日本開關後,相信唔少人已經買咗機票準備返鄉下。除咗東京之外,大阪亦係香港人去日本旅遊嘅熱門目的地。咁耐無去過大阪,擔心唔知有咩新景點、新嘅交通資訊?唔使驚,小編為大家持續更新大阪最新旅遊資訊,以及搜羅各個最新景點。如果打算去日本環球影城,可以睇埋日本環球2024活動整合。好多人去大阪嘅時候都會順道玩埋京都,小編亦為大家準備咗關西機場出大阪/京都交通攻略,以及京都2024旅遊資訊!
目錄
交通資訊
【日本JR東海新增1.5倍闊座位】
日本JR東海推出名為「S WorkP座位」(S WorkPシート) 嘅新座位,即係喺原本嘅三連座中間放一塊隔開,改裝成二人座位,變相每人有1.5個位,令空間增加。除咗空間闊落咗之外,呢款座位仲設有飲品架,前方亦有摺疊式斜檯,以便乘客使用手提電腦。
由10月20日起,「S WorkP座位」將由原本嘅「のぞみNozomi」列車擴闊至JR東海與JR西日本路線嘅「ひかりHikari」及「こだまKodama」列車。如果想坐到呢款座位,每人要額外俾多1,200日圓 (約$63)。唔少日本人都話呢個新服務好好,好值得加錢!唔知大家又會唔會買呢?
【JR特急HARUKA新增「大阪站」】
計劃去大阪自由行嘅朋友注意啦! JR特急HARUKA 3月中將會新增「大阪站」,直達大阪梅田市區!
一向係由關西機場出大阪嘅好選擇,以往只停靠天王寺站、新大阪站,以及終點京都車站,不過最近就宣布咗今年3月18日會新增「大阪站(北梅田站)」。 比起原有嘅「新大阪站」更靠近大阪市區梅田。之後由關西機場出發去梅田,車程將由71分鐘縮短至47分鐘!而且每日班次多達60班,每隔30分鐘左右就有一班車,以後去大阪玩就更加方便啦!
大家亦可以睇埋其他關西機場來往大阪市區嘅交通方法!
景點資訊
【大阪萬博公園櫻花祭3月20日開始】
櫻花季就到,如果打算去大阪賞櫻,記得去大阪萬博公園櫻花祭!大阪萬博公園櫻花祭於3月20日至4月4日舉行,公園內種植超過5000棵櫻花樹,包括染井吉野櫻、彼岸櫻、寒緋櫻等,被獲選為「日本櫻名所 100 選」。日頭仲有美食攤位及手工藝攤檔,而晚上更會有花火大會、夜間櫻花大道,好有氣氛啊~
【Donkey Kong園區預計2024年春季開幕】
日本環球影城將會新增以Donkey Kong為主題嘅「Donkey Kong Country」!呢個新園區預計於2024年春季開幕,會位於超級任天堂世界裡面,所以超級任天堂世界亦會擴大1.7倍!故事設定為玩家們進入Donkey Kong居住嘅叢林內,以黃金神殿為起點,乘坐礦車奔馳,展開一段刺激狂野嘅冒險旅程!聽落好似好刺激咁!大家又有再去日本環球影城嘅理由啦~
【六甲山滑雪場開山】
位於神戶嘅六甲山滑雪場即將於12月2日開放,到2024年3月3日期間都可以去滑雪! 六甲山滑雪場主打適合新手,呢度嘅雪道坡度平緩,而且雪道長度恰到好處,就算係0經驗嘅初學者都可以享受到滑雪嘅樂趣,被稱為最適合初學者練習嘅滑雪場!小編都曾經喺六甲山實測由零開始學滑雪!除此之外,場內更加有專門玩雪嘅區域「雪樂園」,因為同滑雪專用嘅地方分開,環境安全,小朋友可以盡情玩喺度玩雪。由大阪出發大概70分鐘就可以到達六甲山滑雪場,大家準備好瘋狂滑雪未呢?如果想去其他滑雪場,仲可以睇埋關西3大滑雪場推介及交通攻略~
【大阪最大MUJI重新開幕】
大阪最大!梅田MUJI無印良品9.8裝修後重新開幕!
