【韓國旅遊攻略】5日4夜慶尚道景點及住宿推介，玩轉釜山、浦項、慶州及蔚山！

韓國旅遊攻略｜慶尚道自由行｜韓國自由行｜唔少人都會去韓國釜山旅行，但係鍾意去旅行嘅你，淨係玩釜山一個地區，肯定唔夠！小編早前就去咗慶尚道玩咗5日，玩轉釜山、浦項、慶州及蔚山唔同景點！如果你都有打算去釜山旅行，不妨參考下小編嘅行程！

---

韓國慶尚道介紹

慶尚道是朝鮮王朝時期(1392年至1910年)朝鮮半島的八道之一，位於南韓東南部，主要城市包括大邱、安東、慶州、浦項、釜山、昌原、蔚山、統營。其中慶州更為新羅時代的千年古都，歷史文化背景成當濃厚。而作為現代化城市代表，則為韓國最大港口釜山、能源及工業重地蔚山及浦項！

---

Day 1 ：浦項

如果自駕遊的話，由釜山金海國際機場出發至浦項大概2小時，大家好似小編一樣搭早機去釜山，時間尚早又未知有咩地方好去嘅話，不妨去浦項玩返一日！浦項雖然係著名煉鋼城市，但地理位置為於韓國最東邊，近年以海岸風光、文化體驗及美食，成為近年新興旅遊城市！

住宿推介：Lahan Hotel Pohang

難得去浦項，當然要住近海邊，欣賞下浦項出名嘅迷人海景！今次就揀咗 Lahan Hotel Pohang，客房面積相當之寬敞，海景房仲有一望無際嘅海景俾你慢慢欣賞！酒店附近有唔少餐廳、便利店等，非常方便！

Lahan Hotel Pohang

• 地址：南韓 Gyeongsangbuk-do, Pohang-si, Buk-gu, Samho-ro 265beon-gil, 1 KR 라한호텔

---

必去景點：浦項竹島市場

浦項竹島市場(죽도시장)位於浦項市北區竹島洞(경상북도 포항시 북구 죽도시장로 20)，前往嘅交通方法非常方便。竹島市場係浦項最具代表性傳統市場之一，已經有幾十年歷史。市場以新鮮海鮮及實惠價格而聞名。市場內有多個攤位售賣海鮮、韓牛、辛奇及蔬菜等。除此之外，市場外有唔少海鮮餐廳，大家可以享用新鮮漁獲、貝類、長腳蟹等水產，啱晒鍾意食海鮮嘅大家！

▼ 浦項竹島市場

▼ 每逢11月到翌年5月，都係韓國的蟹嘅當造季節，唔少當地人同旅客都會去至竹島市場購買長腳蟹。

浦項竹島市場(죽도시장)

• 地址：浦項市北區竹島洞(경상북도 포항시 북구 죽도시장로 20)

---

必去景點：浦項運河睇夜景

夜晚唔想咁早返酒店，但又想行下嘅話，小編推介大家去浦項運河睇下夜景。浦項運河係一個融合工業、海洋及現代建設嘅獨特景點。全長3.2公里嘅人工運河，連接浦項內港與東海，大家可以係附近嘅餐廳或Cafe 坐低欣賞運河美景，又或者沿住旁邊嘅行人步道漫步。

浦項運河

• 地址：Haedo-dong, Nam-gu, Pohang-si, Gyeongsangbuk-do, 南韓

---

餐廳推介：Magodak Chicken 浦項本店

浦項除咗有唔少海鮮餐廳，不過如果你唔太鍾意食海鮮，可以試下另一種韓國名物炸雞！今次就試咗當地嘅間人氣藍絲帶認證炸雞店Magodak Chicken。起初小編都覺得炸雞點解要去浦項食，首爾嘅橋村炸雞一向都係心目中嘅Top 1位置。上菜嘅時候發現，炸雞全部都係去骨，食起上嚟就唔怕整污糟隻手！味道方面，可以選擇蒜味、辣椒味同醬油味，小編最鍾意就係蒜味，大家去嘅話就可以試下！

