幾年無得去旅行，大家一定好掛住日本。日本開關後，相信好多人已經迫不及待買咗機票返鄉下。但係咁耐無去過，大家可能未必清楚東京有啲咩新景點，或者有咩地方已經結業。唔使擔心，小編為大家持續更新東京最新旅遊資訊，以及搜羅各個最新景點。如果唔記得咗由機場出發到市區嘅交通方法嘅話，可以參考成田機場交通攻略、羽田機場交通攻略，如果對迪士尼有興趣嘅話，亦可以睇下東京迪士尼2024活動整合。
目錄
交通資訊
【富士回遊號3月起加開班次】
好消息！富士回遊下年3月起新增班次！
JR東日本嘅特急「富士回遊號」，係由東京來往富士山嘅交通方法之一。近日JR東日本宣布，由2024年3月16日起，平日嘅往來班次會各增加一班，變成每天往返四趟！特急「富士回遊號」停車站包括新宿、立川、八王子、大月、都留文科大學前、下吉田、富士山、富士急Highland、河口湖。之後去富士山又更方便啦～
景點資訊
【古式神道櫻神宮櫻花款式御朱印】
每年櫻花季，古式神道櫻神宮都會推出期間限定嘅櫻花款式御朱印，今年2月就推出咗兩款御朱印，以櫻花粉紅色為主調，設計好靚啊！唔知3月嘅款式會係點呢？另外，古式神道櫻神宮嘅蕾絲御守亦非常出名，不過因為無貨，4月1日起先會重新開始發售。 近日官方發佈咗唔少圖片，見到櫻神宮內已經開滿河津櫻花，係賞櫻嘅好地方！大家更可以以500日圓 (約$26) 購入粉紅色絲帶，寫上自己嘅願望後綁喺櫻花樹上！古式神道櫻神宮位於東京世田谷區櫻新町，最方便就係由澀谷乘坐東急田園都市線至櫻新町站落車。
古式神道櫻神宮
- 地址： 東京都世田谷区新町3-21-3 (地圖)
- 開放時間：9am – 5pm
- 電話：+81 334290869
- 古式神道櫻神宮官方網站
【teamLab Borderless重新開幕｜門票已開始發售】
台場嘅teamLab Borderless於2022年8月關閉，好消息係今年2月9日佢將會喺「麻布台之丘」(麻布台ヒルズ) 重新開幕！今次將會展示teamLab兩件全新作品《Bubble Universe》、《Megalith Crystal Formation》。門票已經喺Klook發售，如果想開幕即刻去玩，就快啲去買定飛先啦！
【河津櫻花祭｜2月就有得賞櫻花】
河津町觀光協會宣布，今年嘅「河津櫻花祭」將會喺2月1日至29日舉行，每晚6點至8點仲會進行點燈！河津櫻源自靜岡縣伊豆半島河津地區，最大特色係2月上旬已經開始綻放，比日本多數地方嘅櫻花花期早足足約一個月！避開3、4月嘅賞櫻旺季人潮～ 好多人都話非常值得去！喺河津地區有8,000棵櫻花樹，開花嘅時候周圍都變成一片粉紅色，沿路嘅小食攤檔仲會販賣櫻花鯛魚燒、櫻花雪糕，少女心爆發！由東京出發，乘坐踴子號列車 (踊り子) 約2小時30分鐘就可直達河津。
【寵物小精靈樂園PokéPark KANTO】
寵物小精靈官方宣布，即將與讀賣樂園及讀賣新聞東京總部合資成立新公司，並會喺讀賣樂園入面設置以寵物小精靈為主題嘅「PokéPark KANTO」主題樂園！ 讀賣樂園係東京都內最大嘅遊樂園，由新宿出發只需約35分鐘車程，最出名嘅就係被稱為關東最大嘅燈飾表演。
相信寵物小精靈fans聽到呢個消息都好開心！不過官方目前未公佈樂園會喺幾時落成，可能大家要再等下啦！
【全球首間芝麻街官方專門店】
全球第一間芝麻街官方專門店「SESAME STREET MARKET」，即將於11月30日喺東京池袋Sunshine City開幕！ 呢度集商店、主題Cafe、工作坊於一身，商店區將售賣多個角色嘅周邊商品，包括衣服、公仔、文具、餐具，而主題Cafe就有芝麻街造型冬甩、香蕉船、新地雪糕杯、Pizza等等。官方仲未公佈工作坊會有咩活動，不過有咁多嘢睇，芝麻街fans去到一定唔捨得走啊！
SESAME STREET MARKET 池袋Sunshine City
- 地址：東京都豊島区東池袋3-1 サンシャインシティ専門店街アルパ1階 (地圖)
- 營業時間：早上10點 – 晚上9點
- 電話：+81 03-5810-3664
- SESAME STREET MARKET官方網站
【植物園「HANA・BIYORI」和風點燈】
燈飾就睇得多，咁日本風嘅點燈你又見過未？
