想試吓喺外國生活,放低平日返工放工嘅節奏,邊旅行邊體驗當地文化?Working Holiday 工作假期 可以令旅程由幾日變成一年或以上,畀你有時間慢慢認識一個地方!不過,香港人可以去邊啲國家 Working Holiday?幾多歲可以申請?係咪每個地方都要抽籤?最近香港政府與智利簽署協議,香港青年日後可以去智利工作假期,逗留最多十二個月,為首個拉丁美洲工作假期目的地。小編根據香港勞工處工作假期計劃網站,整合香港青年可考慮嘅 13 個工作假期目的地,由日本、韓國,到澳洲、新西蘭及歐洲,一次比較名額、逗留期限同申請重點!
香港人Working Holiday可以去邊啲國家?
根據香港勞工處工作假期計劃網站,目前列出嘅13個目的地包括:澳洲、新西蘭、日本、韓國、加拿大、英國、愛爾蘭、德國、法國、奧地利、匈牙利、瑞典及荷蘭。 英國相關安排稱為「青年流動計劃」(Youth Mobility Scheme,簡稱 YMS)。最近香港政府與智利簽署協議,香港青年日後可以去智利工作假期,逗留最多十二個月,為首個拉丁美洲工作假期目的地。
以下比較香港青年前往海外嘅工作假期名額:
| 國家 | 一般最長逗留期限* | 香港青年赴當地名額 | 官方資料 |
|---|---|---|---|
| 澳洲 | 12個月 | 不設名額限制 | 澳洲計劃介紹 |
| 新西蘭 | 12個月 | 每年400個 | 新西蘭計劃介紹 |
| 日本 | 12個月 | 每年1,500個 | 日本計劃介紹 |
| 韓國 | 12個月 | 每年1,000個 | 韓國計劃介紹 |
| 加拿大 | 12個月 | 2026年度193個 | 加拿大計劃介紹 |
| 英國 | 24個月 | 2026年度1,000個;特區護照持有人須先參加抽籤 | 英國YMS資料 |
| 愛爾蘭 | 12個月 | 每年200個 | 愛爾蘭計劃介紹 |
| 德國 | 12個月 | 每年300個 | 德國計劃介紹 |
| 法國 | 12個月 | 每年750個 | 法國計劃介紹 |
| 奧地利 | 12個月 | 每年100個 | 奧地利計劃介紹 |
| 匈牙利 | 12個月 | 每年200個 | 匈牙利計劃介紹 |
| 瑞典 | 12個月 | 不設名額限制 | 瑞典計劃介紹 |
| 荷蘭 | 12個月 | 每年100個 | 荷蘭計劃介紹 |
| 智利 | 12個月 | 每年100個 | – |
以上為一般首次參與安排,個別目的地另有符合條件人士適用嘅後續簽證安排。實際獲批逗留期限以簽證或入境許可為準。
Working Holiday申請資格:幾多歲可以去?
香港勞工處列出嘅一般申請資格包括:
- 申請時年齡介乎 18至30歲。
- 通常居住於香港,並持有有效香港特區護照。
- 以旅遊為出訪主要目的。
- 旅程中不攜同受養人。
- 持有回程機票,或有足夠資金購買。
- 能提供經濟證明,負擔抵埗初期生活費。
以上屬一般框架,個別目的地對護照、受養人及年齡計算時間可能有不同規定,申請前要再睇當地政府要求。
提提你:網上見到「Working Holiday放寬至35歲」,未必適用於香港特區護照持有人。 例如英國 YMS 部分國籍人士可於35歲或以下申請,但香港特區護照持有人適用嘅年齡上限仍為30歲。
拉丁美洲Working Holiday:智利
智利Working Holiday|首個拉丁美洲工作假期目的地

想將 Working Holiday 旅程延伸到南美洲?智利係新選擇!香港與智利於 2026年11月18日簽署雙邊工作假期計劃協議,成為香港首個拉丁美洲工作假期合作夥伴。計劃雙方每年各設 100個名額,參加者可在當地逗留 最長12個月,期間可從事短期工作補助旅費,或修讀短期課程。想親身認識拉丁美洲文化、探索智利自然風光,不妨留意後續安排!截至2026年11月19日,簽證申請程序仍待公布,申請日期、資格及文件要求須以官方最新公布為準。
亞洲Working Holiday:日本、韓國
日本Working Holiday|將旅行變成日常生活