Magodak Chicken 浦項本店

• 地址：18-233 Sangdo-dong, Nam-gu, Pohang-si, Gyeongsangbuk-do, 南韓

---

Day 2：浦項+慶州

第二日就除咗會係浦項留多陣之外，仲會去埋慶州！慶州係韓國歷史最悠久城市之一，曾經係新羅王朝嘅首都，擁有「沒有圍牆的博物館」之稱。整個城市隨處可見千年古蹟、佛教文化遺產同自然風光，被聯合國教科文組織列為世界文化遺產。

必去景點：浦項 Space Walk

2021年開幕，由荷蘭建築團隊「UNStudio」設計，全長333米及合共717級樓梯嘅巨型鋼鐵步道 Space Walk，以螺旋階梯與懸空平台組成，最高點達20層樓高！登上最頂位置可以360度飽覽浦項城市靚景，叫佢做打卡點天花板一啲都唔誇張！最重要呢到係免費入場！

浦項 Space Walk

• 地址：30 Hwanhogongwon-gil, Pohang-si, Gyeongsangbuk-do, 南韓

---

必去景點：九龍浦近代文化歷史街區

九龍浦係浦項著名的港口小鎮，19世紀末至20世紀初曾經係日本漁民和商人聚居地，因此街區保留了許多日治時期嘅近代建築，融合了韓式及和風風格，形成獨特嘅「韓國小長崎」氛圍。近年並通過修復與活化，成為懷舊感十足的觀光景點，更加係人氣韓劇《山茶花開時》嘅拍攝地！

▼ 九龍浦近代文化歷史街區

必去景點：虎尾岬迎日廣場

虎尾岬位於南韓國最東邊，而虎尾岬亦係南韓最早迎接日出嘅地點。每年元旦都會吸引大量遊客同本地人，去到虎尾岬迎日廣場迎接新年第一道晨光。除此之外，廣場上仲有一個著名嘅藝術裝置相生之手，造型係由一對巨大青銅手掌(海上面係右手，陸地上係左手)，對啱角度就可以影到隻手托起太陽嘅打卡照！

▼ 係日出時份，對啱角度就可以影到呢個名場面。

▼ 係虎尾岬迎日廣場附近仲有唔少油菜花田，可以免費入去打卡影相！

必去景點：慶州皇理團路

淨係聽名，大家可能會以為皇理團路會係一個古舊嘅地方。而呢一到其實係深受當地年輕人熱捧嘅地方，路名以為皇南洞與首爾梨泰院經理團路結合而成，意思為「皇南洞的經理團路」。呢到有唔韓屋改建而成嘅餐廳、Cafe同精品店，鍾意行街嘅話可以去下！小編除咗行街嘆咖啡之外，仲去咗橡子漫畫ACORN CARICATURE 試下2分鐘速畫，不得不説咁短時間，竟然可以畫出咁高還原度嘅人像畫，真係好勁！

▼ 皇理團路

▼ 皇理團路 橡子漫畫ACORN CARICATURE

▼ 想著下新羅時代嘅韓服，呢到都有唔少店舖可以租借

慶州皇理團路

• 地址：南韓 Gyeongsangbuk-do, Gyeongju-si, Hwangnam-dong, Poseok-ro, 일대

---

必去景點：東宮與月池&月精橋

難得去慶州，當然要去吓充滿歷史背景嘅景點，東宮與月池係新羅時期嘅皇家遺址，由新羅文武王（문무왕）所建，原為東宮（皇太子居所）嘅後花園。小編建議大家夜晚去呢到，因為夜燈映照下景色相當之靚！而月精

▼東宮與月池

▼月精橋

東宮與月池

• 地址：102 Wonhwa-ro, Gyeongju-si, Gyeongsangbuk-do, 南韓
• 開放時間：東宮與月池：09:00~22:00(最後入場21:00)
  月精橋：24小時開放(夜間亮燈至23:00）
• 門票：成人 3,000韓元 / 青少年 2,000韓元 / 兒童 1,000韓元(含東宮與月池入場)
  月精橋免費參觀。

---

餐廳推介：山海 산해

山海 산해主打烤豬肉，豬肉經過醃製後，於烤網上加上蒜片烤，味道帶甜及焦香。餐廳獲得多年藍絲帶認證，就知道係幾咁好食！另外佢嘅醬油蟹都係相當之出色，有興趣都可以試下！