大阪梅田車站附近嘅「無印良品GRAND FRONT OSAKA店」早前進行大翻新,終於喺9月8日重新開業!面積比之前大2倍,亦成為關西地區最大店,齊集無印最熱門及各種衣食住行生活用品。GRAND FRONT OSAKA店更設有烘焙現磨咖啡站及俾小朋友放電嘅兒童區,仲有使用近畿食材為主嘅咖啡店「Café&Meal MUJI」、展示無印良品家具嘅模擬區及收費共享工作空間等。準備出發去大阪旅遊的話,可以抽時間去行下啦!
無印良品GRAND FRONT OSAKA店
- 地址:大阪府大阪市北区大深町3-1 GRAND FRONT OSAKA 2F – 4F (地圖)
- 電話:+81 066-359-2171
- 營業時間:早上11點 – 晚上9點
- MUJI無印良品官方網站
【Harvest Hill大自然主題樂園】
Harvest Hill係一個位於大阪近郊嘅觀光農場,除咗係農場之外,仲係一個以大自然為主題嘅樂園,有多達5萬株油菜花、9萬株鬱金香,非常壯觀。呢度仲有好多嘢玩,動態、靜態都有,例如摘士多啤梨、親親動物、滑草、小型賽車、空中探索設施等等。最特別係有一個以森林家族為主題嘅公園,就好似進入森林家族角色嘅世界裡面咁,相當夢幻!
▼即刻睇下特派員去玩嘅實測片段! 唔只係牧場仲係…?🤔大阪超美油菜花田🌼難波出發唔洗一個鐘!Harvest Hill🌷| 超人氣水豚、全日本最大級滑草場、森林家族主題公園
Harvest Hill
- 地址:大阪府堺市南区鉢ヶ峯寺2405-1 (地圖)
- 電話:+81 072-296-9911
- 營業時間:早上10點 – 下午5點 (最後入園時間下午4點)
- Harvest Hill官方網站
【VS Park室內運動遊樂場】
就到復活節假期,相信唔少人都準備一家大細去日本玩。如果準備去大阪,VS Park係你小朋友放電嘅好選擇!VS Park係一間結合運動、娛樂、技術元素嘅室內遊樂場,裡面嘅遊戲超過30款,適合大人、小朋友玩嘅都有,例如室內足球、棒球、壁球、射箭、攀,啱晒充滿運動細胞嘅你!呢度仲有唔少考合作嘅遊戲,就好似以前成日喺電視睇到嘅超級無敵大咕窿。除咗可以一家大細黎玩之外,亦適合朋友、情侶一齊挑戰!
▼即刻睇下特派員去玩嘅實測片段! VS park全日本有6間分店,而係大阪Lalaport呢間入面就總共有32種遊樂設施咁多!想知道入面係咪真係岩晒唔同年齡層既人,又或者想睇下適唔適合帶你小朋友去就可以睇下啦~
VS PARK Lalaport EXPOCITY店
- 地址:大阪府吹田市千里万博公園2-1 Lalaport EXPOCITY内 (地圖)
- 電話:+81 06-6369-7186
- 營業時間:平日早上10點 – 晚上8點 (最後入場時間晚上7點30) ;星期六日及公眾假期早上10點 – 晚上9點 (最後入場時間晚上8點30)
- VS PARK Lalaport EXPOCITY店官方網站
VS PARK SEVEN PARK天美店
- 地址:大阪府松原市天美東三丁目500番地 SEVEN PARK天美 2階 (地圖)
- 電話:+81 072-360-4792
- 營業時間:平日早上10點 – 晚上9點 (最後入場時間晚上8點30)
- VS PARK SEVEN PARK天美店店官方網站
【三井Outlet大阪門真、三井LaLaport門真4月17日開幕】
早前大阪鶴見三井Outlet Park結業,取而代之嘅係全新嘅三井Outlet Park大阪門真,於2023年4月17日開幕。三井Outlet Park大阪門真佔地116,400平方米,最特別嘅係將家庭商場Lalaport、三井Outlet Park兩個品牌二合為一,250間店舖進駐,成為大阪府內超巨型嘅購物休閒中心。位於二樓嘅三井Outlet Park店舖數量由鶴見時代嘅64間,新增至98間,當中仲有首次喺日本Outlet登場嘅CHARLES & KEITH、STACCATO、tandey parade、KARE。
至於位於一、三樓嘅Lalaport有153間店舖,一樓仲設有大型美食主題區「黑門市場」,當中有高CP值嘅「牛兆」、百年水產店「深廣」、老牌咖哩「NEW DARUNI」等美食。咁多正嘢食,shopping行到攰都唔怕!想睇更多詳情、交通方法,可以睇埋小編準備嘅三井Outlet大阪門真、三井LaLaport門真詳細介紹!
