fbpx
Flyday.hk 低成本旅遊情報網
Home 平飛攻略 平機票攻略!日本優惠機票全分析!幾錢先係入手價?

平機票攻略!日本優惠機票全分析!幾錢先係入手價?

by Flyday.hk
0 comment

到底宜家日本嘅平機票點先算抵?點入手好?一大堆日本優惠機票問題!小編岩岩更新咗個日本機票全分析,一齊睇下日本特價機票幾錢先係入手價啦!

最後更新日期:2019年12月25日

注:以下所提及的價錢為來回連稅價錢,及未包廉航寄艙行李費,以淡季作標準。價錢及建議是小編個人之經驗,只作參考用途。
最低價:過去一年以來嘅最平價錢,可遇不可求。
入手價:搵機票個陣見到呢個價都叫做唔錯,買得過。
正常價:平時無優惠做緊嘅正常價錢。

先講「東京特價機票」,港航年頭嘅時候一度貴咗好多,就連Mega Sale或12周年優惠都衝破2千7以上,基本上見唔到二千樓下的價錢,但近年尾的時候就突然平返好多!仲推出咗只包10KG行李的日本線特選優惠票價,平到好誇張連稅只係$1,423!價錢就真係超級平!不過買唔買係另一回事hahaha!宜家仲有好似廉航咁唔包行李的票價種類添!不過就好似無平過,Well……

想穩陣少少,一直企硬好少減的ANA/日航呢排都係咁出優惠,ANA試過平到去$2,804嘅低價,連日本航空都劈到去$2,819!咁就梗係要坐呢兩間日本龍頭公司喇!可以享受日式服務之餘,仲包2件23KG行李,有時櫻花/紅葉季都有平飛添!另外坐ANA飛羽田航班時間勁好,可以凌晨機去晚機返玩盡個假期!至於國泰,今年都有一千零一次驚喜價!四月的時候出咗個極抵fanfare激安價連稅$2,396!其餘時間預返入手價$3,300左右。

廉航方面就有Jetstar同埋HK Express!兩間嚟講,Jetstar就真係堅抵可以作為首選,今年仲有個好難超越嘅15週年優惠連稅$468咋!航班時間仲可以凌晨機去晚機返,行李費亦都比較平!Jetstar平時優惠價大約$800-900左右,不過就比較難搵飛!小編覺得$1,000樓下都抵買!至於HK Express雖然每個星期都有優惠,但今年其實都無平過,不過勝在夠多航班時間選擇,兼且可以揀飛成田定羽田機場,岩時間又見到千二左右嘅價錢就可以入手喇!

黎到第2熱門「大阪特價機票」!港航黎講一樣年頭貴咗唔少,係最近出咗個只包10KG行李的最低優惠價,連稅只需$1,345;至於ANA同樣唔執輸,最平出咗個極抵價連稅$2,316咋,不過航班時間就差啲,要午去早返,平時優惠價錢要3千4嘅話就唔多推介!而國泰十一月嘅時候,都出咗個好抵飛嘅fanfare優惠價,連稅$2,671 咋!

三間廉航之中,Jetstar/樂桃有時都會有驚喜俾大家!好似Jetstar岩岩十二月就出咗個買去送回優惠,大阪連稅只需$683!至於樂桃優惠出得密之餘,價錢都非常唔錯,試過平到去連稅$742!俾個小貼士大家,樂桃會分開去程/回程優惠咁單獨出優惠,但呢啲優惠多數只係相差一日,分開訂會平過一齊訂架!至於HK Express小編就覺得可以算數,今年最平優惠價都要$1,162!

至於名古屋同埋福岡,今年都有唔少平飛!好似國泰名古屋fanfare就出咗個少有嘅低價連稅$2,377!ANA都只係連稅$2,592,好平!不過航班時間同大阪一樣要午去早返,呢個位又扣返唔少分!而港龍福岡間唔時喺Fanfares出現,今年最平賣到去$2,715!

廉航得HK Express 飛呢2條線,所以價錢一向偏貴,最低價分別$1,036及$1,173,加埋行李都要千尾,真係好唔吸引啊!


