空塔4樓設有聖誕市集，售賣各種聖誕主題商品。今年更加係晴空塔10週年，市集入面仲會有一啲限定產品同埋美食。除此之外，成座晴空塔每日會以「香檳綠」、「蠟燭紅」兩種燈光顏色輪流替換，離遠睇都已經覺得好有聖誕氣氛。會去東京過聖誕嘅話千祈唔好錯過啦！
東京晴空塔