澳門攻略｜澳門景點｜澳門行程推介｜一直都好想試下自己一個去旅行？澳門絕對係非常適合去獨遊嘅地方！無論係品嚐地道美食、參觀世界文化遺產建築、打卡呃like 靚景或走訪民生區感受當地文化，都有唔少景點可以滿足你嘅要求！如果想自己一個去發掘澳門不同面貌，不妨參考下小編嘅獨遊路線啦！
小編獨遊澳門路線推介｜巷弄復古風Cafe – Trek Coffee Roasters
巷弄文化並唔係台灣獨有，澳門一樣都有！位於荷蘭園附近嘅小巷入面，有唔少特色Cafe，想一個人搵個地方飲杯咖啡，高度推介大家過嚟發掘下！小編今次選擇去遊歷咖啡Trek Coffee Roasters，呢到提供多種方式的咖啡沖泡，包括手沖、SOE意式和拼配意式咖啡。店舖內以節約木系風格作主調，配以不少懷舊古物作為擺設，加上暖色系燈光，感覺非常舒適！
遊歷咖啡Trek Coffee Roasters (荷蘭園店)
- 地址：澳門醫院後街25號敬業樓地庫B
- 營業時間：星期一至日 13:30-18:30
小編獨遊澳門路線推介｜百年歷史老街 – 爛鬼樓巷
澳門作為東亞文化之都，除咗有不少現代化建築及景點外，仲有好多歷史老街等大家去探索！位於澳門半島聖安多尼堂區的爛鬼樓巷，原名「蘭桂樓」，曾經於19世紀未期經歷繁華興旺日子，後來因大火變得破爛不堪，被街坊稱之為「爛鬼樓」，當時殖民政府於1869年將這街道命名為「爛鬼樓巷」並沿用至今。近年澳門政府透過翻新工程及坊會、團體等在爛鬼樓等附近街區舉辦各項活動，成功活化呢條百年老街，吸引唔少旅客前往！特別係翻新過後嘅老建築，添上繽紛色彩，唔少人都專程嚟打卡！
爛鬼樓巷
- 地址：澳門爛鬼樓巷
小編獨遊澳門路線推介｜澳門版怪獸大廈 – 新美安大廈
位於黑沙環的新美安大廈，建於上世紀60年，樓高7層，中央位置有一個大型天井，住宅單位密密麻麻的整齊排列，有如澳門版嘅「怪獸大廈」。今年“藝文薈澳2025”公共藝術展《新美安社區共創和互助計劃》，澳洲藝術家何志森以“共創”與“互助”為主題，通過包含為期兩周的工作坊與四個月的藝術家駐地計劃，來喚醒新美安社區居民日益消逝的集體性和對社區公共事務的參與意識。欣賞怪獸大廈之餘，仲可以透過展覽了解澳門民生區文化。
新美安大廈
小編獨遊澳門路線推介｜民生區美食街 – 三盞燈
嘉路米耶圓形地，圓形地中央樹立一支燈柱，上面有呈品字形嘅三盞燈，所以又稱為三盞燈。一個人去澳門想一嚐地道美食，順便體驗一下澳門民生區嘅氣氛，去三盞燈就啱晒。呢到有唔少民生小店、攤檔及東南亞小吃店。黃昏之下，每個攤檔都會亮起懷舊嘅烏絲燈，俾到人一種老澳門情懷。三盞燈更會不定時舉行東南亞美食嘉年華，可以一嚐嚟自東南亞嘅風味小食！
三盞燈
- 地址：澳門嘉路米耶圓形地