山海 산해

• 地址：49-24 Bomun-dong, Gyeongju-si, Gyeongsangbuk-do, 南韓

---

餐廳推介：혜원모리

浦項漁獲咁豐富，當然有唔少種類嘅海鮮餐廳。혜원모리用上多種海鮮加上辣湯煮麵，湯底極之鮮甜，簡單處理但風味十足！

혜원모리

• 地址：239-2 Homi-ro, Guryongpo-eup, Nam-gu, Pohang-si, Gyeongsangbuk-do, 南韓

住宿推介：The K Hotel Gyeongju

因為第二日想一早去慶州世界玩，所以揀咗附近嘅The K Hotel Gyeongju，酒店房夠大，以韓式風格設計。

The K Hotel Gyeongju

• 45 EXPO-ro, Gyeongju-si, Gyeongsangbuk-do, 南韓

---

Day 3 ：慶州+蔚山

蔚山係韓國東南部嘅重要工業城市，同時擁有豐富自然景觀及文化遺產。作為現代工業與自然風光嘅交匯地，蔚山既有全球知名汽車、造船產業，亦有未被過度開發嘅海岸線同千年古剎。

必去景點：慶州世界 Gyeongju World

慶州世界係慶尚北道最大嘅主題樂園，有齊機動遊戲、水上樂園（慶州水上世界）等設施，冬天更加會有滑雪道開放。每日都有唔少本地青少年及遊客蜂擁而至，建議大家買定門票，咁就唔洗排隊啦！

慶州世界

• 地址：544 Bomun-ro, Gyeongju-si, Gyeongsangbuk-do, 南韓

---

餐廳推介：Rasunjae 라선재

嚟到韓國，絕對值得試下傳統嘅韓食。Rasunjae 提供以慶州新鮮食材及當地農民供應嘅蔬菜作原材料。泡製出傳統風味韓食料理。

Rasunjae 라선재

• 地址：南韓 Gyeongsangbuk-do, Gyeongju-si, Yongdam-ro, 443-51 KR

---

餐廳推介：蔚山彥陽烤牛肉 울산언양불고기

蔚山彥陽烤牛肉(언양불고기)係韓國蔚山彥陽地區嘅招牌美食，佢嘅醃製方法同炭火燒烤好獨特，肉質嫩滑又多汁，帶住微微甜香，包埋生菜同辛奇真係停唔到口！今次揀嘅울산언양불고기餐廳，都係藍絲帶認證餐廳，去到嘅時候已經坐滿當地人，非常受歡迎！

蔚山彥陽烤牛肉 울산언양불고기

• 地址：205 Wolpyeong-ro, Nam-gu, Ulsan, 南韓

---

住宿推介：Shilla Stay Ulsan

Shilla Stay Ulsan酒店位於蔚山市中心，附近餐廳食肆、商店、超市等林立，極之方便！空房夠大之餘，又有大浴缸可以俾大家浸下浴！

Shilla Stay Ulsan

• 地址：200 Samsan-ro, Nam-gu, Ulsan, 南韓

---

Day 4 蔚山+釜山

必去景點：長生浦鯨魚文化村

蔚山長生浦曾經係以捕鯨為主要工業，隨住禁止捕鯨後，呢個工業已經成為歴史。長生浦鯨魚文化村以重現當時捕鯨漁村的主題區。呢到了解鯨魚嘅誕生、進化與生態，以及捕鯨歷史，並展出10公尺實際鯨魚骨骼、捕鯨工具與文物等。

長生浦鯨魚文化村

• 地址：271-1 Jangsaengpogorae-ro, Nam-gu, Ulsan, 南韓

---

必去景點：釜山樂天Premium Outlets

釜山樂天 Premium Outlets 係韓國釜山必去購物熱點之一，集結咗超過200個國際同韓國本土品牌，樂天購物中心、樂天超市、樂天影城與樂天美食區，係購物狂嘅天堂！

