坐郵輪去旅行已經唔係新鮮事，名勝世界壹號郵輪自10月1日起，展開6日5夜沖繩那霸及宮古島郵輪假期，除咗可以喺郵輪玩足5晚，仲有得去齊沖繩，同埋未有直飛嘅宮古島，小編梗係要試吓呢條日本航次啦！
房間介紹｜露台客房
今次入住露台客房，房間設施基本上都齊哂，有乾濕分離嘅浴室，電視節目有基本電影台等。露台客房有一個設計簡約嘅露台，行出去可以睇到180度海景，感受陽光溫暖，又呼吸到海洋嘅味道。
▼露台客房
想要更豪華更靚嘅，可以加多少少錢就可以升級到皇宮套房，真係又豪華又靚，仲有屬於皇宮宮房嘅客人嘅餐廳 (類似機場貴賓loung)，有budget推薦去試下。
▼皇宮套房
▼皇宮套房
點解要揀郵輪呢？小編覺得最主要嘅優點就係可以輕鬆去旅行，唔需要再預約餐廳、酒店，更加唔需要煩惱同行屋企人、朋友不同飲食口味、玩樂喜好，自由得嚟又唔需要花太多時間心機安排，最緊要嘅係，郵輪上無論餐飲同玩樂設施都好正，一啲都唔會悶，等小編介紹下有乜食有乜玩啦！
上到船飲飲食食
郵輪上包哂3餐，免費餐廳有3間選擇，分別係12樓嘅「麗都自助餐廳」，6樓嘅「百味軒」、「星夢餐廳」。麗都自助餐廳就主要係多國自助餐，食物比較多選擇，加上現場音樂及海景，氣氛一流。星夢餐廳同百味軒會在午餐和晚餐提供set meal，相對自助餐較精緻，其中星夢餐廳更有西式和中式set選擇，百味軒就只提供中式set。早餐就三間都自助餐，分別不大，至於午、晚餐，小編就推薦星夢餐廳嘅set meal，一嚟有中西式選擇，仲有素餐選擇，二嚟食物相對上較自助餐精緻，三嚟餐廳裝潢都比較好，用餐環境舒適。
▼星夢餐廳餐點
如果大家係參加5晚或以上嘅航程，喺最後上岸日當晚更會有羅馬泳池舉行嘅現場燒烤晚餐，郵輪會開放12樓露天部份，加入現場燒烤，亦都播放現場音樂，氣氛非常好，記得mark實日子。
▼現場燒烤晚餐
想同屋企人食得再好啲，又或喺郵輪上慶祝一啲重要紀念日，可以去試吓郵輪嘅收費餐廳，小編就特別推薦「海馬日本料理」(日式鐵板燒，可以睇到廚師嘅鐵板燒表演)、「星宴」(精緻西餐) 和「絲路花舞中餐廳」(中式餐廳，有片皮鴨供應)，無論食物質素和餐廳環境等都提供更好嘅選擇。
▼絲路花舞中餐廳
總括嚟講，船上飲食環境和質素絕對高於小編預期，尤其幾間付費餐廳嘅質素，以及餐飲消費非常抵嘅價錢，令整個郵輪假期好開心及加分。
郵輪設施及娛樂
上得郵輪，當然要玩下船上設施，基本上郵輪有嘅水上設施、電子娛樂中心、娛樂場、健身中心等都有。「星座劇院」每天會安排不同藝術及歌舞表演，每場大約1小時，至於郵輪頂層嘅「羅馬泳池及水上滑梯」，除咗可以游水曬太陽之外，泳池旁邊仲有幾個按摩浴缸，可以好好享受陽光下嘅郵輪假期，最後要介紹嘅係「VR探索館及動感地帶」（付費），喺船上可以玩到多款電子娛樂已經好開心，槍Game，運動Game，跳舞Game都齊，抵玩過商場啲電子遊戲中心，最正嘅係有VR Game。仲未玩夠？郵輪仲有好多tour可以參加，包括參觀captain room及theatre嘅tour，仲有唔同嘅文化體驗workshop，等你自己上船去發掘，總之一定唔會悶親啦。
▼VR探索館及動感地帶
▼按摩浴缸
嚟到沖繩有乜新嘢玩
第三日好準時早上10點就落船去沖繩玩。除咗可以自己安排行程活動玩外，郵輪都安排咗啲熱門自費local tour俾大家玩足一日，唔想plan可以跟足一日就得。
DMM Kariyushi水族館 + iias沖繩豐崎
沖繩港口距離那霸中心國際通極近，坐的士10分鐘就到。小編當日就跟住沖繩觀光局嘅安排，去咗2020開幕嘅DMM Kariyushi水族館。提起沖繩水族館，最出名一定要係北部美麗海水族館，但就距離那霸市較遠，而DMM Kariyushi水族館距離市區20分鐘車程，隔離仲有iias沖繩豐崎及ASHIBINAA Outlet，可以一次過行景點加shopping，玩足一日都得。
