澳門終於開關啦！大家係咪已經打算出發去澳門玩返轉呢？澳門除咗可以奢華遊之外，只要識玩，亦都可以係一個適合低budget旅遊嘅目的地！今次就由精打細算嘅Bella為大家搜羅澳門高性價比嘅景點、美食，分別有大三巴牌坊沉浸式數字體驗展、戀愛巷、祥記麵家、澳品薈、澳門大賽車博物館、官也街、葡薏園、澳門倫敦人、澳門巴黎人，以低成本遊覽澳門，務求嚟一個高CP值嘅澳門遊！如果大家想喺澳門感受奢華體驗，亦可以睇另一篇奢華遊澳門攻略！
目錄
第一站——大三巴&大三巴牌坊沉浸式數字體驗展
講到澳門最具代表性嘅景點，相信唔少人心裡面第一個答案都係大三巴。雖然好多人都已經去過大三巴，但係每一次去澳門嘅時候，總係忍唔住去望一望佢！無去大三巴打個卡，就好似無去過澳門咁。另外，澳門文化局更加喺2022年年尾，以「時空穿梭，遊歷三巴」為主題，舉辦大三巴牌坊沉浸式數字體驗展。展覽入面以裸眼3D、VR及AR等先進仿真技術，對大三巴牌坊進行數位復原，帶領觀眾開展跨越虛實、穿梭時空嘅文化之旅，回溯幾百年前教堂嘅歷史風貌。展覽係免費入場，下次去大三巴打卡嘅時候記得順便去睇埋啦！
▼大三巴牌坊
▼大三巴牌坊
▼大三巴牌坊沉浸式數字體驗展
▼大三巴牌坊沉浸式數字體驗展
大三巴牌坊沉浸式數字體驗展
- 地址：澳門大三巴牌坊 (地圖)
- 電話：+853 2836 6866
- 開放時間：上午9:00 – 下午6:00
- 大三巴牌坊沉浸式數字體驗展詳情及報名
第二站——戀愛巷
去完大三巴，可以順路去埋附近嘅打卡聖地——戀愛巷！戀愛巷被選為澳門新八景之一，以兩側黃色、粉紅色嘅建築物而聞名，唔少遊客，尤其係閨蜜、情侶，都慕名而來，更加有唔少人喺呢度影婚紗相，仲有唔少電影、劇集喺度取景。因為太受歡迎，政府仲將呢度劃為行人專用區。鍾意打卡嘅話記住預留多啲時間嚟呢度影相啦！
▼戀愛巷
▼戀愛巷
戀愛巷
- 地址：澳門戀愛巷 (地圖)
第三站——祥記麵家
講到米芝蓮餐廳，一般人都會覺得係好豪華嘅五星級餐廳，但係其實米芝蓮美食唔一定係高價！澳門作為獲聯合國教科文組織評定為創意城市美食之都嘅地方，有唔少價格親民嘅平民美食都入選米芝蓮推介餐廳，就好似祥記麵家。祥記麵家有50年以上歷史，招牌蝦籽撈麵遠近馳名，撈麵用嘅更加係自家製嘅竹昇麵，買少見少！另外，炸雲吞、金沙炸鯪魚球亦都係必食嘅名物！
▼祥記麵家
▼祥記麵家
▼蝦籽撈麵
祥記麵家
- 地址：新馬路福隆新街68號地舖 (地圖)
- 電話：+853 2857 4310
- 開放時間：中午12:00 – 凌晨00:30
第四站——澳品薈
以前要買手信，唔少人都會去手信街。想買澳門原創特色手信，其實仲有另一個好選擇，就係澳品薈！由澳門廠商聯合會開設嘅澳品薈，座落於澳門旅遊中心地帶，地理位置方便。澳品薈主打「M in M」(Made in Macau)，集合眾多澳門製造、澳門品牌、澳門設計、澳門創意以及葡語國家特色產品，產品種類豐富，包括食品、文創、服裝等等。以後要買澳門特色手信知道要去邊度買啦！
▼澳品薈
▼澳品薈
澳品薈
