好耐無同大家介紹機票攻略啦，見近排有幾間航空公司飛返曼谷，小編一於重推平飛攻略，第一篇當然依然係港人熱愛既曼谷啦！文章下半部份，小編專登留返疫情前既平飛攻略，比大家feel下呢幾年既變化！
最後更新：2022年9月20日
注：以下所提及的價錢為來回連稅價錢，及未包廉航寄艙行李費，以9月20日機票價錢作標準。價錢及建議是小編個人之經驗，只作參考用途。
自從疫情開始之後，好多航線都cut左，直至去到近期無左熔斷機制，多左航空公司首度或復飛呢條曼谷呢條航線。包括大灣區航空7月首飛、AirAsia 8月復飛，同樣提供服務既有國泰航空、HK Express、香港航空、阿聯酋航空、泰航、埃塞俄比亞航空，年尾仲有皇家約旦航空！一時之間咁多間航空飛曼谷，有無掛住以前個啲weekday快閃，星期五晚去，星期日晚返/星期一朝早機呢？
廉航 / 半傳統航空公司 (不包/只提供少量寄艙行李＋沒有機上餐飲)
| 航空公司 | 今年最低價錢 | 疫情前入手價 |
| 大灣區航空 (包10kg) | $1,941 | NA |
| AirAsia | $1,443 | $1,000 |
| HK Express | $1,293 | $1,100 |
傳統航空公司 (包寄艙行李＋機上餐飲)
| 航空公司 | 今年最低價錢 | 疫情前入手價 |
| 國泰航空 (包30kg) | $2,773 | $1,900 |
| 香港航空 (包30kg) | $2,085 | $1,550 |
| 阿聯酋航空 (包25kg) | $2,070 | $1,500 |
| 泰國航空 (包20kg) | $2,300 | $1,700 |
| 埃塞俄比亞航空 (包2件23kg) | $5,303 | $1,300 |
| 皇家約旦航空 (包30kg) | $2,036 | $1,400 |
▼【泰國旅遊2022】曼谷2大新奢華酒店推介！(附景點介紹)
大灣區航空
咁多間航空公司得大灣區係首飛曼谷，呢個亦係佢地首次載客航班。有旅行社推出套票，每位$7,699 起包大灣區航空來回機票、回程核酸檢測服務、香港隔離酒店；亦有旅行社開始接受淨機票預訂，來回連稅$1,941，時間幾好可以早去下午返，但係只得10kg行李。
航班時間：
- 香港 – 曼谷 HB660 1030-1220 (逢星期六) HB662 1500 – 1650 (逢星期三)
- 曼谷 – 香港 HB661 1320-1710 (逢星期六) HB663 1750-2140 (逢星期三)
AirAsia
AirAsia將會8月復飛香港-曼谷航線，暫時每星期一班，坐得廉航就預左無行李，要另外加錢寄艙。另外，留意AirAsia係飛廊曼機場 (DMK)，稍為近市中心少少，但係出市區無蘇凡納布米機場 (BKK) 咁方便，尤其係轉機要留意邊個機場啦，來回最平$1,443連稅。
HK Express
好耐無見啲雙位數機票啦，HK Express近日推出$98機票優惠飛曼谷，來回連稅$1,293，但係留意價錢未包行李，要另外加錢寄艙。
國泰航空
國泰一直都有飛曼谷，有朝早同下午時間揀，去到年尾先見有比較平既選擇，最平來回連稅$2,773，包1件30kg行李。而曼谷有幾個oneworld Lounge，如果係Sapphire會員或以上級別，可以入埋lounge先上機，不過價錢係咁多間最貴。
香港航空
香港航空曼谷線最特別應該係個時間，疫前有幾班都係超級red eye flight (凌晨出發個啲)，估唔到疫情後都仲有呢啲時間，真係要好慳時間既可以諗諗既。來回最平$2,085連稅，包30kg行李，但暫時見8月打後未有航班。
阿聯酋航空
Weekend快閃既中堅份子，價錢長期賣梗二千蚊連稅！疫情前既晚去下午返時間，到宜家都仲keep到，岩哂星期五放工即走，星期日下午返黎，不過宜家返到黎都仲要隔離，唔使咁就住時間掛，來回連稅最平$2,070，包25kg行李。
泰國航空
