fbpx
Flyday.hk 低成本旅遊情報網
Home 平飛攻略 平機票攻略!韓國優惠機票全分析!幾錢先係入手價?

平機票攻略!韓國優惠機票全分析!幾錢先係入手價?

by Flyday.hk
0 comment

飛韓國嘅平機票多到花多眼亂!尤其首爾線競爭最大,總共有十間航空公司有飛!到底飛韓國嘅優惠機票幾時入手平飛好?坐邊間航空性價比最高?希望睇完小編Update嘅韓國平飛攻略,可以幫你搵到答案喇!


更新日期:2019年12月31日

注:以下所提及的價錢為來回連稅價錢,個別廉航未包寄艙行李費,以淡季作標準。價錢及建議是小編個人之經驗,只作參考用途。

最低價:過去一年以來嘅最平價錢,可遇不可求。
入手價:搵機票個陣見到呢個價都叫做唔錯,買得過。
正常價:平時無優惠做緊嘅正常價錢。

首爾

 
首爾特價機票方面,今年真係可以話係相當精彩的一年!當中以韓亞航空一枝獨秀,連續出咗幾次激抵嘅dream fare票價,飛首爾來回連稅平到去$1,408 咋!航班時間可以凌晨機去晚機返,仲包埋暑假日子同埋23KG寄艙行李添!佢岩岩仲乘勝追擊,出咗個史上最平嘅快閃價,夠膽賣到去連稅$1,280!真係好癲啊!至於韓亞嘅難兄難弟大韓航空相對上就無咁積極,最低劈到去連稅價$1,554!不過比起之前都算平咗好多!

相比之下,國泰航空就比較靜,只係出過一次抵買的fanfares優惠連稅$1,695!而港航雖然係最平,而且自八月起寄艙行李加到去30KG,但佢呢排咁多新聞,真係買唔落手啊!

廉航方面,今年首爾航空好有驚喜,出咗個單程十蚊嘅爆抵sale!連稅都係$729,仲可以凌晨機去晚機返!不過行李就貴少少,15KG都要$402!

濟州航空嘅優惠出得都算幾密,基本上一個月都有兩至三次,最平$1,088而且包15KG行李!不過留意返,佢地啲優惠一時會包行李,一時唔會包,所以買嘅時候要認真望望啊!值得一提嘅係佢地有時會有旺季平飛優惠,例如櫻花季及暑假檔期,呢啲日子超抵買,但以經驗講平飛唔多,入手價為$1,200!HK Express雖然話就話一星期出一次優惠,但都無特別平,不過小編睇返近期首爾價錢有少少回落,去返一千樓下!今年最低價$986,平時入手價預$1,200左右。

宜家得返真航空一定會包行李,而且一年會出2次年度大促銷,今年最平$1,118有交易,但航班時間認真麻麻,只得午去早返,除非果期無咩優惠先考慮下;今年德威航空加入埋首爾線,最平都係$1,080而且無行李,無咩特別!易斯達航空十一月出咗個優惠,連稅$878算係近期靚價!

釜山

至於釜山機票方面,傳統航空得返港龍一間,想等優惠就要捕實fanfares,不過都唔會有太多優惠,今年最平$2,045!

釜山航空最平$912,不過佢勝在航班時間靚,凌晨機去晚機返,平常優惠入手價預$1,200。至於HK Express嘅優惠大約一星期見一次,不過要等到入手價$1,200左右先好落訂!

濟州

今年HK Express嘅濟州線價錢都係差唔多,係有一次特別平連稅$778,但係航班時間只限凌晨機去超早機返!至於濟州航空今年就貴咗啲啲,年度大優惠都要$875,但係航班時間超靚係凌晨機去晚機返!

而港龍航空就要等fanfares,來回連稅最平$2,300,所以都係等廉航優惠啦。

大邱線只有德威航空執飛,今年只係出過一次優惠,連稅最低價錢要$1,106,不過獨市航線真係無計,見到有優惠要即刻入手啊!

***結論:
1) 想揀靚時間航班飛首爾,建議捕實韓亞/大韓優惠,可以平到去千四有交易,去到千八樓下都值得入手!
2) 廉航方面,今年吸引力大減!不過如果捕到啲年度激劈價優惠,好似首爾航空連稅$729就唔同講法喇!
3) 想平飛濟州,都一定係揀濟州航空,平得嚟航班時間又夠靚!

其他平飛攻略:
日本平機票攻略
台灣平機票攻略
東南亞平機票攻略
澳紐平機票攻略
歐洲平機票攻略
美加平機票攻略

相關優惠

發佈留言

This site uses Akismet to reduce spam. Learn how your comment data is processed.