鍾意去日本嘅你，鳥取縣唔知你又去過未？鳥取縣除咗最出名嘅鳥取砂丘之外，仲有唔少景點適合大家係暑假期間帶埋小朋友一齊去！鳥取縣仲有唔少出名嘅特產一定要食，例如二十世紀梨、天然岩蠔「夏輝」同埋鳥取和牛等！心郁郁想去鳥取嘅你，記得睇晒小編嘅推介啊！
鳥取攻略｜鳥取夏日必去景點及必食美食推介！
去日本旅行，除咗大阪、東京、名古屋等熱門城市之外，有唔少都道府縣都好值得去。例如好似鳥取縣咁，縣內有唔少精彩景點等住大家體驗！
鳥取縣簡介
鳥取縣位於日本本州西部山陰，係古時日本嘅「因幡國」及「伯耆國」的領地，歷史相當之悠久，縣內有唔少古時建築物同寺廟。鳥取縣北臨日本海，背靠大山，四季氣候亦相當之分明，獨特嘅地理位置令鳥取縣擁有相當豐富嘅天然資源，無論係農作物或者海產等都係日本頂級！鍾意睇動漫嘅話，鳥取縣亦都係幾位著名漫畫家嘅故鄉，包括《鬼太郎》作者水木茂老師、《孤獨的美食家》作者谷口治郎老師同埋《名偵探柯南》作者青山剛昌老師等！2010年米子機場更加將民用部份改名為米子鬼太郎機場！
前往鳥取交通方法
如果你想去米子玩，由東京出發坐內陸航班只需要80分鐘左右。如果由大阪出發，由JR新大阪站坐「特急超級白兔號 Super Hakuto」前往JR 鳥取站，車程大概約2.5小時。之前EGL東瀛遊就同大灣區航空一齊推出暑假限定包機，可以直接由香港直飛鳥取米子，大家可以留意住旺季有無直飛選擇。
鳥取攻略｜行程推介
鳥取砂丘&砂之美術館
如果去鳥取玩，無去過鳥取砂丘的話就等於無去過鳥取！位於山陰海岸地質公園的鳥取砂丘地帶，沙丘高達50米，延伸約16公里。鳥取砂丘有十萬年歷史，係日本最大嘅觀光砂丘！去到砂丘，除咗可以漫步砂丘之外，仲可以滑沙、玩滑翔傘同騎駱駝等刺激活動添！呢到仲有日本唯一使用「沙」做為雕刻作品素材嘅美術館 – 砂之美術館，館內有來至世界各地嘅沙雕大師製作嘅大型沙雕，行完砂丘之後，不妨入去參觀下！
▼鳥取砂丘
▼ 砂之美術館展品
鳥取砂丘
- 地址：鳥取縣鳥取市鳥取沙丘 (日本鳥取砂丘遊客中心)
- 營業時間：24小時開放
- 網站： https://www.tottori-tour.jp/zh-tw/sightseeing/89
砂之美術館
- 地址：鳥取縣鳥取市福部町湯山2083-17
- 營業時間：4月19日～1月3日 平日、週日：9：00〜18:00 週六：9:00～20:00
- 網站：https://www.sand-museum.jp/
圓形劇場倉吉公仔模型博物館
去鳥取玩，唔需要擔心無景點適合小朋友去，圓形劇場倉吉公仔模型博物館除咗有數千件模型展品，啱晒平時有玩開模型嘅大朋友，館內仲有體驗活動俾小朋友學下整模型，6月22日至10月20日期間仲有「食物模型」特別展，一家大細去就啱哂啦！
▼圓形劇場倉吉公仔模型博物館
▼ 天台位置仲可以飽覽倉吉市嘅風景
▼博物館模型展品
▼ 食物模型製作體驗
圓形劇場倉吉公仔模型博物館
- 地址：鳥取縣倉吉市鍛治町1丁目2971-2
- 營業時間：9:00-17:00 (7至9月開放至18:00)
- 網站：https://enkei-museum.com/
鳥取鄉土料理「豆腐竹輪」DIY體驗
豆腐竹輪的歷史遠自江戶時代，當時海產漁獲係鳥取非常昂貴嘅奢侈品，鳥取藩主因為藩地財政緊拙及漁獲不足為由鼓勵節儉風氣，推廣以豆腐代替食魚嘅飲食習慣，因此創造咗以豆腐取代魚漿嘅豆腐竹輪，之後亦成為鳥取特產。「豆腐竹輪之里千村」除咗販賣豆腐竹輪之外，大家仲可以預約體驗活動，親手製作豆腐竹輪！
▼豆腐竹輪Lab
▼ 體驗活動需要提前預約，價錢大約為¥1,320/位
▼ 整好豆腐竹輪之後，職員會即場烤製，俾大家試下自己親手整嘅製成品。
▼想買返少少返香港做手信？現場都有得買！
