酒店優惠

位於尖沙咀嘅富豪九龍酒店有外賣優惠，精選外賣自取午市套餐每位$98！套餐包湯、兩肉一菜連白飯，仲有糖水添！幾抵食，而且每日都唔同款，一定唔會悶啊！另外仲有全日精選套餐，最平每人都係$177！

帝逸酒店推出多款外賣美食，中日西式都有，亦有套餐俾大家選擇！好似肉醬意粉$88、豆腐火腩飯$88、沖繩豚肉生薑燒便當$98，滋味套餐都係$188 起！價錢上都幾抵食，不過帝逸酒店個位有啲入，唔夠其他酒店方便！

一向非常低調嘅香港文華東方酒店推出外賣優惠，仲低至8折起！好似卡邦尼意大利粉$208、文華經典漢堡$238及招牌海南雞飯$254。另外文華餅店亦提供湯品、咖哩美食和意大利粉醬汁外賣。平心而論文華外賣價錢比起其他酒店貴，但質素搭夠！

尖沙咀五星級帝苑酒店推出福布斯星級外賣優惠！只需$110可以品嚐多間餐廳的午市及晚市套餐！包括Le Soleil、帝苑軒、雅苑座及榮獲福布斯四星殊榮嘅東來順，一個價錢試盡多款菜式，套餐每日限量供應，亦有2人或4人優惠套餐選擇。訂購任何外賣消費淨價滿指定金額仲送免費外賣禮物，淨價滿$800可獲贈原味蝴蝶酥 (80克原價$98)或$1,800可獲贈原味蝴蝶酥 (250克原價$188)。

8度海逸酒店推出午市及晚市套餐，午市套餐價錢更低至$88起！印度雞肉或牛肉咖喱套餐$88，有埋素菜咖喱角、清炒時蔬及白飯。西式套餐有野菌忌廉湯、凱撒沙律、番茄香草芝士薄餅或芝士肉醬意大利粉、同甜品芒果布甸都只需$98！單點餐牌仲有6折優惠！折後芝士肉醬意大利粉$78、美國肉眼牛扒$132起！真係抵好多呀！

香港萬麗海景酒店有外賣優惠，經Deliveroo 預訂即享9折！$360就可以任選滿福樓兩款小菜或飯麵，包括花雕鹵燉牛肋條、榆耳黃耳紅燒豆腐、瑤柱蛋白蟹肉炒飯、榆耳黃耳紅燒豆腐等！兩個人食岩岩好啊！單點其他菜色一樣都有9折架！

尖沙咀凱悅酒店推出抵食優惠！三道菜午餐只需$128，有齊中西印式選擇，好似有海南雞飯套餐(配蘿蔔清雞湯和芒果布甸)，或菠蘿咕嚕肉配絲苗白飯 (另配前菜辣汁芝麻木耳青瓜及甜品芒果布甸)。另外仲有全日多款自選菜單精選菜式，如芝士蕃茄汁焗豬扒飯$140、牛肉漢堡$174！

又一間五星級酒店都推外賣優惠！千禧新世界香港酒店分別推出午市及晚市套餐，嵯峨野餐廳每日限量午市套餐$160起、一個餐有齊吉列大蝦伴雜菜沙律、燒北海道花魚、炸雞塊伴薯仔沙律配飯等。桃里晚市套餐仲食到6款菜式，有齊頭盤、湯羹、主菜 、蔬菜、飯麵同甜品，都只需$250咋！

九龍海逸君綽酒店推出平日午餐外賣優惠，提供多國菜式選擇！$90就有兩個餸菜，可以揀金沙骨或西蘭花炒帶子等 (包白飯同是日老火湯)。另外仲有日式午餐如牛丼$108、雜錦海鮮丼$168 (配麵豉湯或麥茶)、仲有每日西式午餐，主菜可以揀肉類、意粉或薄餅添！

繼W酒店之後，又一間奢華五星酒店嘉里酒店大推外賣優惠！而且同樣可以疊加Deliveroo 外賣自取7折優惠！真係想像唔到咁抵！嘉里酒店百味村餐廳提供各國美食，折後辣雞炸豬扒飯只需$48、忌廉汁烤雞意粉$69、海南雞飯$76、至尊牛肉漢堡$76，就連套餐如泰式咖哩豬肉配飯，連埋前菜及飲品都只係$83！超！級！抵！呢啲機會可一不可再！可以用平民價錢試到五星酒店級數嘅食物！