由東京讀賣樂園打造嘅植物園「HANA・BIYORI」，今個冬季將會舉辦和風點燈「HANA・BIYORI×竹燈『HANA燈』」。活動日期由即日起至2024年2月25日，點燈時間係每日下午4點至晚上8點。因為係植物園，所以呢度嘅燈飾以竹子為主角，將園內嘅植物同燈光結合。活動另一個焦點就係和傘點燈裝置，遊客更加可以事先喺園區嘅商店內租借提燈、和傘等道具，非常有特色啊！
HANA・BIYORI
- 地址：東京都稲城市矢野口4015-1 (地圖)
- 營業時間
- 電話：+81-044-966-8717
- HANA・BIYORI官方網站
【多啦A夢主題關東三大燈飾】
多啦A夢燈飾好靚啊！
位於神奈川縣嘅相模湖燈光展，被選為關東三大燈飾之一。今年將會聯乘多啦A夢舉辦「多啦A夢電影大雄之地球交響樂燈飾」！一入門口，已經可以見到多啦A夢、大雄、靜香、胖虎和小夫化身樂手嘅燈飾 。相模湖燈光展最有代表性嘅250米彩虹纜車，都會加入多啦A夢彩燈元素。一路坐纜車，一路欣賞咁靚嘅燈飾！活動日期由11月3日至2024年5月12日，就算最近未得閒去都唔緊要！
【虎之門全新商場開幕】
位於東京地下鐵日比谷線「虎之門HILLS站」嘅虎之門Hills Station Tower喺10月6日開幕啦！虎之門Hills Station Tower係一座綜合大樓，地面樓高49層，而地下就有4層。地下2樓至地上7樓係shopping、飲食區域，將會有70間品商舖進駐，包括擁有多個時裝品牌嘅SELECT by BAYCREW’S (セレクト バイ ベイクルーズ)，以及地下美食街「T-Market」、大型美食市場「虎之門橫丁」。而頂層嘅「TOKYO NODE GALLERY」會舉辦唔同展覽，例如12月就有蜷川実花展覽。呢度透過使用最新科技如AR、VR 等設備，令展覽空間呈現更多可能性！ 去東京又多一個地方可以行啦！
虎之門Hills Station Tower
-
- 地址：東京都港区虎ノ門二丁目6番1号 (地圖)
- 營業時間：餐廳及咖啡店 早上11點 – 晚上11點；商舖 早上11點 – 晚上9點；T-Market 早上7點 – 晚上11點；TOKYO NODE 早上10點 – 晚上8點
- 虎之門Hills Station Tower官方網站
【大型遊戲中心GiGO池袋店重開】
時隔兩年，全東京最大嘅大型遊戲中心GiGO總本店終於重開！地點同以前一樣，位於池袋Sunshine60通，一共有四層樓高，裡面有佔據成層嘅夾公仔機，景品種類非常豐富！仲有18部貼紙相機、各式各樣嘅音樂遊戲機、跳舞機、卡片遊戲機。去池袋一定要預留多啲時間去玩先得！
GiGO
【羽田新商場11月開幕】
羽田最新商場Haneda Innovation City將於11月16日正式開幕！呢個商場位於天空橋車站，距離羽田機場只有一個站！園區內將會包括藝術活動場地、文化體驗設施、美食購物、酒店等，仲有露天足湯可以浸！之後如果早咗到機場，又多一個地方可以最後衝刺shopping！
Haneda Innovation City
【澀谷新商場首間情熱價格專門店】
東京又有新嘅好去處！位於澀谷嘅「道玄坂通 dogenzaka-dori」近日開幕啦！呢個新商場距離澀谷站只需5分鐘步程，1至2樓係商店、餐廳，2至10樓係辦公室，而11至28樓就係全日本第四間Hotel Indigo！商場嘅商店包括猿田彥咖啡、初次進軍日本嘅漢堡店「Lil Woody’s 」、台灣飲料店「貢茶」、麵包店「THE CITY BAKERY」等等，當中最受觸目嘅一定係DONKI第一家情熱價格專門店「DOMISE」裡面挑選咗情熱價格系列以及原創商品，有足足3,200種以上嘅零食、手信、日用品，大家以後去東京記得去掃平貨啊！
【SHIBUYA TSUTAYA10月31日起全座翻新】
位於東京澀谷十字路口嘅SHIBUYA TSUTAYA，將於2023年10月31日起全座進行維修翻新工程，預計會喺2024年春天重新開幕！如果呢段期間會去東京嘅話，就暫時無得行SHIBUYA TSUTAYA啦！SHIBUYA TSUTAYA於1999年開業，係影碟、唱片、漫畫、遊戲嘅集中地，仲係澀谷非常有代表性嘅地標。新嘅SHIBUYA TSUTAYA將會提供更多新嘅活動、設有500個座位嘅咖啡店以及休息空間！