三井Outlet Park大阪門真開幕後,我地嘅特派員已經即刻去為大家視察環境,逐層睇下有咩行、黑門市場值唔值得食、Outlet舖頭有幾平!即刻去片!
▼第二個黑門市場?🏮大阪終於有新Outlet🛍梅田出發唔使半個鐘!一片睇曬人氣牌子Outlet價+開幕優惠!💰
三井Outlet大阪門真、三井LaLaport門真
- 地址:大阪府門真市松生町1-11 (地圖)
- 三井Outlet大阪門真、三井LaLaport門真官方網站
【大阪空庭溫泉 OSAKA BAY TOWER】
去日本點可以唔浸溫泉! 唔知大家有無聽過位於大阪嘅空庭溫泉 OSAKA BAY TOWER呢?空庭溫泉係關西地區最大嘅溫泉主題樂園,佔地差唔多成18萬呎,溫泉種類五花八門,例如有露天溫泉、四季主題溫泉、足湯、獨立湯屋,實有一款啱你。
除咗有免費浴衣可以租借之外,仲有居酒屋、日式餐館等等嘅美食俾大家浸完溫泉之後醫肚,玩足全日都無問題!而且營業時間去到夜晚11點,夜晚無野做去浸下溫泉都幾好。最重要嘅係空庭溫泉離弁天町站幾近,地理位置都幾方便,唔會好隔涉。鍾意浸溫泉嘅話一定要去試下啦!
▼🇯🇵大阪市中心最美溫泉!打卡打到手軟📸|空庭溫泉♨️梅田出發10分鐘⏱邊日幾點入場最抵玩?
空庭溫泉 OSAKA BAY TOWER
- 地址:大阪府大阪市港区弁天1丁目 2-3 (地圖)
- 電話:+81 570-033-577
- 營業時間: 早上11:00 – 晚上11:00 (最終入場時間為晚上10:00)
- 空庭溫泉 OSAKA BAY TOWER
相關優惠:立山黑部攻略2024|4月15日開山!一文睇晒東京、大阪、名古屋出發交通|必去景點雪之大谷、黑部水壩、御庫裏池、稱名瀑布懶人包
餐廳資訊
【Mister Donut櫻花麻糬冬甩】
櫻花季即將開始,日本Mister Donut都再度推出應節嘅冬甩,四款櫻花麻糬冬甩代表櫻花開花嘅四個階段,分別係「花蕾」、「半開」、「滿開」、以及今年新增嘅「櫻花飄舞」,由2月28日開始發售,去到3月下旬。每年都大受歡迎嘅櫻花麻糬冬甩口感煙韌,「花蕾」撒上國產大豆製成嘅黃豆粉,「半開」採用新鮮嘅櫻花豆沙製成,「滿開」就以櫻花豆沙配上車厘子味巧克力碎,「櫻花飄舞」使用北海道產嘅紅豆沙配上白朱古力、車厘子味巧克力碎。如果拎住去賞櫻花打卡一定好有feel!
Mister Donut
【Mister Donut x GODIVA】
朱古力控注意!$17就食到GODIVA冬甩!
日本Mister Donut同GODIVA合作,推出四款冬甩,包括焦糖朱古力冬甩、堅果朱古力冬甩、朱古力Ganache冬甩、朱古力國王批。頭三款冬甩堂食324日圓 (約$17)、拎走330日圓 ($18),而朱古力國王批堂食356日圓 (約$19)、拎走363日圓 (約$20)。四個款式都已經喺全日本Mister Donut門市發售。$20內就食到GODIVA,最近去日本嘅話一定要試下先得!
Mister Donut
【LAWSON士多啤梨季開始】
士多啤梨控注意!