飛到泰國，點可以唔提泰航？空服穿上泰服，由上機開始已經似去左泰國咁。有部分航班會同子公司Thai Smile做code share，但係都係泰航飛既，來回最平$2,300，包1件20kg行李，價錢同疫情前差唔多。
埃塞俄比亞航空
一直都旺季平霸之選既埃塞俄比亞航空，唔知點解價錢係咁多間最貴，來回最平都要成$5,303，遲下睇下做唔做返之前啲千幾二千蚊既價錢，最正既佢地有2件23kg行李，係咁多間入面最多既！
皇家約旦航空
皇家約旦航空暫時未有飛香港線，要去到下年3月先有得飛，來回最平$2,036連稅，時間同Emirate相若，都係晚去下午返，包左30kg行李。
以下係疫情前既平飛攻略，小編留係度比大家緬懷一下~
最後更新：2019年12月27日
注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。
最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。
泰國
曼谷係最多航空公司都有執飛而且比較多機票優惠，今年大大小小出咗超過60次優惠添！傳統航空以埃及航空減得最低連稅$1,123，平飛仲要係12月頭先出，但就限Last Minute快閃出發。之後排第2至4次序分別係埃塞俄比亞航空、皇家約旦航空同阿聯酋航空，4間航班公司嘅時間都無得選擇，限晚去午返，時間上岩打工仔多啲，而最低價都係千1至千2尾到，比較突出嘅係埃塞俄比亞航空包2件23KG行李，而且喺紅日假期或暑假都有平飛，性價比超高！
港航今年狀況比較浮動，就算平極都要$1,371，所以可以不理。至於龍頭大佬泰航同國泰，兩間都被迫加入減價戰，減到去最平連稅千5同千6就有交易，而且航班時間選擇比其他公司多好多，可早機去午機/晚機返都可以！不過兩間都唔算出得好多優惠，見到有平就要搶喇！泰航子公司泰國微笑航空，最低連稅價$1,414，但只包20KG行李。
曼谷線廉航得HK Express同AirAsia，不過價錢唔算廉，keep住最低連稅都要$800，不過可以自製openjaw玩埋清邁/布吉又係另一個賣點喇，但留意AirAsia係飛曼谷廊曼DMK機場呀！
傳統航空公司嘅布吉線一向企得幾硬，港龍今年連稅2千1左右，入手價都要預2千5。而泰航同泰國微笑航空仲要無咗影添，反而有得揀下新航轉機去，但價錢同直航差唔多，勝在服務好！
廉航上布吉同曼谷一樣得HK Express同AirAsia，AirAsia最平來回連稅$819，入手價預$1,000！HK Express 價錢上都係差唔多，不過好在可以早機出發晚機返。
港龍飛清邁上年無出過優惠，所以建議都係留意返廉航AirAsia同HK Express。AirAsia賣過最平$768，入手價預$1,100；HK Express賣過最平$831，入手價預$1,000。留意返AirAsia係早去早返、HK Express係午去晚返，所以大家可以分開買飛，去程買AirAsia，回程HK Express，咁就可以早去晚返玩到盡啦！
去蘇梅的話直航就只有曼谷航空獨市，價錢一直高企，不過今年都出咗個幾抵嘅價錢連稅$2,841咋！另外賣服務嘅新航都出過轉機價$2,112，可以多個選擇都唔錯。想再平啲飛，又唔怕坐船嘅話，可以先搭AirAsia去曼谷，然後直接喺同一個機場坐AirAsia去Surat Thani，再搭船去蘇梅會平好多。
越南
越南近年越嚟越受歡迎，開放咗電子簽之後更加多人快閃去越南玩返幾日！香港飛越南嘅直航航點有5個，包括胡志明市、河內、峴港、芽莊同埋富國島。而胡志明市同河內線呢兩個大城市比較多航空公司營運，不停有減價戰。今年越南航空超越港航成為最低價榜首，最平試過$1,112同$1,151，平時入手價連稅$1,300至$1,400就飛到喇！而港航最低價都係貴幾十蚊，入手價差唔多。