【魔法文學館——以《魔女宅急便》作者角野榮子作品為主題】
吉卜力粉絲注意！呢個名為「魔法文學館」嘅兒童文學館，位於東京都江戸川區なぎさ公園內，以《魔女宅急便》作者角野榮子作品嘅世界觀為靈感，預計於2023年11月3日正式開幕！文學館外觀由日本知名建築師隈研吾設計，以純白色搭配花瓣外型嘅屋頂，配上粉紅色作為點綴，好似童話故事裡面森林中嘅夢幻小屋！而內部就由角野榮子女兒兼藝術家くぼしまりお擔任監製，用角野榮子最鍾意嘅草莓色為主調。角野榮子係兒童文學作家，曾獲得國際安徒生文學獎作家獎。呢個文學館館內收藏將近一萬本童書，全部由角野榮子親自挑選，希望透過呢啲無論係小孩、大人都會鍾意嘅故事，令所有人都可以享受閱讀樂趣！睇黎好適合帶小朋友一齊去，大人去都可以去打卡！
魔法文學館
【Anitouch AQUA CiTY御台場】
台場有新嘅好去處！由伊豆仙人掌動物園營運嘅室內動物園「Anitouch」台場店於7月20日開幕，場內有多達15種小動物，包括水豚、樹懶、環尾狐猴、刺蝟、天竺鼠、鸚鵡、鴨仔等等。客人可以近距離接觸呢啲小動物，好療癒啊！亦可以帶埋小朋友一齊黎，培養佢地對動物嘅愛心。成日門票平日1,500日圓 (約$84)，星期六、日、公眾假期1,800日圓 (約$101)，只要購買咗門票，當日營業時間內任玩，無時間限制！好抵玩啊！
Anitouch AQUA CiTY御台場
- 地址： 東京都港区台場一丁目7番1号 アクアシティお台場3階 (地圖)
- Anitouch AQUA CiTY御台場官方網站
【東京最大夾公仔機店開幕】
夾公仔迷注意！東京最大夾公仔機店開幕啦！
近日開幕嘅「エブリデイ多摩ノ国」，係目前全東京規模最大嘅夾公仔機店，開設於多摩市商場「Cross Garden Tama」，一共有超過400部夾公仔機。當中一大賣點就係5日圓 (約$0.3) 一次嘅夾糖機，仲有100日圓 (約$6) 可以玩八次嘅夾粟米通機！除咗一般常見嘅零食、公仔、模型之外，呢度仲有得夾蔬果，連南瓜都有！
就算唔擅長夾公仔都唔緊要，因為部分夾公仔機設有積分券，就算夾唔到公仔，都可以透過收集積分券，去換領部換禮物，有得換食品、家居用品、玩具等等，唔驚空手而回，都幾貼心啊！
エブリデイ多摩ノ国
- 地址：日本東京都多摩市落合2丁目33 クロスガーデン多摩 2/F (地圖)
- 電話： +81 04-2355-2525
- 「エブリデイ多摩ノ国」官方網站
【一日門票於23年10月起加價】
東京迪士尼將於10月起加價，開業40年以來，一日票首次突破10,000日圓！
東京迪士尼採用「變動價格制」，根據平日/假日、淡季/旺季等因素決定當日嘅票價，現時一日成人門票嘅價格區間分別係7,900日圓 (約$431)、8,400日圓 (約$459)、8,900日圓 (約$486)、9,400日圓 (約$513)。而喺今年10月起，將會新增9,900日圓 (約$540) 以及10,900日圓 (約$595) 票價。換句話說，最平嘅日子依然係7,900日圓，但係最貴嘅日子就會升到10,900日圓。
不過就算加價後，東京迪士尼最貴嘅門票都仲係平過香港迪士尼 (現時香港迪士尼普通日子成人門票為$639，特定高峰日子門票為$759)，所以今次加價應該無阻大家去東京迪士尼嘅意欲嘅？如果想知道東京迪士尼最新資訊，仲可以睇埋東京迪士尼攻略！
【池袋Sunshine City展望台重開】
東京池袋Sunshine City嘅展望台重開啦！以後多個地方可以睇風景hea下～
去年結業嘅池袋「太陽城Sunshine City展望台」，經過半年裝修後，正式改名為「Sunshine60展望台展望公園」，而且已經重新開放！呢個展望台位於60樓，視野非常好，裡面更加充滿植物元素，簡直好似置身於空中綠洲咁！想像下坐喺度欣賞東京嘅景色，一定好chill好療癒！展望公園分為三個部分，分別係展望之丘、活動展區、Cafe。場內更設有嬰兒區、哺乳室，帶埋小朋友黎都得！
「Sunshine60展望台展望公園」
- 地址： 東京都豊島区東池袋3丁目1 サンシャインシティ サンシャイン60ビル 60Ｆ (地圖)