日本LAWSON便利店士多啤梨季開始,推出18款同「ICHIBIKO」合作嘅士多啤梨商品,由即日起已經開始發售!當中最受觸目嘅就係士多啤梨牛奶雪糕 (180日圓 約$10)、士多啤梨牛奶 (248日圓 約$13)、士多啤梨牛奶三文治 (462日圓 約$25)等等。「ICHIBIKO」係日本超人氣嘅士多啤梨甜品專門店,今次同LAWSON合作,唔係好貴嘅價錢就可以食到呢啲甜品,好想每樣都試下啊~
【日本麥當勞焦糖奶油批、比利時朱古力批】
繼之前好評如潮嘅燉牛肉批、朱古力三角批,日本麥當勞再推出焦糖奶油批、比利時朱古力批!將會喺1月10日起發售。焦糖奶油批混入奶油餅乾,咬落去即刻散發濃濃嘅奶油香氣,而比利時朱古力批使用比利時黑朱古力內餡,帶出微微苦澀嘅口感。兩款批嘅售價為210日圓 (約$11),經過麥當勞嘅話不妨試下!
McDonald’s
【日本麥當勞士多啤梨三角批、燉牛肉批】
冬天最適合就係食暖笠笠嘅批!
日本麥當勞最近推出兩款新批,分別係士多啤梨三角批、燉牛肉批!士多啤梨三角批內餡使用超濃郁嘅士多啤梨巧克力奶油,加上超可愛嘅貓貓粉紅色包裝。而燉牛肉批係日本麥當勞超人氣商品,已經連續兩年秋冬回歸登場,以牛肉、薯仔、紅蘿蔔等食材燉煮嘅香濃內餡,配上金黃酥脆嘅外皮,一食落去全身都暖笠笠~呢兩款批都係秋冬期間限定,士多啤梨三角批已經開始發售,售價為180日圓 (約$9),而燉牛肉批就會喺12月6日起發售,售價為220日圓 (約$12),最近會去日本嘅話一定要試啊!
McDonald’s
【咒術迴戰《澀谷事變篇》Cafe】
最近咒術迴戰《澀谷事變篇》熱播中,官方繼《懷玉.玉折篇》後再度推出期間限定Cafe!今次嘅餐點以六大角色為主題,包括五條悟獄門疆Tiramisu、「夏油傑」咒靈球芭菲、虎杖悠仁手指熱狗、伏黑惠薑汁雞肉炒飯、釘崎野薔薇薔薇散壽司、七海建人焦糖香蕉鬆餅,每款餐點都包含角色元素。
東京、大阪、名古屋都有Cafe,而東京嘅兩間分店仲位於澀谷!咒術fans去澀谷朝聖嗰陣,記得去埋Cafe啊!不過每個地方嘅開始、結束日期都唔同,大家要留意~ 因為座位通常都好搶手,小編提提大家最好事先喺官網預約!
BOX cafe&space HEP FIVE
【安妮亞 x 咚兵衛腐皮烏冬】
WakuWaku!安妮亞 x 咚兵衛好可愛啊!
日清咚兵衛系列一向好受歡迎,當中嘅腐皮烏冬相信唔少人都食過。為咗迎接《劇場版 SPY×FAMILY CODE: White》即將上映,咚兵衛一共推出3款安妮亞包裝杯麵,分別係腐皮烏冬、天婦羅蕎麥麵、日清炒麵U.F.O.,全部都印有安妮亞喺上面!最特別嘅係安妮亞頭上嘅角仲變成腐皮,超得意!暫時未知道香港會唔會發售呢幾款杯麵,如果大家想收藏嘅話,去日本嘅時候記得順便入貨!
