今年係香港快運航空 (UO) 10周年嘅大日子。作為香港唯一嘅低成本航空公司,喺過去10年間香港快運帶大家飛往唔同亞洲國家去旅行。甚至唔少人可能同小編一樣,多得有UO 嘅平機票先可以第一次去日本自由行!係呢10年UO改變咗大家去旅行嘅模式同習慣,就等小編同大家回想下!
香港快運10週年|回顧香港快運點改變大家旅行模式航空陪大家飛過的十年|繼續一齊Gotta Go!
香港快運10週年喇!呢10年陪大家飛去唔同亞洲航點去旅行,仲改變咗大家去旅行嘅模式同習慣,一齊回想吓啦!
香港唯一本地低成本航空公司
有好多人都問同一個問題,香港快運只係成立咗10年咁短咋咩?當然佢地嘅歷史又點只10年咁短啊!10週年嘅計算係指香港快運轉型至低成本航空公司身分服務大家開始計!眨下眼香港快運就陪伴咗香港人咁多年!
低票價模式
以前乘坐傳統航空嘅去日本、韓國等地方嘅機票價格,對於旅行預算比較少又想成日去旅行嘅朋友嚟講算係非常奢侈。自從有低成本航空公司嘅出現,令唔少小資一族都可以成為旅遊達人!以香港快運為例,將寄艙行李及機上餐點等服務,改為按客人需要,彈性付費加購模式,將票價降低,想帶幾多行李、食咩嘢都可以自己話事!。票價更加係逐程計算,令大家可以用最平嘅方法自制Open-jaw (例如單係九州就可以做到福岡入,熊本/鹿兒島出等)。低票價模式最啱香港人,特別係工作壓力咁大,有時想週末快閃去旅行Relax下,平平地買張機票就可以!
多個直航及小眾獨家航點
除咗機票平之外,航點多更加係最大優勢!以日本為例,除咗香港人最常去嘅東京、名古屋同大阪之外,仲有小眾獨家航點如高松同鹿兒島等多個城市航點,涵蓋日本各大地區!而早前的發佈會上更加公佈計劃於2024年第1季開辦北京大興航線,積極拓展網絡。多得香港快運開辦呢啲航線,我哋先有咁多地方可以去旅行!
▼香港快運航線圖
放工去旅行
香港快運另一樣最啱香港人嘅特點,一定要數Red eye 航班,有唔少凌晨或半夜航班。成日都會見到同事帶埋行李返工,一收工就直奔機場,用盡每一分鐘去旅行,回程仲可以誇張到清晨落機,梳洗吓直接開工!對於旅行成癮同咩都計到盡嘅香港人,香港快運嘅Red eye 航班真係做福人群!
搶平機票
各地機票價格隨著需求回升咗,但香港快運 亦有Keep住唔少機票優惠活動,小編同大家一樣每次一有就去搶!不過回想起搶機票嘅熱潮可算是由佢帶起,過去 經常推出突發優惠及Mega Sale等搶機票活動,$0、$68、$88及買去程送回程等!小編好記得當年曾經試過搶到激平機票飛名古屋!當年更加有人話搶香港快運可能難過搶新手機!不過如果唔係多得呢啲優惠,小編都無諗過可以窮遊日本!
▼ 望到呢啲圖片,有無令大家回想起當年搶機票嘅日子?
Gotta Go!
今年年初,香港快運宣佈以新品牌定位「Gotta Go」,代表盡情去飛,除咗以新標誌、新制服、新客機形象示人,仲有不定時嘅超抵優惠,等大家可以想飛就飛!!雖然小編成日要早起身睇下有咩新優惠同出Post (真係有少少攰),但係有平機票可以去旅行,對大家都係一件好事!希望嚟緊嘅日子繼續可以去多啲旅行,搶多啲平機票,繼續Gotta Go!