而廉航有Jetstar (河內)同越捷航空Vietjet (胡志明市)，越捷最低價去到$577，平時入手預$900，時間唔算好晚去下午返；至於Jetstar就每1至2個月有優惠，15週年優惠價$502咋！
港航同埋越南航空包埋行李同埋飛機餐都咁平，比較之下廉航唔算太吸引。兩間要揀嘅話，河內就無咩所謂，不過胡志明市就一定揀返越南航空，事關港航時間好差，來回都係凌晨機！
港龍航空呢一年都無峴港線嘅優惠，大家可以集中睇返廉航Jetstar、HK Express同越捷航空Vietjet啦！Jetstar 15週年優惠有出峴港，來回連稅$462堅係無得輸，平時入手價$700內都ok！至於HK Express就勝在航班時間比較多，可以早機去傍晚機返，連稅價做過$764。
至於富國島就係越捷航空Vietjet今年四月新開嘅航線，出過零蚊機票連稅$425，仲要平飛數量都幾多下！飛富國島唔使簽證，呢度又慳咗二百幾！平時入手價預$900左右。
而芽莊就係HK Express獨市，入手價大約$900左右，最平試過$691，飛過去歎下resort都唔錯！
馬來西亞
沙巴一直都係得廉航Airasia獨市，不過價錢都keep住有平，big sale嘅話最平試過連稅$488咋！算係好大方！
吉隆坡直航既傳統航空有馬印同港龍航空。馬印航空雖然唔太出名，但佢價錢平得來，旺季都有平，不過留意返最近馬印唔包行李啦。港龍航空今年試過最平$1,683，算係近年靚價！轉機仲有新航可以揀，不過價錢都偏貴除非想出去新加坡行個圈。
而廉航AirAsia同以上幾個航點一樣，都有幾個好平嘅優惠，最平連稅$590，入手價預$1,100左右。
新加坡
至於新加坡今年就相當精彩！新航為咗慶祝新嘅787客機投入服務，今年3月出咗個史無前例嘅抵價，來回連稅$787！相信呢個紀錄都好難被打破。見到咁國泰當然有跟減，但就無減到咁誇張，限2人同行來回連稅每人$1,197。平時兩間航空公司入手價都係$1,700至$1,800左右。
至於廉航，Jetstar今年都出咗個15週年優惠，優惠最平來回連稅$547，好耐都無見過呢個價錢喇！至於一般優惠價為來回連稅約$900，而時間就一般般要下午去早返。Scoot今年直情無優惠平！每次連埋稅都差唔多一千，真係等坐新航好過。
印尼
印尼最熱門嘅航點當然係峇里島喇！分別有3間傳統航空可以直航飛去，岩岩12月中嘉魯達印尼航空先推出優惠最低連稅$2,343，價錢包埋30KG 寄艙行李，仲要玩哂成個復活節都有平呀！至於香港航空嘅優惠已經無之前咁平，不過今年都試過賣到去$1,967；而港龍無出優惠所以拜拜！
如果唔介意轉機，可以留意下新航，連稅千八左右，要轉機但可以享受到優質服務！另一冷門介紹仲有汶萊皇家航空，連稅2千頭，2間入手價都要2千2至2千5！另外廉航Scoot…一樣無優惠拜拜！
柬埔寨
港龍飛暹粒嘅機票連fanfares都無見過！想再平啲就要揀廉航HK Express，一般連稅千一有交易，最平賣到去$866。
**結論：
- 曼谷線係最熱門亦係最多優惠，間間航空公司嘅價錢都唔係差太遠，可以睇埋航班時間、行李、服務質素再作決定！
-
廉航HK Express雖然每星期都有至少一次優惠，不過今年啲優惠都唔算平，呢一年最平要數一年前豬年驚喜優惠！至於AirAsia每季一次嘅Big Sale，賣緊大半年後出發既平飛，見到差唔多最低價/入手價可以即買。
-
曼谷、吉隆坡、越南呢啲航點係暑假都有平飛，如果暑假一家大細想去旅行可以考慮一下。
-
東南亞既內陸廉航非常多，包括Lion air、AirAsia、Jetstar、Scoot、Vietjet、Nok Air、Thai Smile等等，所以如果想去啲二三線航點又或者勁貴既直航航點，可以選擇坐廉航去到新加坡或吉隆坡駁機去。
-
另外溫馨提示，清萊 (HK Express) 同喀比 (AirAsia) 已經停航或無直航去喇><。
其他平飛攻略：
日本平機票攻略
韓國平機票攻略
台灣平機票攻略
澳紐平機票攻略
歐洲平機票攻略
美加平機票攻略