DMM Kariyushi水族館雖然相對較細，但都幾多嘢睇。除咗水族館指定嘅大型海洋生物水族箱外，仲可以近距離睇到企鵝。另外，水族館更設有陸上動物區，可以見到倉鴞，鵎鵼，二趾樹懶等稀有動物，在專業工作人員的指示下，訪客更可以餵食動物。最後，千祈唔好錯過水母館，圓柱型水族箱及圓型橙柱組成，水族箱及橙柱嘅顏色同音樂會相互變化，加上天花和地板均是鏡面，產生夢幻光影視覺效果。
▼DMM Kariyushi水族館
行完水族館，隔離就係iias沖繩豐崎，基本上大家熟悉嘅品牌生活雜貨店Loft，家電用品Bic Camera，服飾店UNIQLO、ABC-MART都齊哂，另外仲有沖繩嘅獨有品牌「玻璃工房 長七屋」、「首里石鹼」等，啱晒大家嚟shopping買手信，如果仲未夠喉，行多2步就係ASHIBINAA Outlet。
▼iias沖繩豐崎
沖繩最後一站，當然要返到那霸中心國際通行下啦，除咗行街買嘢之外，大家可以試下沖繩嘅手工啤同琉球限定泡盛，Chill住去享受沖繩輕鬆嘅氣息，又可以試到地道嘅沖繩味。如果係第1次嚟沖繩嘅，可以事前搵定一啲有live三線琴演奏，可以同時體驗傳統沖繩文化及美食。食完飯，夠鐘返上船啦，8點鐘啱啱好。
▼三線琴演奏
尋找宮古藍
相比起沖繩，小編更期待落船玩宮古島。或者好多朋友都會問，如果唔join團又唔識揸車點算好，其實宮古島可以租電動單車，舊電用足一日無問題，時速15-25公里，大約JPY4,800。
▼租電動單車
與那霸前濱
宮古島最出名嘅一定係「宮古藍」，呢個外號亦指宮古島嘅海水清澈見底，在陽光照射海水下，映照出顏色碧綠嘅藍漸層，彷彿是宮古島獨有。當日小編去咗「與那霸前濱」，欣賞宮古藍，純白幼沙的海灘綿延7公里。喜歡水上活動的朋友除了可以游出海暢泳及浮潛外，更可以體驗香蕉船、水上電單車等海上活動。
▼在海灘漫步時更可眺望對岸嘅來間島及來間大橋，加上剛入秋，漫步海濱十分舒適。
東平安名崎
除咗去海濱外，仲可以去宮古島東端嘅東平安名崎，突出嘅海岸線約2公里，由珊瑚礁嘅石灰岩所形成，係「國家史跡名勝天然紀念物」，可以將東海與太平洋上嘅360度宮古藍全景盡收眼底，加上海岬盡頭的燈塔，打卡影相一流。
▼東平安名崎燈塔
▼東平安名崎
探索宮古島水底世界：半潛水式觀光船
沖繩宮古島天氣已入秋，海水溫度開始凍，加上行程緊密，所以今次無落水，但就搵到另一樣好嘢睇水底世界，就係半潛水式觀光船「博愛號」。博愛號喺「上野德國文化村」其中一項遊樂設施，特色在於下層喺特色玻璃船艙，可以睇到水底下嘅海洋世界，就好似親身淺潛。船程大約45分鐘，都睇到不少品種嘅熱帶魚群，亦都睇到珊瑚，夏季更有機會睇到海龜。觀光船每天只有7班，而且會因不同情況會有變動或取消，所以嚟之前記得打去問清楚。
▼半潛水式觀光船
▼半潛水式觀光船
宮古島特選手信
又喺差唔多時間要上返船啦，最後梗係要去買手信啦。除咗AEON MaxValu和Donki之外，最地道嘅宮古島土產就梗係要去「島の駅みやこ」(island station miyako)，首選必買一定係宮古雪鹽及宮古島嘅調味醬料，小編就買咗宮古島雪鹽做嘅鰹魚味噌及宮古島産泡泡盛漬唐辛子，另外推薦嘅就係宮古島産嘅果醬發蜜糖，拎嚟搽麵包食非常正。又夠鐘上返船啦，唔夠時間買手信，郵輪上有專門賣當地藥妝手信，雖然俾岸上貴少少，但都真係有考慮到客人嘅需要，要俾Like！
▼宮古島雪鹽做嘅鰹魚味噌
▼宮古島雪鹽
▼郵輪上有專門賣當地藥妝手信
睇完以上實測係咪覺得好正呢？宜家名勝世界郵輪有雙十一優惠，11月15日前預訂指定5晚沖繩 (那霸及宮古島)、越南 (芽莊及峴港)、菲律賓 (長灘島及馬尼拉) 航次，可享船費高達65折及第4位同房免船費，每位$3,080 起，有興趣嘅即睇詳情！
▼名勝世界壹號 Resorts World One