日本工作假期一般可逗留最長一年,旅遊係主要目的,工作屬補助旅費嘅附帶活動。申請人亦須留意指定受理日期,唔可以當作全年隨時遞交。想去日本生活,建議提前準備日常日語,同時諗清楚希望體驗城市定地方生活。
韓國Working Holiday|體驗韓國文化,留意工作限制

鍾意韓國文化、想練習韓文,可以將韓國列入考慮。揀目的地時,除咗諗住邊度方便探索,亦應比較住宿開支、課程安排同自己嘅語言能力。按勞工處資料,韓國工作假期最長可逗留12個月,同一僱主嘅受僱期限一般不超過6個月,短期課程亦有期限限制。規劃時記得預留旅遊同生活適應時間。
大洋洲Working Holiday:澳洲、新西蘭
澳洲Working Holiday|香港青年赴澳不設名額限制

澳洲嘅一大申請特點,係香港青年透過工作假期計劃赴澳不受年度名額限制。首次工作假期一般最長12個月,按勞工處資料,同一僱主嘅受僱期限通常不超過6個月,修讀課程累計不超過4個月。實際工作限制、豁免及第二次或第三次簽證資格,應向澳洲內政部核實。
新西蘭Working Holiday|想親近大自然可以考慮

如果你希望將長途旅行、戶外活動同當地生活放入同一段旅程,可以考慮新西蘭。規劃時不妨先諗清楚希望停留城市,定係會經常轉換地區,再安排交通同住宿預算。新西蘭每年提供400個名額,一般最長逗留12個月。按勞工處資料,同一僱主嘅受僱期限不超過3個月,亦可修讀一個不多於6個月嘅短期課程。
北美洲Working Holiday:加拿大
加拿大Working Holiday|留意IEC年度申請時間

加拿大工作假期屬 International Experience Canada(IEC)相關安排。選擇落腳地點之前,可以先比較城市生活、戶外活動、氣候同語言環境,唔使一開始就將行程排得太密。
勞工處列明,2026年度加拿大工作假期名額為193個,一般最長逗留12個月;成功申請者會獲發可於入境時換取工作許可證嘅介紹信。
2026年度提交個人資料嘅截止日期已過,原定截止日為2026年10月19日。 有意參加下一年度計劃,應留意 IEC 最新公布,唔好將年度名額理解為目前仍可申請。
歐洲Working Holiday:英國、愛爾蘭及另外6國
英國Working Holiday/YMS|一般最長可留兩年

英國「青年流動計劃 YMS」一般容許合資格人士在英國生活及工作最長24個月。對想用較長時間適應外地生活嘅讀者而言,逗留期限係一個值得比較嘅因素。
香港特區護照持有人須先經抽籤獲選,先可以申請簽證。2026年度抽籤已全部結束,下一輪2027年抽籤詳情會於官方頁面公布。 另外,BNO 持有人參加 YMS 嘅安排有所不同,毋須參加該抽籤,應按自己使用嘅護照及身份查閱資格。
愛爾蘭Working Holiday|留意同一僱主受僱期限

希望喺英語為主嘅環境生活,又想探索愛爾蘭文化,可以考慮愛爾蘭工作假期。計劃每年提供200個名額,一般最長逗留12個月。按勞工處資料,同一僱主嘅受僱期限不可超過3個月,而且此計劃不容許參加者修讀短期課程。如果你想同時安排正式課程,要先核實其他合適途徑。
德國Working Holiday|旅遊、文化與短期進修

德國工作假期計劃每年提供300個名額,最長逗留12個月,同一僱主嘅受僱期限一般不超過3個月,亦可安排符合規定嘅短期培訓課程。準備時可以先學日常德語,再按自己希望體驗嘅生活方式選擇地區。
法國Working Holiday|慢慢體驗法式生活

想花多啲時間認識法國飲食、藝術同日常文化,可以考慮法國工作假期。每年提供750個名額,一般最長逗留12個月;按勞工處資料,同一僱主嘅受僱期限不超過6個月,短期課程累計亦不超過6個月。
奧地利Working Holiday|可留一年,工作總期另有限制

奧地利每年提供100個名額,一般最長逗留12個月。要特別留意,可逗留一年,並不代表可以工作一年:計劃下累計工作時間不得超過6個月,修讀課程累計亦不超過6個月。編排行程時,要將工作同旅遊時間一齊考慮。
匈牙利Working Holiday|認識中歐另一種生活節奏