【Pokémon Cafe比卡超咖喱飯】
Pokémon fans去日本必訪嘅Pokémon Cafe將於9月2日起推出新餐點,係以比卡超為造型嘅咖喱飯!餐盤上唔止有好可愛嘅皮卡超,仲可以選擇小火龍雞扒、車厘龜海鮮烤焗或者奇妙種子薯仔沙律嘅造型配菜。另外,仲有全新嘅比卡超檸檬特飲,底部放入椰果及紅茶果凍,再配上芒果雪糕、蘇打水,打造皮卡超配色。Pokémon Cafe喺東京、大阪都有分店,fans一定要去試下🥹
Pokémon Cafe大阪心斎橋分店
- 地址: 大阪府大阪市中央区心斎橋筋1-7-1 大丸心斎橋店 本館9階 (地圖)
- 營業時間:早上10點 – 晚上9點30分 (須預先預約)
- 電話:+81-6-4256-1160
- Pokémon Cafe 官方網站
【FamilyMart x GODIVA沙冰】
$24就可以飲到超濃嘅GODIVA朱古力沙冰!日本FamilyMart聯乘GODIVA推出朱古力沙冰,由即日起再度發售,每杯只需450日圓 (約$24)!呢款由GODIVA監修嘅朱古力沙冰喺2021年開始於FamilyMart發售,每次推出都大獲好評,今次更加係首次加入杏仁碎增添口感,可可用量比起上年亦有所增加,令朱古力濃度倍增!暫時未知道今次會賣到幾時,如果呢排去日本嘅話大家可以去FamilyMart望下。呢款朱古力沙冰喺FamilyMart嘅雪櫃入面,付款後可以打開包裝,自行喺店內嘅牛奶機加入牛奶,非常方便!
酒店資訊
【OMO關西機場by星野集團開幕】
大阪有新酒店開幕!仲要超近關西機場、臨空城Outlet!
OMO關西機場by星野集團3月20日開幕啦!作為星野集團旗下首間機場酒店,呢間酒店距離關西機場只相隔一個站,距離臨空城站只有1分鐘步程。無論係搭完凌晨機想休息下,定下返香港前去一轉臨空城Outlet shopping都夠晒方便!酒店樓高22層,提供700間客房,包括雙床房 (淋浴)、雙床房、日式西式房間三種房型。最基本嘅房型約194呎,設有淋浴間、獨立洗手盆,而日式西式房間就係結合和風、西式,房間內同時設有洋式大床以及榻榻米。
設施方面,酒店有公共浴池供客人使用,位於21樓嘅餐廳「OMO Dining」景色一流,可一邊眺望大阪灣景色一邊享自助餐。大家去大阪玩嘅時候又多一間酒店好選擇啦!
OMO關西機場by星野集團
- 酒店地址:大阪府泉佐野市臨空往來北1-833 598-0048 (地圖)
- 電話:+81-50-3134-8096
- OMO關西機場by星野集團酒店網站
疫情資訊
【日本4月29日起取消3針疫苗證明】
根據日本媒體TBS,隨著日本將於5月8日將新冠病毒傳染病嘅防疫級別下調至第5類,日本亦宣布由4月29日起,入境日本的人士毋須出示新冠疫苗接種證明或檢測無確診證明。至於入境時有疑似新冠症狀嘅人,需在抵埗時進行檢測,一旦確診需要到指定的住宿設施接受治療。不過記住仍然要整Visit Japan Web!
【日本解除口罩令】
日本由今日起正式解除口罩令,無論室內或室外,都由民眾自行判斷是否佩戴口罩。JR東日本早前亦宣布,乘搭電車時無需再戴口罩,並會取消提醒乘客佩戴口罩嘅廣播。
不過有日媒做嘅網絡民調就顯示,有超過一半嘅民眾會繼續戴口罩。其實因為花粉症嚴重,喺疫情前好多日本人本身已經有戴口罩嘅習慣,所以相信即使宜家解除咗口罩令,喺日本街頭唔戴口罩嘅人數都唔會大幅上升。唔知大家去日本玩嘅時候又會唔會繼續戴口罩呢?
▼去大阪唔食會後悔🥹梅田商場必食10款人氣甜品+小食🍓人生食過最好食嘅…|蜜香屋蜜芋雪糕、一心堂完熟水果大福、a la ringo蘋果批、阪神魷魚燒
▼大阪最新大型商場🛍三井LaLaport堺|Food Court先係本體😋|必食漢堡扒、大阪築地海寶飯、Antiqulture古著店、Onelove寵物用品店
▼🐷比551蓬萊好食嘅大阪豬肉包?2800円牛治?!2022難波心齋橋必食美食🇯🇵|551HORAI、二見豬肉包、わなか章魚燒🐙、心齋橋三文治🥪、不易糊軟雪糕🍦