- 地址：板樟堂街1號 (玫瑰堂旁) (地圖)
- 電話：+853 2881 1509
- 開放時間：星期日至星期四 上午11:00 – 晚上7:30；星期五及星期六 上午11:00 – 晚上8:30
- 澳品薈官方網站
第五站——澳門大賽車博物館
下一站嚟到澳門大賽車博物館，澳門大賽車博物館係澳門政府為推廣澳門賽車歷史而建，2021翻新重開。擴建後樓高四層，比之前大咗足足6倍。館內嘅展品由唔同政府部門、私人機構提供，收藏20多輛車壇名將嘅戰車，亦有車手用過嘅物品、賽車服等，賽車迷一定睇到流連忘返。此外，館內亦有大量與格蘭披治賽車相關嘅照片、說明文章、獎項等收藏品，睇完之後更加了解澳門格蘭披治大賽！就算唔係賽車迷都唔怕悶，因為呢度設有大量互動遊戲裝置、VR體驗，相當刺激！遊客更加可以體驗三級方程式賽車，就算無揸車經驗都可以搖身一變成為賽車手，夠晒刺激！咁多嘢睇同玩，門票都只係MOP 80，絕對係超值！
另外，適逢今年係第70屆澳門格蘭披治大賽車，由3月29日起大賽車博物館將會與香港杜莎夫人蠟像館合作，喺博物館內展出8尊賽車手嘅蠟像，分別係夏士林、冼拿、維特爾、麥當奴、路達、侯夫、莫他拿、咸美頓，屆時栩栩如生嘅車手蠟像將分佈喺博物館內唔同區域。又有更多展品可以睇，好期待！如果想一睹呢8尊蠟像嘅英姿，之後一定要親自去參觀！
▼澳門大賽車博物館
▼澳門大賽車博物館格電VR速感體驗
▼澳門大賽車博物館車壇名將戰車
▼澳門大賽車博物館將與香港杜莎夫人蠟像館合作
澳門大賽車博物館
- 地址：澳門高美士街431號 (地圖)
- 電話：+853 8593 0515
- 開放時間：星期一至日上午10:00 – 下午6:00 (最後入場時間為下午5:30；逢星期二休館)
- 澳門大賽車博物館官方網站
第六站——官也街
如果想喺澳門掃街、買手信，就一定要去官也街！前往澳門嘅各個景點，以往多數都係乘搭巴士、的士，宜家有一個方便快捷嘅新選擇，就係輕軌。輕軌喺2019年年尾開通，係澳門第一條鐵路，共有11個站，方便穿梭各個景點以及酒店，仲唔使怕塞車添！想去官也街，可以喺輕軌排角站落車，步行10分鐘左右就到。
▼官也街
▼官也街
▼輕軌路線圖
官也街
- 地址：澳門官也街 (地圖)
澳門輕軌
- 營運時間：早上6:30 – 晚上11:15
- 班次安排：每10-15分鐘一班
- 澳門輕軌官方網站
第七站——葡薏園
掃完街未夠飽都唔緊要，因為官也街嘅小巷入面仲有好多餐廳，就好似葡萄牙餐廳葡薏園。葡薏園嘅菜單提供一系列創意菜餚，滿足唔同客人嘅口味。主廚推薦菜式包括葡式海鮮飯、葡式烤乳豬、烤章魚黑毛豬肉串等等。除咗美食之外，餐廳設計好似歐洲嘅小餐館，外牆顏色、內部裝修亦充滿特色，打卡一流！
▼葡薏園
▼葡薏園烤乳豬配薯條及沙律
▼葡薏園
葡薏園
- 地址：澳門氹仔木鐸街22-A號 (地圖)
- 電話：+853 2857 6626
- 開放時間：早上11:30 – 晚上11:00
「香港人『來澳門』 賞你吃喝玩樂新體驗」
