HK Express 宣布推出全新票價模式，由原本嘅「自由飛」及「靈活飛」，改為4種新票價種類。包括「輕便飛」、「經濟飛」、「隨心飛」及「無憂飛」。相信今次香港快運嘅改動主要係想照顧大家各種旅行模式，令旅程更有彈性同慳得更多！最新嘅「輕便飛」只包一件隨身行李可能未必啱放長假嘅大家，但就好適合鍾意週末快閃飛一兩日嘅朋友！係大假有限嘅情況下，呢個方法幫大家可以慳埋慳埋飛多幾轉！想知邊種方法啱自己，記得睇下小編以下嘅資料整合喇！
HK Express行李｜香港快運推出4種全新票價模式
HK Express 推出4種全新票價模式，包括「輕便飛」、「經濟飛」、「隨心飛」及「無憂飛」，取代現有嘅「自由飛」及「靈活飛」，最大分別係行李重量及限制上。
HK Express 4種新票價詳情：
輕便飛
- 手提行李^：1件隨身物品 (必須放入前方座位下方及不超過7公斤)
- 寄艙行李：需要額外買
- 座位選擇：需要額外買
- 更改航班：任何日期/時間的更改須在原定航班出發前的48小時前進行，每次更改將收取HKD580的費用，另或需支付票價/稅項差額，並受預訂日期及航班供應限制。
經濟飛
- 手提行李^：1件隨身物品 + 1件登機行李 (隨身物品必須放入前方座位下方及合計不超過7公斤)
- 寄艙行李：需要額外買
- 座位選擇：需要額外買
- 更改航班：任何日期/時間的更改須在原定航班出發前的48小時前進行，每次更改將收取HKD580的費用，另或需支付票價/稅項差額，並受預訂日期及航班供應限制。
隨心飛
- 手提行李^：1件隨身物品 (必須放入前方座位下方及不超過7公斤)
- 寄艙行李：1件20kg
- 座位選擇：需要額外買
- 更改航班：任何日期/時間的更改須在原定航班出發前的48小時前進行，每次更改將收取HKD580的費用，另或需支付票價/稅項差額，並受預訂日期及航班供應限制。
無憂飛
- 手提行李^：1件隨身物品 + 1件登機行李 (隨身物品必須放入前方座位下方及合計不超過7公斤)
- 寄艙行李：1件32kg
- 座位選擇：包免費揀位 (標準座位)
- 更改航班：任何日期/時間的更改須在原定航班出發前的48小時前進行，每次更改將收取HKD580的費用，另或需支付票價/稅項差額，並受預訂日期及航班供應限制。
*2024 年 5 月 8 日之前預訂，仍可享有航班原預訂的限額。
^ 隨身物品 = 例如小型手袋、手提電腦包、小型背包及相機袋不超過 40 (長) x 25 (寬) x 20 (高) 厘米; 登機行李=不超過 56 (長) x 36 (寬) x 23 (高) 厘米
HK Express 新票價價錢例子：
4種新票價，除咗行李數量/件數、座位同更改航班等有分別外，當然價錢都有分別，以飛東京為例子，價格分別為：
| HK Express 東京票價 (例子) | |||
| 輕便飛 (只包手提行李) | 經濟飛 (手提行李＋登機行李) | 隨心飛 (只包手提行李+20kg寄艙行李) | 無憂飛 (手提行李＋登機行李+32kg寄艙行李) |
| 單程$218 起 | 單程$268 起 | 單程$518 起 | 單程$698 起 |
HK Express 新票價重點
隨住HK Express 推出新票價模式，大家去旅行有更彈性選擇。去東南亞地區，例如泰國、越南及菲律賓或者快閃其他航點，可能未必要行李，帶少少衫就可以起行，「輕便飛」同「經濟飛」就最適合不過，拎個袋仔就飛得。最重要票價比較平，可以open-jaw玩幾個城市，唔少航點更加HK Express 獨家。
買最平「輕鬆飛」拎兩件衫快閃
如果一家大細去旅行，未必人人都需要行李，可以買最平嘅「輕便飛」就可以慳啲！最近Yen 跌得咁勁，唔少人都飛返幾轉東就掃下貨同食下IG人氣餐廳，甚至好似小編咁週末飛過去睇下演唱會，買最平既「輕鬆飛」就啱哂啦！特別係成日掛住日本嘅你，真係執2件衫就飛得！
血拼買「隨心飛」同「無憂飛」更化算
如果預咗會血拼嘅話，「隨心飛」同「無憂飛」比起之後加購寄艙行李平得多，提提大家其他票種係無得升級㗎！新票價想再加行李，可以係網上加購最多兩件，唔夠嘅話就要去checkin 櫃檯先可以再加！小編就私心希望之後用里數兌換HK Express 機票時，可以選擇埋4種唔同嘅票種啦！
不過新票價需留意手提行李重量、體積同件數限制，同其他廉航一樣，超過咗要俾超額行李費，每件係要HK$800㗎，唔想俾收加額費，都係買「無憂飛」啦！另外，隨身物品係新票價實施後，一定要放係櫈底。雖然變得更嚴謹，但可限制成日有人拎超額行李上機減慢登機時間，小編就覺得算係一件好事！不過實際執行上又會係點，就真係到時先知。
▼ HK Express