今年對想飛沖繩嘅朋友係一個好年!繼樂桃宣佈復航之後,HK Express亦都宣佈加入戰團!樂桃航空方面可以話係瘋狂出優惠,keep住優惠價都係喺$700-$800左右!至於HK Express最平$888,想自制open jaw玩埋日本其他城市都得!

港航方面呢一年出過兩次超抵買優惠,最平包10KG行李連稅$946!價錢上秒殺其他廉航,買唔買就自己決定喇!至於港龍就一向偏貴,fanfares最平$2,368,可以唔使睇!

廣島/高松/長崎/宮古島/石垣島:


以上呢五個航點直航機都係得HK Express,石垣島價錢最平,呢一年最低連稅價$699。而廣島/高松/長崎今年都算keep到,最平$899搞定。至於宮古島就今年2月新加入航線,最平$831。雖然呢幾個航點今年都貴咗唔少,但以獨市嚟講都買得過嘅!


香港航空同HK Express分別都有直航機飛鹿兒島,香港航空包10KG 優惠價連稅$1,380算係幾抵!HK Express都係連稅$833,加埋行李同港航差唔多,但應該穩陣啲hahaha,留返fans自己揀啦。


兩個地方都係港航獨市!最平包10KG行李優惠價$1,385!但唔係日日有航班架,入手價大約係$1,800。

北海道札幌:


札幌得國泰同港航有直航機,之前港航屢次打破新低價,至於今年最平都去到$2,756,但最近優惠入手價都徘徊係$3,400左右。國泰一直都賣緊5千以上,不過今次都見過一次低至$3,466,但真係可遇不可求啊!

另外,唔介意坐內地航空公司嘅話,國航真係平到痴哂線,大概係$1,400至1,500左右!不過來回程個轉機時間都比較長,分分鐘要喺大陸過夜,不過會有免費轉機酒店提供嘅?仲有另類平盤可以推介俾大家,就係大韓/韓亞航空,韓亞今年有個Dream fare激抵價,連稅只需$2,302!真心無得輸!另外唔怕麻煩可以考慮坐廉航去東京/大阪轉內陸機,自製兩地玩。

另外今年國泰都開咗新潟同埋德島嘅季節性航班,最平分別$2,746/$3,895,大家可以直航飛多啲唔同地方啊!

如果貪玩嘅fans想一票兩地玩埋台北,咁可以留意下長榮嘅轉機優惠!可以去到唔少冷門日本航點,今年仲新加入返松山 名古屋同埋青森線,仲可以停台北玩埋!至於華航今年就無出過轉機飛日本嘅優惠,可以再觀察下!

最後壓軸講下韓亞航空,今年韓亞真係好積極係咁推優惠,飛日本最平竟然夠膽賣到去連稅$1,370!真係睇到小編眼都突埋出嚟!超抵堅抵非常抵啊!

***結論:
1) 想買最平嘅日本機票,港航10KG價真係平到傻!不過去旅行最緊要平平安安,咁不如捕下ANA/日航嘅優惠,有時可以平到去二千頭架!
2) 想買國泰日本平機票,可以靠運博下Fanfares,不過未必期期有日本航點。
3) 轉機飛日本有時都係個好選擇!韓亞就係一個好例子!
4) 幾間廉航比較之下,HK Express有好多航點,仲有唔少係獨市航點,而且航班時間選擇較多!不過雖然佢每星期都出優惠,但價錢都高企,想真係平飛日本嘅話,可以揀返樂桃或者jetstar!
5) 因為各間airline航班時間唔同,如果想玩盡啲可以分開買唔同廉航嘅單程,自製兩張單程夾埋來回可能出到靚時間,甚至可以不同城市來回,自制open jaw玩盡日本之旅!

其他平飛攻略:
日本平機票攻略
韓國平機票攻略
台灣平機票攻略
東南亞平機票攻略
澳紐平機票攻略
歐洲平機票攻略
美加平機票攻略

相關優惠

發佈留言

This site uses Akismet to reduce spam. Learn how your comment data is processed.