豆腐竹輪Lab
- 地址：鳥取縣鳥取市河原町布袋556
- DIY體驗時段：09:30/11:00/13:30/15:00
- 網站：https://www.toufuchikuwa.com/lab
特級超級白兔名偵探柯南號
連接鳥取縣倉吉及京都的特急列車「超級白兔號」正好為旅客帶來獨特嘅鐵路遊體驗。為記念《名偵探柯南》漫畫連載30周年，以及「超級白兔號」營運第三十年，JR鐵路公司將其中一輛列車改造成以柯南為主題。小編由倉吉站試乘列車至智頭町站，車程約1小時。
▼「特級超級白兔名偵探柯南號」
▼車廂内外的裝飾都充滿柯南元素
▼「超級白兔號」路線圖
- 營運路線：倉吉至京都 （大阪至鳥取車程需時2小時30分鐘)
- 營運時間：每天極班，其中1至2班為「名偵探柯南號」，時間表可參閲以下網址
- 網站：https://www.pref.tottori.lg.jp/315130.htm
境港市 – 《鬼太郎》漫畫作家水木茂故鄉
境港市係鬼太郎漫畫作家水木茂嘅故鄉，鳥取縣政府為紀念水木茂先生對漫畫界貢獻，於是在30年前將市內嘅街道改建為水木茂之路，並將漫畫嘅各種元素融入在內。漫步於水木茂之路，遊客可發現鬼太郎及其他角色等妖怪銅像，而街道商店、樹木設計等，亦配合了漫畫嘅故事背景，營造出詭異又生動嘅氣氛。每晚日落時分至晚上10點，街道會進行「妖怪投影」，利用燈光投射出各個漫畫角色嘅影像，部分仲係季節限定，例如櫻花與鬼太郎等影像，驚喜十足！
▼水木茂之路及妖怪投影
▼街道及商店嘅設計充滿鬼太郎漫畫元素
▼鬼太郎妖怪銅像
▼妖怪投影
- 地址：鳥取縣境港市本町（JR境港車站周邊）
- 營業時間：全年開放
- 網站：https://www.into-you.jp/zh/places/9164
鳥取攻略｜必食夏季美食推介
天然資源豐富嘅鳥取縣，必然有大量美食啦！自問係Foodie嘅你又有無食過以下幾樣鳥取夏季美食呢？
二十世紀梨
日本梨出名爽脆多汁、味道清甜，例如「幸水」及「豐水」都都係非常出名嘅紅皮梨品種，而呢啲梨都係源自鳥取縣嘅著名青皮梨「二十世紀梨」！鳥取縣就有一個叫做「二十世紀梨紀念館」，館內除咗介紹二十世紀梨嘅歷史同種植過程之外，仲全年都可以免費試食三款梨！館內嘅cafe仲有以二十世紀梨製作嘅特色甜品添！
▼二十世紀梨紀念館
▼ 館內有一棵巨型梨樹標本
▼ 記得試食埋鳥取縣種植嘅3款梨啊！
二十世紀梨紀念館
- 地址：鳥取縣倉吉市駄經寺町198-4
- 營業時間：9:00～17:00（需於16：40前入館）
- 網站：http://1174.sanin.jp/
天然岩蠔「夏輝」
鳥取縣秋冬季一定要食蟹，而夏季就一定要食蠔！鳥取縣名物天然岩蠔「夏輝」生長於海底岩石中，體型極之飽滿，夏天亦正值岩蠔產卵季節， 產卵前岩蠔會變得非常肥美！只有外殼長度超過13cm，先有資格冠以「夏輝」之名出售，而且至少4年岩蠔先可以達到呢個大小，所以一場嚟到又點可以唔食！
▼天然岩蠔「夏輝」
鳥取和牛
好多人以為和牛嘅發源地係神戶，但其實真正嘅發源地係鳥取縣，早係江戶時代嘅鳥取縣大山町，係日本三大牛馬交易市場之一。鳥取縣更係1920年開展日本第一個和牛註冊事業，現今唔少日本和牛品種都係來自鳥取縣㗎！鳥取和牛嘅特色就係極之嫩滑，入口即溶！原因是鳥取和牛脂肪含有大量油酸，而油酸溶點低，40度左右就會溶化，所以吃起上嚟有入口即融嘅效果！鳥取和牛當中，脂肪的油酸比例佔55%以上的更會冠以「油酸55」品牌。
▼ 想食Shabu-Shabu，可以去日本和牛涮涮鍋始祖老店たくみ割烹店
▼ 鍾意炭燒風味嘅話，tablelog 高分店燒肉（福ふく）位於鳥取車站附近，主打鳥取和牛代表「萬葉牛」，一定可以滿足到大家！
