fbpx
Flyday.hk 低成本旅遊情報網
Home 平飛攻略 平機票攻略!歐洲優惠機票全分析!幾錢先係入手價?

平機票攻略!歐洲優惠機票全分析!幾錢先係入手價?

by Flyday.hk
0 comment

飛歐洲平機票多到花多眼亂,可選擇嘅已經多達十幾間!最近航空公司仲相繼推出唔包行李嘅輕裝優惠機票!究竟飛歐洲嘅話,中東三寶仲抵唔抵坐,其他歐洲機票幾錢值得入手?想知就入黎睇下小編整合嘅資料,幫你地搵到最抵平飛啦!


最後更新:2020年1月8日

注:以下所提及的價錢為來回連稅價錢,及未包廉航寄艙行李費,以淡季作標準。價錢及建議是小編個人之經驗,只作參考用途。

最低價:過去一年以來嘅最平價錢,可遇不可求。
入手價:搵機票個陣見到呢個價都叫做唔錯,買得過。
正常價:平時無優惠做緊嘅正常價錢。

飛歐洲,又點可以唔提中東3寶airline,分別係卡塔爾航空、阿提哈德航空、阿聯酋航空,不過佢地今年就比較少出優惠,見到就要即刻入手平飛喇!

阿聯酋航空岩岩出咗個好抵飛嘅優惠,飛慕尼黑劈到去連稅$2,982,其他航點大約係$3,400至$3,600!不過呢個價錢嘅優惠只係出過一次咁大把!而且直航杜拜仲抵,連稅$2,636咋!仲送埋兩晚酒店添!

阿提哈德航空今年相對無咁積極,最平飛雅典連稅3千、慕尼黑$3,174,其他航點預連稅$3,700左右。不過阿提哈德航空勝在有啲特別優惠,除咗訂Stopover機票免費送2晚阿布札比酒店,可以揀到四、五星級酒店之外,有次仲送埋傑志對曼城表演賽門票添 (不過呢個優惠只限Flyday Fans)!Hahaha

卡塔爾航空航點比另外2間多,而且連續幾年名列Skytrax全球最佳航空前列位置,所以價錢比阿提哈德航空、阿聯酋航空都企得硬少少,係有一次飛土耳其安卡拉賣到去連稅$3,483,其他時間最平都要三千八,預返多數都要四千頭!今年仲新加入航點里斯本、拉巴特、伊茲密爾、馬爾他、哥德堡、馬拉加等。


今次有兩間歐洲航空公司出咗個唔包行李嘅輕量裝優惠!其一就係漢莎集團旗下嘅漢莎同瑞士航空,兩間貴為姊妹航空,唔包行李最平飛波蘭兩個航點連稅$2,578 起!真係好抵!但係飛歐洲唔包行李就真係要諗下!

另外佢地之前都有個破抵價的「港歐上」優惠,最底價飛華沙$2,643、巴黎或布拉格都係2千9到。平就平,但係最後要飛多一程去廣州/新加坡,小編建議大家最好飛埋佢當去多一個Trip!不得不提佢地今年有個破抵價嘅直航連23KG行李慕尼黑優惠,連稅$2,707 咋!


另外法航同KLM都有出輕量裝優惠,飛赫爾辛基最平連稅$2,580 起!其他航點預返大約三千!至於2個直航航點阿姆斯特丹/巴黎反而未見有平


今年北歐航空價錢比較分散,最平劈到去二千七左右起,其他航點一般三千中左右,都算係好吸引!至於直航哥本哈根曾經開賣過連稅$3,472,呢個就要大推喇!

芬蘭航空七月嘅時候推出直航新低價,直航赫爾辛基連稅都係三千八!超抵!真係好想飛去呢個全球最快樂國家啊!至於其他歐洲航點就由$3,486 起,比起其他歐洲航空無咁吸引,但係又比中東三寶平!


如果想坐直航既,一定要早留意住,因為唔太多優惠出,直航可以留意呢幾間航空公司:

– 俄羅斯航空

俄羅斯航空今次出咗個直航飛莫斯科史上最優惠價,連稅只需$2,148!堅係平到傻咗!平時好少做優惠,連稅要三千五左右架!至於其他俄羅斯航點就無優惠喇!

– 英國航空同維珍航空  


今年最威飛歐洲肯定就係英航+維珍,痴咗線平到去連稅二千三飛到去歐洲,仲要包咗23KG行李!優惠航點多之餘,又可以open jaw,仲儲到里數添!佢地另外仲無限loop出咗幾次三千頭嘅歐洲優惠,真係唔怕無得平飛歐洲啊!

國泰航空


今年國泰出多咗歐洲優惠,優惠價平到四千有找!不過想等最平歐洲平飛,都係要等星期二早上fanfares開賣,今年試過飛阿姆斯特丹連稅$3,464!平時優惠大約4千樓上。

– 土耳其航空
直航伊斯坦堡好少減,6月時推出直航來回伊斯坦堡連稅$4,085已經係全年最抵價,不過飛其他歐洲航點就有驚喜,連稅最平$2,504 起!另外土航轉機可以參加佢地個免費city tour,咁就可以輕鬆玩埋伊斯坦堡喇!

小編有感:
睇歐洲機票價錢固然重要,不過揀之前最好諗下自己坐唔坐到12個鐘嘅長途機,如果唔得,可以直接買前86嘅中東三寶,始終舒服啲同無需要困喺飛機咁耐!相反自己好捱得,就梗係揀歐洲航空或者國泰一程飛過去,唔使兜去中東轉機,時間上亦都無蝕咁多,分分鐘價錢仲平過轉機價!

小貼士:
1. 黃金定律!去歐洲一定要預早半年左右訂,最遲都要3個月前,仲有機會入手暑假/聖誕節或跨年機票,一有優惠就入手唔係蘇州過後無艇搭。

  1. 最近歐洲航空公司有好多超抵歐洲優惠,想平飛過去可以揀英航+維珍、北歐航空等,土耳其航空都亦係一個好選擇!

3. 基本上所有飛歐洲嘅航空都可以Open Jaw,即係不同城市來回,咁就可以避免走回頭路,用「多個目的地」功能搵走可以就得!呢招可以避開一些重離境稅嘅國家如英國/倫敦,大約可平$1,000左右。

4. 歐洲既內陸廉航非常多,包括RyanaireasyJetFlybeNikiGermanwingsVuelingNorwegian等等。不過間間風評都麻麻,加上前往機場嘅交通費都貴,所以可以揀不如坐火車或者巴士。而選擇以米蘭、羅馬、馬德里呢啲機場稅比較平既航點作為起點及終點,中間就坐內陸廉航會平好多。

其他平飛攻略:
日本平機票攻略
韓國平機票攻略
台灣平機票攻略
東南亞平機票攻略
澳紐平機票攻略
美加平機票攻略

相關優惠

發佈留言

This site uses Akismet to reduce spam. Learn how your comment data is processed.