- 開放時間：早上11點 – 晚上9點 (最後入場時間晚上8點)
- 電話：+81 03-3989-3457
- 「Sunshine60展望台展望公園」官方網站
【東京哈利波特影城6月16日開幕】
召集哈利波特fans！東京哈利波特影城宣布將於6月16日正式開幕！小編已經幫大家整理咗東京哈利波特影城攻略！
今日東京哈利波特影城舉辦發佈會，宣布影城將於6月16日開幕，成人一日入場券價錢為6,300日圓 (約$368)。門票將於3月22日起，香港時間下午1時於網上預約。暫時門票只會於網上預售，不設現場售票。東京哈利波特影城位於練馬區，佔地近9萬平方公尺，係繼倫敦後全球第二座哈利波特影城。同倫敦嘅一樣，呢度會展示電影場景、戲服、道具，仲會有互動設施，俾遊客體驗魔法之旅。哈利波特fans以後想朝聖，唔使去到倫敦咁遠，去東京都得！
東京哈利波特影城
- 地址： 東京都練馬区春日町1-1-7 (地圖)
- 東京哈利波特影城官方網站
【新宿東急歌舞伎町】
東京新宿4月有新嘅地標開幕！ 入面將會包含各種娛樂設施！位於新宿嘅東急歌舞伎町TOWER樓高48層，入面有酒店、戲院、劇場、餐廳、互動遊戲等娛樂設施，應有盡有。
最近官方就公布咗部分樓層嘅主題。一樓以餐廳為主，仲會有「和牛特區」使用嚴選日本國產黑毛和牛，提供漢堡、和牛料理； 二樓係以祭典為主題嘅餐飲美食空間，包括多國料理，夜晚更加會有表演，非常特別！至於娛樂方面，三樓係「namco TOKYO」，而四樓將會係名為「THE TOKYO MATRIX」嘅地牢攻略體驗設施。 之後會去東京旅行嘅話又多一個地方可以玩啦！
東急歌舞伎町TOWER
- 地址：東京都新宿区歌舞伎町一丁目29番1号 (地圖)
- 東急歌舞伎町TOWER官方網站
【澀谷東急百貨本店結業】
東急百貨本店屹立東京澀谷半個世紀，終於喺1月31日正式結業。喺無得去旅行嘅過去幾年，唔少日本歷史悠久嘅百貨公司都結束營業，相信好多人都黎唔切同佢哋講再見。最近日本又有一間百貨正式結業，就係屹立澀谷55年嘅東急百貨本店。為咗配合發展，其實近年東京鬧區，好似原宿、澀谷，都有多幢建築物計劃拆卸重建，東急百貨本店亦都因此而步入歷史。
東急百貨本店拆卸後將會興建一棟高36層嘅綜合設施，預計喺2027年竣工，計劃下層為商場，中層為豪華酒店，上層為豪華住宅。雖然知道為咗與時並進，拆卸舊建築係在所難免，不過見到又一東京地標消失，都係會覺得唔捨得。
【羽田機場「HANEDA AIRPORT GARDEN」】
大家有無試過搭早機到咗機場之後唔知有咩做呢？日本羽田機場有一個新嘅複合式商業設施即將開幕，到時就唔怕無地方行啦！ 呢個可以直達羽田機場第3航廈嘅「HANEDA AIRPORT GARDEN」喺2023年1月全面營業，入面唔止有商場，仲會有兩間酒店同埋溫泉。呢兩間酒店分別係「VILLA FONTAINE PREMIER 羽田機場」、「VILLA FONTAINE GRAND 羽田機場」，總共有1,717間客房，係日本最大嘅機場酒店！
「泉天空之湯 羽田機場」係機場酒店嘅露天溫泉，有天然溫泉、碳酸泉、按摩池等等設備可以選擇，呢間溫泉係24小時營業，都係1月21號日就會開幕，無論酒店住客定係一般旅客都可以使用。有咁多設施，以後去到羽田機場唔驚無野做啦！
▼飛東京羽田機場必睇✈️直擊羽田機場花園開幕日🎉｜一次過買手信、食名店、浸溫泉♨️｜直通巴士可以去邊？🚌
HANEDA AIRPORT GARDEN
- 地址：東京都大田区羽田空港2丁目7 − 1羽田エアポートガーデン 2階 (地圖)
- 電話：+81 570-033-577
- HANEDA AIRPORT GARDEN官方網站
相關優惠：日本東京新酒店推介｜澀谷型格新酒店及國際品牌酒店｜附詳細介紹及預訂網址
【新宿Shibuya Sky】
位於Shibuya Scramble Square嘅Shibuya Sky觀景台係最近非常之流行嘅打卡點！相信好多人已經去過晴空塔打卡，有別於晴空塔，Shibuya Sky觀景台開放露天區域，所以影相嗰陣無玻璃阻隔，影出嚟都靚啲。如果喺日落前1個鐘抵達觀景台，仲可以一次過睇到日間、黃昏、夜景三種景色。個景咁靚，唔怪之得連嵐嘅「Turning Up」MV都喺呢度取景啦！