釜山樂天Premium Outlets

• 地址：147 Gijanghaean-ro, Gijang-gun, Busan, 南韓

---

必去景點：海雲臺藍線公園

海雲臺藍線公園利用海雲臺尾浦-青沙浦-松亭路段長4.8公里嘅舊東海南部線鐵道改建而成，主要有海岸列車Beach Train及膠囊列車Sky Capsule行駛其間，為釜山海雲臺觀光特區的核心觀光設施之一。海雲臺海岸列車是能沿途欣賞東釜山海岸絕景！膠囊列車係往返於尾浦與青沙浦之間嘅單軌車廂，一輛車廂最多可乘載4位成人。

海雲臺藍線公園

• 地址：南韓 Busan, Haeundae-gu, Cheongsapo-ro, 116 청사포정거장 2F

---

必去景點：Millac the Market 廣安民樂市場

廣安民樂市場 係釜山廣安里海灘（광안리해수욕장） 附近嘅一個地道夜市，主打 平價海鮮、街頭小食，夜晚氣氛熱鬧，係本地人同遊客都鍾意去嘅掃街熱點！

Millac the Market 廣安民樂市場

• 地址：56 Millaksubyeon-ro 17beon-gil, Suyeong-gu, Busan, 南韓

---

住宿推介：Lavalse Hotel Busan

Lavalse Hotel Busan 位於釜山影島，雖然為於島上，但其實離札嘎其市場等景點非常之近，入住不同房型可以欣賞到釜山港美景。週末晚附近仲有物揚場布帳馬車村，可以下地道美食之餘，夜晚氣氛亦非常熱鬧！

lavalse Hotel Busan

• 地址：82 Bongnaenaru-ro, Yeongdo-gu, Busan, 南韓

---

餐廳推介：錦繡河豚湯 海雲台本店 금수복국 해운대 본점

錦繡河豚湯係韓國最早出現砂鍋河豚湯餐廳，可以品嘗各式各樣美味的河豚料理。錦繡河豚湯主打四種河豚料理(活河豚、黃河豚、黑河豚、白河豚)，河豚肉鮮味美口感彈牙，河豚煮嘅湯味道極鮮甜！另外仲有炸、烤、刺等等食法！更加入選24年釜山米芝蓮。

錦繡河豚湯 海雲台本店 금수복국 해운대 본점

• 地址：23 Jungdong 1-ro 43beon-gil, Haeundae-gu, Busan, 南韓

---

Day 5：釜山

必去景點：釜山ARTE MUSEUM

釜山ARTE MUSEUM

• 地址：29 Haeyang-ro 247beon-gil, Yeongdo-gu, Busan, 南韓
• 營業時間：每日 10:00~21:00(入場截至20:00)
• 週末/國定假日門票
  成人：25,000韓元 / 青少年：21,000韓元 / 兒童：15,000韓元
  平日門票
  成人：22,000韓元 / 青少年：18,000韓元 / 兒童：15,000韓元

---

---

心去景點：富平罐頭夜市場

富平市場喺1950年代韓戰後形成，當時物資短缺，而呢到主要販賣美國士兵嘅罐頭同進口貨，所以叫做「罐頭市場」！而家轉型成平民美食街，夜晚仲會變身成「夜市」，想掃街嘅話，呢到就最適合！

富平罐頭夜市場

• 地址：39 Bupyeong 1-gil, Jung-gu, Busan, 南韓

---

餐廳推介：Red Light House 影島本店

釜山海鮮咁出名，除咗烤熟食之外，魚生食法都一樣咁好食，今次揀咗Red Light House 影島本店食下刺身！除咗食物質素高之外，餐廳個無敵海景加夕陽View 都係小編book呢間餐廳嘅原因！餐廳可以用平板電腦落單，唔洗驚語言不通，大家可以試下呢個用酸辣汁刺身，完全無遮蓋魚嘅鮮味，非常開胃！

Red Light House 影島本店

• 地址：40 Namhangseo-ro, Yeongdo-gu, Busan, 南韓

---

總結

慶尚道地方咁大，當然短短幾日係玩唔晒！大家如果有機會去釜山，又或者之後HK Express 開辦大邱線，都可以去鄰近嘅慶尚道城市玩下！

特別鳴謝：韓國觀光公社

#韓國觀光公社 #KTOHK遊韓資訊 #韓國旅遊 #釜山旅遊 #蔚山旅遊 #慶州旅遊 #浦項旅遊 #慶尚道旅遊

訂閱 Flyday 每日最新優惠情報