以前喺《GTA 5》入面揸車,可能試過乖乖跟住導航去做任務,最後卻變咗沿住海岸兜風、上山睇夜景。玩咗咁多年,Los Santos 嘅街景熟悉到好似自己去過一樣,而當中唔少地方,現實中真係搵得到!
相信大家最近忙緊玩《GTA 6》,不如先回顧下陪伴咗大家13年嘅《GTA 5》場景,包括 Michael、Franklin 同 Trevor 嘅地盤,由主線任務出發,認識《GTA 5》背後嘅洛杉磯及加州景點。下次去美國自由行,或者就可以將遊戲回憶變成真正嘅旅行路線。
【GTA 5真實地標】迎接GTA 6,7大洛杉磯及加州景點及經典任務回顧!
GTA 5嘅Los Santos,現實中係邊度?
《GTA 5》 嘅 Los Santos 主要以美國洛杉磯為參考,周邊地區亦揉合咗加州其他地方嘅特色。不過遊戲有改動地名、縮短距離及重新組合街區,所以認得建築物,唔代表可以直接用遊戲地圖喺現實導航。
| 現實景點 | GTA 5對應地點 | 遊戲回憶重點 |
|---|---|---|
| Hollywood Sign 荷里活字牌 | Vinewood Sign | Vinewood 電影世界及山區兜風 |
| Griffith Observatory 格 Griffith 天文台 | Galileo Observatory | Michael、Trevor 合作任務〈Caida Libre〉 |
| Santa Monica Pier 聖莫尼卡碼頭 | Del Perro Pier | 〈Daddy’s Little Girl〉父子單車行 |
| Venice Beach 威尼斯海灘 | Vespucci Beach | 同一任務嘅海濱單車路段 |
| Getty Center 蓋蒂中心 | Kortz Center | 〈The Wrap Up〉多方勢力交火 |
| TCL Chinese Theatre 中國戲院 | Oriental Theater | 〈Meltdown〉電影首映 |
| Salton Sea 索爾頓湖及周邊聚落 | Alamo Sea、Sandy Shores 一帶 | Trevor 嘅沙漠生活與生意 |
1. Hollywood Sign荷里活字牌|由Vinewood認識Los Santos嘅電影夢


山坡上排開嘅巨大白色英文字,幾乎係一眼就認得嘅洛杉磯標記。《GTA 5》將「HOLLYWOOD」換成「VINEWOOD」,呢個地標適合用嚟理解 Michael 嘅故事:佢對電影充滿幻想,亦一路走入 Los Santos 嘅電影圈。字牌未必係某場主線任務嘅核心,但絕對係其中一個代表性地標。
2. Griffith Observatory天文台|Michael Trevor 合作任務場景


Griffith Observatory 係遊戲 Galileo Observatory 嘅現實參考地標。圓頂建築、山坡位置同俯瞰城市嘅視野,令佢成為最容易認出嘅 GTA 5 景點之一。
記唔記得其中一個任務〈Caida Libre〉?Michael 前往 Galileo Observatory 附近,用火箭炮擊中飛機之後, Trevor 揸電單車追住受損飛機。天文台唔只係背景,而係呢場雙主角合作任務嘅重要起點。
現實中嚟到呢度,可以慢慢欣賞建築同城市景觀,感受遊戲以外嘅洛杉磯。天文台設施免費入場,天象館表演則另外收費
3. Santa Monica Pier聖莫尼卡碼頭|Michael救女大冒險


遊戲入面,Michael 喺〈Daddy’s Little Girl〉任務當中,同 Jimmy 兩父子係Del Perro Pier鬥到踩單車。原本似係一場修補關係嘅家庭活動,點知Michael 發現自已個女Tracey 喺海上遊艇而急轉直下,變成落水救女同水上追逐。Del Perro Pier 嘅現實參考正正就係 Santa Monica Pier
現實嘅 Santa Monica Pier 就可以放鬆得多:沿碼頭散步、望住海岸線,或者去 Pacific Park 玩摩天輪同過山車。建議留意日落前後嘅光線,影低最有「原來我嚟過呢度」感覺嘅海岸畫面。
4. Venice Beach威尼斯海灘|Michael父子海濱單車路