Shibuya Sky
- 地址： 東京都渋谷区渋谷2丁目24 − 12, Shibuya Scramble Square (地圖)
- 電話：+81 342-210-229
- Shibuya Sky官方網站
【無印良品板橋南町22新分店】
MUJI迷注意！ 東京有新分店開幕啦！呢間叫做「無印良品 板橋南町22」嘅新鋪足足有4層高，係關東地區入面最大嘅無印良品街鋪。最特別嘅係洗頭水、清潔劑、水果乾等等嘅貨品係可以按照需要斷秤購買，咁就唔怕買得太多用唔晒啦。
雖然呢間分店嘅地理位置唔算太方便，不過因為鋪頭外面設有24小時服務嘅商品提取櫃，而且仲係全日本唯一一間有「停車場提貨服務」嘅無印良品，所以都幾適合揸車嘅朋友去。MUJI Fans記住要去朝聖啦！
無印良品板橋南町22分店
【池袋TOKYU HANDS舊址：NITORI家品店】
池袋TOKYU HANDS於2021年結業後，日本家品店NITORI（ニトリ）喺22年11月18日正式進駐TOKYU HANDS舊址！ 新鋪一共有8層，面積約5980平方米，將會係新宿、渋谷、池袋入面最大嘅分店。1樓至5樓主要售賣家品，6至8樓就會售賣大型傢俱。
NITORI係創立於1972年嘅日本著名家具連鎖品牌，主打低價格高品質嘅家居精品，販賣嘅貨品種類由大型傢俬如床架、梳化，到廚房用品如餐具、平底鍋都有，係深受日本人喜愛嘅家品店。 雖然好可惜池袋TOKYU HANDS已經結業，但係希望嚟緊嘅NITORI會成為池袋嘅新地標啦！
NITORI池袋分店
酒店資訊
【新酒店Tokyo DisneySea Fantasy Springs Hotel 24年6月開幕】
東京迪士尼下年會有新酒店啊！
隨著東京迪士尼海洋新園區「Fantasy Springs」即將於2024年春天開幕，日本迪士尼宣佈，新酒店「Tokyo DisneySea Fantasy Springs Hotel」亦會喺2024年6月6日開始營業！新酒店有9層高，位於「Fantasy Springs」園區內，一共有475間客房。房間內嘅牆紙、花卉圖案設計靈感來自《魔髮奇緣》、《小鹿斑比》等迪士尼電影作品。酒店將於2024年2月8日起開放預約，如果有興趣入住，記得mark低呢個日期！呢度可以睇更多東京迪士尼最新資訊！
【東京巨蛋飯店Sanrio主題房】
東京巨蛋飯店 (Tokyo Dome Hotel) 將會同Sanrio合作，推出以My Melody、Kuromi為主題嘅限定房間！房間裝修以Melody嘅粉紅色以及Kuromi嘅紫色為主調，仲有角色嘅壁紙、裝飾，超夢幻！另外，入住仲有限定商品，包括公仔、迷你手提包及收納袋。如果想住嘅話，9月1日就可以喺東京巨蛋飯店官網預約！入住期間由10月1日開始！
東京巨蛋飯店
- 地址：東京都文京區後樂1-3-61 (地圖)
- 電話：+81 03-5805-2111
- 東京巨蛋飯店官方網站
餐廳資訊
【Mister Donut櫻花麻糬冬甩】
櫻花季即將開始，日本Mister Donut都再度推出應節嘅冬甩，四款櫻花麻糬冬甩代表櫻花開花嘅四個階段，分別係「花蕾」、「半開」、「滿開」、以及今年新增嘅「櫻花飄舞」，由2月28日開始發售，去到3月下旬。每年都大受歡迎嘅櫻花麻糬冬甩口感煙韌，「花蕾」撒上國產大豆製成嘅黃豆粉，「半開」採用新鮮嘅櫻花豆沙製成，「滿開」就以櫻花豆沙配上車厘子味巧克力碎，「櫻花飄舞」使用北海道產嘅紅豆沙配上白朱古力、車厘子味巧克力碎。如果拎住去賞櫻花打卡一定好有feel！
Mister Donut
【期間限定Zootopia主題Cafe】
Zootopia主題Cafe將於東京原宿登場！呢次「BUNNY BEST FRIEND」活動以電影中Judy、Nick之間嘅友情為主題，日期由2月23日至4月7日。餐點有Judy三文治、Nick咖喱飯、紅蘿蔔三文治、奶昔等，另外仲會販賣限定周邊商品，例如杯、杯墊、刀叉、Tote bag。鍾意Zootopia嘅朋友一定唔可以錯過！座位都幾搶手，想去嘅話就要快啲喺官網預約！事先預約到時候仲可以獲得隨機小卡～
