香港航空 Hong Kong Airlines 近排好活躍，不停推出新優惠！除左有新航線福岡外，現有既大阪、東京、札幌線都有減！6月中前出發，每位$1,189 起 (連稅計大阪$2,197、東京$2,767、札幌$3,066)！以上價錢未包寄艙行李，加多一件20kg寄艙行李，來回加約$420！越嚟越多日本航線復飛/加開，唔知幾時放寬埋未打齊針入境要做PCR嘅政策呢？
瑞航優惠開賣到11月出發，大部份歐洲航點都有平！可以去歐洲/英國探朋友啦！瑞士航空飛歐洲意大利、西班牙、英國、德國等各大城市，來回連稅只係$3,045 起！其中飛倫敦連稅$3,712 起，不過留意呢個最平價未包寄艙行李架！
蒙古係一個較少香港人會去既地方，而蒙古航空MIAT復飛香港至烏蘭巴托航線，有多一個冷門地方可以玩啦！直航來回烏蘭巴托$3,333 (連稅$3,833)，之前一直賣梗既大時大節例如聖誕節、新年都無加價 (咁凍梗係啦)，宜家連下年夏天都有賣啦，我要住蒙古包！
好消息！AirAsia 將會係23年1月1號復航香港來往沙巴航線！初頭每日一班，之後4月增加至每日兩班！而家復航價來回連稅$1,562 起，價錢都算唔錯，重點係竟然農曆新年、復活節都有呢個價！旺季真係要快手搶，好快會加返價！