《GTA 5》嘅 Vespucci Beach 以 Venice Beach 為重要參考,將沙灘、海濱活動同街頭文化融入 Los Santos。任務〈Daddy’s Little Girl〉入面嘅單車比賽,正正由 Vespucci 海濱一路帶玩家去碼頭。
現實嘅 Venice Beach 除咗沙灘,仲包括 Ocean Front Walk 海濱步道、Muscle Beach、單車徑及多種康樂設施。想感受 Vespucci 嘅生活氣氛,可以將重點放喺沿海慢行,睇吓唔同人點樣使用呢片海岸。
5. Getty Center蓋蒂中心|將Kortz Center槍戰場景變成藝術散步
第一次去 Getty Center,GTA 玩家可能會對淺色建築、開揚庭院同山上嘅空間布局產生熟悉感。遊戲中嘅 Kortz Center,就係以呢座洛杉磯藝術地標為主要參考。Kortz Center 介紹。
不過,Michael 喺〈The Wrap Up〉嚟到呢度,並唔係為咗欣賞藝術。佢同 Dave 嘅會面演變成 FIB、IAA 及 Merryweather 等勢力捲入嘅交火,Trevor 亦加入支援。原本整齊開揚嘅文化設施,瞬間變成要一路搵掩護、一路逃走嘅戰場。〈The Wrap Up〉任務資料。
現實旅行就可以慢慢欣賞 Getty Center 嘅建築、庭院同藝術收藏。Getty Center 免費入場,但需要預約指定入場時段,停車則有另外安排;訂行程前記得先預約。Getty Center 官方常見問題。
6. TCL Chinese Theatre中國戲院|Michael嘅電影首映之夜

位於 Hollywood Boulevard 嘅 TCL Chinese Theatre,以鮮明嘅中式戲院外觀聞名,亦係遊戲 Oriental Theater 嘅現實參考。喺〈Meltdown〉任務,Michael 同 Jimmy 盛裝出席電影首映。對熱愛電影嘅 Michael 嚟講,呢一刻本來應該係圓夢時刻,卻因為家人受到威脅而被打斷,迫使佢趕返屋企。戲院於是成為「電影夢」同「家庭危機」交會嘅地方。現實中嚟到TCL Chinese Theatre,可以先欣賞正面建築,再睇吓門前嘅明星手印及腳印。
7. Salton Sea索爾頓湖|離開Los Santos,走入Trevor嘅沙漠世界

《GTA 5》令人難忘嘅地方,唔止係大城市。由市區一路駛入乾燥荒野,見到湖岸、小鎮同低矮建築,氣氛就會慢慢變成 Trevor 嘅世界。
遊戲嘅 Alamo Sea 及 Sandy Shores 一帶,令人聯想到加州 Salton Sea 同周邊聚落。當中 Sandy Shores 嘅參考包括 Desert Shores、Bombay Beach 及 Salton City 等地,並非將某一條小鎮完整搬入遊戲。
現實嘅 Salton Sea 位於南加州內陸,適合另外安排公路旅行,唔建議當成洛杉磯市內順路一站。到訪前亦要查看公園最新通告、道路及設施狀況,唔好直接套用遊戲入面嘅湖邊活動想像。
想跟住GTA 5去旅行,行程點安排?
如果以洛杉磯自由行為主,可以先按地區分開,以下係編輯建議嘅分組方式:
- 荷里活及山區:中國戲院、Hollywood Sign 觀景位置、Griffith Observatory。想行山睇字牌,就要另外預留足夠時間。
- 西岸海濱:Venice Beach 同 Santa Monica Pier,重溫〈Daddy’s Little Girl〉沿海單車行嘅氣氛。
- Getty Center:按預約時段安排,預留時間欣賞展覽、庭院同建築。
- Salton Sea:另外規劃南加州內陸路線,唔好硬塞入市區觀光日。
遊戲可以幾分鐘由海邊駛到山頂,現實洛杉磯就要考慮交通、泊車同景點預約。遊戲地圖適合勾起回憶,真正行程仍然要跟現實地圖安排。
GTA 5真實地標常見問題
GTA 5嘅Los Santos係咪即係洛杉磯?
Los Santos 係以洛杉磯為主要參考嘅虛構城市,保留咗荷里活、海岸及山區等特色,但地名、距離及街區布局經過改動,唔係一比一重建。
GTA 5入面嘅摩天輪,現實喺邊度?
Del Perro Pier 嘅現實參考係加州 Santa Monica Pier。現實碼頭上嘅 Pacific Park 設有摩天輪及過山車。
GTA 5嘅天文台可以真係去參觀嗎?
可以。Galileo Observatory 嘅現實參考係洛杉磯 Griffith Observatory。天文台設施免費入場,部分節目另有收費,出發前應查看官方開放安排。
GTA 6會繼續以Los Santos為主要舞台嗎?
根據 Rockstar 官方介紹,GTA 6 嘅故事轉到 Vice City 及 Leonida,與 GTA 5 嘅 Los Santos 舞台不同。
由螢幕入面嘅 Los Santos,走到現實中嘅加州,同一座碼頭、一個圓頂,甚至一段荒涼湖岸,都可能突然帶返一段任務回憶。等緊出發去 Vice City 之前,不如先同 Michael、Franklin 同 Trevor 嘅世界好好道別一次。