【Mister Donut x GODIVA】
朱古力控注意！$17就食到GODIVA冬甩！
日本Mister Donut同GODIVA合作，推出四款冬甩，包括焦糖朱古力冬甩、堅果朱古力冬甩、朱古力Ganache冬甩、朱古力國王批。頭三款冬甩堂食324日圓 (約$17)、拎走330日圓 ($18)，而朱古力國王批堂食356日圓 (約$19)、拎走363日圓 (約$20)。四個款式都已經喺全日本Mister Donut門市發售。$20內就食到GODIVA，最近去日本嘅話一定要試下先得！
Mister Donut
【LAWSON士多啤梨季開始】
士多啤梨控注意！
日本LAWSON便利店士多啤梨季開始，推出18款同「ICHIBIKO」合作嘅士多啤梨商品，由即日起已經開始發售！當中最受觸目嘅就係士多啤梨牛奶雪糕 (180日圓 約$10)、士多啤梨牛奶 (248日圓 約$13)、士多啤梨牛奶三文治 (462日圓 約$25)等等。「ICHIBIKO」係日本超人氣嘅士多啤梨甜品專門店，今次同LAWSON合作，唔係好貴嘅價錢就可以食到呢啲甜品，好想每樣都試下啊～
【日本麥當勞焦糖奶油批、比利時朱古力批】
繼之前好評如潮嘅燉牛肉批、朱古力三角批，日本麥當勞再推出焦糖奶油批、比利時朱古力批！將會喺1月10日起發售。焦糖奶油批混入奶油餅乾，咬落去即刻散發濃濃嘅奶油香氣，而比利時朱古力批使用比利時黑朱古力內餡，帶出微微苦澀嘅口感。兩款批嘅售價為210日圓 (約$11)，經過麥當勞嘅話不妨試下！
【日本麥當勞士多啤梨三角批、燉牛肉批】
冬天最適合就係食暖笠笠嘅批！
日本麥當勞最近推出兩款新批，分別係士多啤梨三角批、燉牛肉批！士多啤梨三角批內餡使用超濃郁嘅士多啤梨巧克力奶油，加上超可愛嘅貓貓粉紅色包裝。而燉牛肉批係日本麥當勞超人氣商品，已經連續兩年秋冬回歸登場，以牛肉、薯仔、紅蘿蔔等食材燉煮嘅香濃內餡，配上金黃酥脆嘅外皮，一食落去全身都暖笠笠～呢兩款批都係秋冬期間限定，士多啤梨三角批已經開始發售，售價為180日圓 (約$9)，而燉牛肉批就會喺12月6日起發售，售價為220日圓 (約$12)，最近會去日本嘅話一定要試啊！
【角落生物期間限定Cafe】
為咗慶祝角落生物第三部動畫電影即將上映，東京、大阪、名古屋都將會有期間限定主題Cafe！餐點以角落生物角色為主題，全部都好得意啊！好適合帶埋小朋友去！不過每個地方嘅開始、結束日期都唔同，大家要留意～ 如果打算去嘅話，可以事先喺官網預約！
BOX cafe&space 東京ソラマチ店
- 地址：東京都墨田区押上1-1-2 東京スカイツリータウン‧ソラマチ イーストヤード1階8番地
(地圖) - 日期：2023年11月2日 至 2024年1月8日
- 營業時間：上午10點 – 晚上9點50分
- 官方網站預約
【McDonald’s超人氣三角朱古力批回歸】
日本McDonald’s嘅超人氣秋季限定甜品，三角朱古力批於10月11日起回歸！今年除咗經典嘅黑朱古力味 (售價160日圓，約$8)，仲新增咗牛奶焦糖味 (售價180日圓，約$9)。呢款三角朱古力批已經發售超過10年，獲得大量網民好評，可以話係日本McDonald’s嘅秋季定番商品！大家最近會去日本嘅話，一定要買個黎食下！
McDonald’s
【咒術迴戰《澀谷事變篇》Cafe】
最近咒術迴戰《澀谷事變篇》熱播中，官方繼《懷玉．玉折篇》後再度推出期間限定Cafe！今次嘅餐點以六大角色為主題，包括五條悟獄門疆Tiramisu、「夏油傑」咒靈球芭菲、虎杖悠仁手指熱狗、伏黑惠薑汁雞肉炒飯、釘崎野薔薇薔薇散壽司、七海建人焦糖香蕉鬆餅，每款餐點都包含角色元素。
東京、大阪、名古屋都有Cafe，而東京嘅兩間分店仲位於澀谷！咒術fans去澀谷朝聖嗰陣，記得去埋Cafe啊！不過每個地方嘅開始、結束日期都唔同，大家要留意～ 因為座位通常都好搶手，小編提提大家最好事先喺官網預約！
BOX cafe&space GEMS渋谷店
BOX cafe&space SHIBUYA109渋谷店
【安妮亞 x 咚兵衛腐皮烏冬】
WakuWaku！安妮亞 x 咚兵衛好可愛啊！