如果想將匈牙利作為生活體驗嘅目的地,可以考慮當地工作假期安排。每年提供200個名額,一般最長逗留12個月,同一僱主嘅受僱期限不超過6個月,亦可修讀一個不多於6個月嘅短期課程。
瑞典Working Holiday|香港青年赴瑞不設名額限制

除咗澳洲,勞工處亦列明香港青年透過工作假期計劃前往瑞典不受名額限制,一般最長逗留12個月。
瑞典移民局提醒,計劃主要係讓青年體驗瑞典生活同文化;雖然容許工作,但工作不應成為旅程主要目的。不設配額亦唔等於自動獲批,仍要符合申請條件。
荷蘭Working Holiday|名額較少,提早留意安排

荷蘭工作假期每年提供100個名額,一般最長逗留12個月,期間可按規定從事短期工作及修讀短期課程。有興趣嘅話,應提早查閱當年度申請程序,再安排住宿同抵埗初期預算。
Working Holiday要準備幾多錢?
簽證要求嘅資金證明,並不等於整段工作假期所需預算。 除咗申請文件列明嘅金額,規劃時亦應計入機票、簽證費、保險、住宿按金、交通及未開始工作前嘅生活開支。
以下係部分目的地官方資料列明嘅資金要求:
| 目的地 | 資金證明參考 | 來源 |
|---|---|---|
| 澳洲 | 5,000澳元 | 勞工處 |
| 新西蘭 | 4,200新西蘭元 | |
| 日本 | 約港幣22,000元 | |
| 加拿大 | 2,500加元 | |
| 英國 | 2,530英鎊,另有存款持有期要求 | 英國政府 |
以上金額並非全部申請條件;回程交通票、存款證明日期及其他文件要求,要按各地最新規定準備。建議先用「暫時未有工作收入」嘅情況計算預算,再決定停留時間,避免將預期收入當成已經到手嘅旅費。
第一次去Working Holiday,點揀國家?
可以先由以下幾條問題開始:
- 最想體驗啲咩? 語言學習、城市生活、自然風光,定係一個一直想深入認識嘅地方?
- 語言能力夠唔夠應付日常? 除咗旅遊,仲要考慮租屋、面試同處理文件。
- 預算支持到幾耐? 將未有收入期間嘅支出計入,而唔係只比較簽證所需存款。
- 申請時間配合到嗎? 有年度名額、抽籤或指定受理期嘅目的地,要先配合申請時間。
- 工作限制適唔適合自己? 同一僱主受僱期限、累計工作期同課程期限,都會影響安排。
先揀出兩至三個目的地,再比較申請資格同生活預算,會比單純追住「邊度最多人去」更容易作決定。
Working Holiday常見問題
1. 香港人Working Holiday有幾多個國家可以揀?
按香港勞工處工作假期計劃網站,目前列出13個目的地,包括澳洲、新西蘭、日本、韓國、加拿大、英國、愛爾蘭、德國、法國、奧地利、匈牙利、瑞典及荷蘭。最近更香港政府更與智利簽署協議,設立讓兩地青年參與的雙邊工作假期計劃。
2. Working Holiday係咪全部都要抽籤?
唔係,各地程序不同。例如英國 YMS 要求香港特區護照持有人先參加抽籤;其他目的地應按各自官方申請程序處理,唔好套用同一種方法。
3. 持BNO護照可唔可以申請Working Holiday?
要按目的地判斷,唔可以將特區護照安排直接套用。例如日本接受符合其他條件嘅香港特區護照或 BNO 護照持有人申請;英國亦容許符合資格嘅 British National (Overseas) 申請 YMS。日本官方資格、英國官方資格
4. Working Holiday係咪包搵工同住宿?
唔係。香港政府不會提供此計劃嘅資助或住宿安排,參加者須自行籌備行程、旅費同生活安排。
5. Working Holiday一定要買保險嗎?
多個目的地要求參加者購買保險,具體保障範圍各有不同。勞工處亦十分鼓勵澳洲工作假期參加者投購適當保障。購買前應核對保單有冇涵蓋工作活動、整段逗留期,以及目的地要求嘅醫療、住院或運送保障。
6. Working Holiday可唔可以去多過一個國家?
一般可以按各目的地資格分別申請,但同一目的地嘅參與次數可能有限制,個別地方亦設有符合條件人士適用嘅後續簽證安排。曾經參加過工作假期,應先向下一個目的地核實資格。