另外，氹仔城區有限公司特別為香港旅客舉辦「香港人『來澳門』 賞你吃喝玩樂新體驗」(Olá Hong Kong – Macau Awaits You) 獎勵活動計劃，鼓勵闊別三年嘅香港旅客重遊澳門，探索呢個美食之都及世遺之城，感受歷史城區之美。活動與氹仔舊城區內十七家商戶合作，提供豐富獎勵優惠，令旅客即時享受免費餐飲，購物及消閒禮遇！只需要喺推廣期內到指定商戶消費滿指定金額，就可登記參加抽獎，贏取豪華住宿。上述介紹嘅葡薏園就係商戶之一，享用完美食之後記得登記享受額外獎賞啊！
▼「香港人『來澳門』 賞你吃喝玩樂新體驗」
第八站——澳門倫敦人
周圍玩咗咁耐，天都就黑。不過唔使驚，就算到咗夜晚都仲有地方可以打卡！經過翻新改建而成嘅澳門倫敦人，係時下澳門最受歡迎嘅打卡聖地之一，吸引唔少遊客專程嚟影相。酒店嘅外牆設計十足十英國國會大樓，夜晚仲會點上色彩繽紛嘅燈光，非常壯觀。大笨鐘更加按照原本嘅設計比例建造而成，高達96米，超級還原！門外仲有一架雙層巴士可以打卡，唔講仲以為真係去咗倫敦啊！
▼澳門倫敦人
▼澳門倫敦人
▼澳門倫敦人
澳門倫敦人
第九站——澳門巴黎人
遊覽完倫敦唔夠喉，想去埋巴黎？唔使買機票，行過少少就到啦！鄰近倫敦人仲有一間非常值得去打卡嘅酒店，就係澳門巴黎人。門外嘅鐵塔依照真實嘅埃菲爾鐵塔精心建造，雖然尺寸係真實嘅一半，但係細節一啲都唔馬虎，令遊客身在澳門亦可感受到巴黎嘅浪漫風情。遊客更加可以登上位於7層嘅免費觀景台、37層嘅收費觀景台，將路氹金光大道以及澳門美景盡收眼底。
▼澳門巴黎人
▼澳門巴黎人
澳門巴黎人
觀景台詳情：
- 7樓觀景台：免費
- 37樓觀景台：MOP 75
- 電話：+853 8111 2768
- 開放時間：下午2:00 – 晚上10:00 (最晚入場時間為晚上9:15)
賞你遊澳門優惠
Bella提提你！澳門旅遊局推出賞你遊澳門優惠，即日起至3月31日期間，預訂港珠澳大橋穿梭巴士 (金巴)、港澳快線、港澳一號、噴射飛航、金光飛航、永東直巴買去程送回程 (需至少住宿一晚，名額有限，詳情請向各交通營運商查詢)。準備去澳門玩高CP值遊嘅話一定唔可以錯過呢個優惠！
香港熱線：(852) 3753 3888
香港熱線：(852) 3703 3981 / 2773 6998
香港熱線：(852) 2979 8778
香港熱線：(852) 2859 3333
香港熱線：(852) 2859 1640
香港熱線：(852) 6211 0932
▼賞你遊澳門
遊澳門小貼士——智能行程規劃&客流預測
澳門有咁多高CP值又好玩嘅景點，唔知去邊啲地方玩點算好？唔使擔心，澳門旅遊局嘅智能行程規劃幫到你！只要輸入出發日期、出發及結束時間，就可以輕鬆幫你plan好行程！仲可以按照自己嘅興趣選擇唔同類型嘅景點，例如觀光、體驗、購物、飲食，夠晒個人化！
另外，澳門開關後吸引好多遊客，每個景點都好多人流，非常熱鬧。如果想知道每個景點嘅人流狀況，可以使用澳門旅遊局嘅客流預測，預先知道目的地多唔多人，真係好方便！
▼智能行程規劃
▼客流預測