日清咚兵衛系列一向好受歡迎，當中嘅腐皮烏冬相信唔少人都食過。為咗迎接《劇場版 SPY×FAMILY CODE: White》即將上映，咚兵衛一共推出3款安妮亞包裝杯麵，分別係腐皮烏冬、天婦羅蕎麥麵、日清炒麵U.F.O.，全部都印有安妮亞喺上面！最特別嘅係安妮亞頭上嘅角仲變成腐皮，超得意！暫時未知道香港會唔會發售呢幾款杯麵，如果大家想收藏嘅話，去日本嘅時候記得順便入貨！
【澀谷FamilyMart酒吧】
便利店裡面竟然有酒吧？近日日本FamilyMart便利店同連鎖酒吧品牌「酒的美術館」合作，於東京澀谷明治通分店開設「便利店酒吧」，即日起已經開始營業！店內販售多種稀有威士忌老酒、白蘭地等，而且只需500日圓起，價錢親民！大家仲可以先喺FamilyMart購買零食，再帶入酒吧裡面搭配各款飲品享用！最特別嘅係，「酒的美術館」仲推出一款「FamilyMart炸雞專屬Highball」，俾大家食炸雞嘅時候品嚐！鍾意飲酒嘅你一定要去呢間FamilyMart分店睇下啦！
東京澀谷明治通FamilyMart
【Pokémon Cafe比卡超咖喱飯】
Pokémon fans去日本必訪嘅Pokémon Cafe將於9月2日起推出新餐點，係以比卡超為造型嘅咖喱飯！餐盤上唔止有好可愛嘅皮卡超，仲可以選擇小火龍雞扒、車厘龜海鮮烤焗或者奇妙種子薯仔沙律嘅造型配菜。另外，仲有全新嘅比卡超檸檬特飲，底部放入椰果及紅茶果凍，再配上芒果雪糕、蘇打水，打造皮卡超配色。Pokémon Cafe喺東京、大阪都有分店，fans一定要去試下🥹
Pokémon Cafe東京日本橋分店
- 地址： 東京都中央区日本橋二丁目11番2号 日本橋髙島屋S.C.東館5階 (地圖)
- 營業時間：早上10點30分 – 晚上10點 (須預先預約)
- 電話：+81-3-6262-3439
- Pokémon Cafe 官方網站
【原宿只有熊店員的咖啡店】
一個人類都無，只有熊店員嘅咖啡店？
東京原宿有一間話題咖啡店，舖頭名叫做「ANAKUMA CAFE」，日文意思就係「洞穴裡面嘅熊」！而呢間咖啡店嘅特色，就係所有店員都係熊！喺門口嘅自助點餐機點餐後，就可以去店內牆上嘅洞旁邊等待，之後就會有熊店員伸出熊掌，喺洞內拎餐點俾你。呢度一共有7隻熊店員，官網更加有佢哋嘅介紹。熊店員全部都好熱情，就算淨係得隻熊掌，都好樂於同顧客互動！咁特別嘅咖啡店，下次去東京一定要試下！
ANAKUMA CAFE
- 地址：東京都渋谷区神宮前1-23-28 (地圖)
- 電話：+81-3-6447-0720
- 營業時間：早上11點 – 晚上9點
- ANAKUMA CAFE官方網站
【FamilyMart x GODIVA沙冰】
$24就可以飲到超濃嘅GODIVA朱古力沙冰！日本FamilyMart聯乘GODIVA推出朱古力沙冰，由即日起再度發售，每杯只需450日圓 (約$24)！呢款由GODIVA監修嘅朱古力沙冰喺2021年開始於FamilyMart發售，每次推出都大獲好評，今次更加係首次加入杏仁碎增添口感，可可用量比起上年亦有所增加，令朱古力濃度倍增！暫時未知道今次會賣到幾時，如果呢排去日本嘅話大家可以去FamilyMart望下。呢款朱古力沙冰喺FamilyMart嘅雪櫃入面，付款後可以打開包裝，自行喺店內嘅牛奶機加入牛奶，非常方便！
【吉野家首間韓式料理店】
日本吉野家推出首間韓式料理店，全日本只有一間！日本吉野家於埼玉縣開設新型態店「かるびのとりこ」，除咗有牛肉丼外，仲有韓式料理豆腐鍋、冷麵等等。價格係平民路線，唔少日本人都話CP值高，係「日式嘅韓國風味」！目前全日本只有埼玉縣一間分店，希望之後會越開越多啦！
かるびのとりこ
- 地址：埼玉県幸手市上高野2071 (地圖)
- 電話：+81 04-8044-9929
- 營業時間：早上10點 – 晚上10點
- 「かるびのとりこ」官方網站
【築地市場超人氣意粉】
去築地市場竟然係食意粉？
雖然築地嘅場內市場喺2016年已經搬遷到豐洲，但係佢嘅場外市場其實一直仲喺度，而且遊客仍然係絡繹不絕！今次就為大家介紹2023年必食嘅築地市場美食——田所食品！ 田所食品係一間IG爆紅嘅56年魚卵專門店。喺IG search #田所食品 都見到好多人專程去食。佢哋嘅明太子意粉非常出名，下次去築地一定要試下！
即刻睇下特派員現場直擊2023年築地現況，仲有20間築地美食推介！除咗一定要食嘅魚生、海鮮丼之外🍣，而家日本妹竟然興去築地食意粉？😂今次就有日本菇菇菇 @JAPANGoGoGo3 同大家去行曬成個築地嘅場外市場！
田所食品
- 地址：東京都 中央区 築地 4-9-11 (地圖)
- 電話：+81 3-3541-7754
- 營業時間：早上6點 – 下午2點 (逢星期日休息)
- 田所食品Facebook
相關優惠：關西新酒店推介｜日本首間W酒店！環球影城全新官方酒店｜大阪、奈良、京都新酒店
【行走的餐廳——52席的至福】
火車平時只係普通嘅交通工具，但係喺日本，佢仲可以係一架移動嘅餐廳！ 日本唔少鐵路公司都推出結合觀光同埋美食嘅特色列車，吸引唔少熱愛鐵路旅行嘅遊客。不過可惜好多都需要使用日本電話號碼或者日本信用卡先可以報名，唔太方便海外遊客。小編今次就搵到一款對海外遊客比較user-friendly嘅，就係西武鐵道餐廳列車「52席的至福」！
呢架列車由日本知名建築師隈研吾設計外觀、內裝，打造優雅嘅用餐空間並且提供米芝蓮級數美食，喺東京市區同埋東京近郊「秩父」之間穿梭，車程大概2小時30分鐘。 叫做「52席的至福」係因為佢只提供52個座位，列車分為四節車廂，當中有一節係開放式廚房，可以睇到大廚烹飪嘅過程。喺火車上面享受美食同埋美景，相信會係一個特別嘅體驗！😙
52席的至福
【日劇《silent》拍攝地Cafe】
有留意開日劇嘅朋友仔應該唔會對《silent》呢套劇陌生啦！唔知大家有無發現劇入面有一間出現率幾高嘅cafe呢？原來呢間位於東京目黑區嘅鋪頭叫做「ANEA CAFE松見坂」，本身已經係小有名氣嘅咖啡店，喺《silent》播出之後更加係一夜爆紅，可以話係一位難求！ 因為個個都想喺劇中主角坐嘅位置打卡，所以店家特別將呢個座位變成預約制。聽講呢間鋪嘅人氣高到每逢週末都會大排長龍，就算只係想坐其他普通座位都要排一個鐘以上，Fans們如果想去打卡記得預留時間啦！
ANEA CAFE松見坂
- 地址：東京都目黒区駒場1丁目16 – 7 エマーレ駒場 1F (地圖)
- 電話：+81 368-049-209
- ANEA CAFE松見坂官方網站
交通資訊
【日本JR東海新增1.5倍闊座位】
日本JR東海推出名為「S WorkP座位」(S WorkPシート) 嘅新座位，即係喺原本嘅三連座中間放一塊隔開，改裝成二人座位，變相每人有1.5個位，令空間增加。除咗空間闊落咗之外，呢款座位仲設有飲品架，前方亦有摺疊式斜檯，以便乘客使用手提電腦。
由10月20日起，「S WorkP座位」將由原本嘅「のぞみNozomi」列車擴闊至JR東海與JR西日本路線嘅「ひかりHikari」及「こだまKodama」列車。如果想坐到呢款座位，每人要額外俾多1,200日圓 (約$63)。唔少日本人都話呢個新服務好好，好值得加錢！唔知大家又會唔會買呢？
疫情資訊
【日本4月29日起取消3針疫苗證明】
根據日本媒體TBS，隨著日本將於5月8日將新冠病毒傳染病嘅防疫級別下調至第5類，日本亦宣布由4月29日起，入境日本的人士毋須出示新冠疫苗接種證明或檢測無確診證明。至於入境時有疑似新冠症狀嘅人，需在抵埗時進行檢測，一旦確診需要到指定的住宿設施接受治療。不過記住仍然要整Visit Japan Web！
【日本解除口罩令】
日本由今日起正式解除口罩令，無論室內或室外，都由民眾自行判斷是否佩戴口罩。JR東日本早前亦宣布，乘搭電車時無需再戴口罩，並會取消提醒乘客佩戴口罩嘅廣播。
不過有日媒做嘅網絡民調就顯示，有超過一半嘅民眾會繼續戴口罩。其實因為花粉症嚴重，喺疫情前好多日本人本身已經有戴口罩嘅習慣，所以相信即使宜家解除咗口罩令，喺日本街頭唔戴口罩嘅人數都唔會大幅上升。唔知大家去日本玩嘅時候又會唔會繼續戴口罩呢？
除咗以上景點之外，仲有其他東京最新資訊、攻略，即刻去睇片先！
▼🇯🇵體驗日本式新年拜神「初詣」㊗️ ｜東京明治神宮最佳參拜路線🚶♀️｜參拜禮儀指南🙏｜新年屋台街🍢
▼新宿最新一日遊懶人包2022🇯🇵全部新景點！
▼新宿1.5小時直通🚌關東最新173間店Outlet!🛍｜深谷花園Premium Outlet