2025京都嵐山紅葉｜睇紅葉係好多人秋天去日本嘅理由之一～除咗東京、大阪呢啲熱門地方，其實古色古香嘅京都亦係一個好好嘅選擇！想去京都睇紅葉，但係又怕好多人？今次小編為大家介紹嵐山公園龜山地區嘅紅葉一日遊路線，可以避開人群之餘，亦途經多個景點及餐廳，包括寶嚴院、龜山家、祐齋亭、京豆庵，仲有必食掃街指南，即刻睇落去啦！另外，大家可以睇埋日本紅葉見頃預報、大阪京都交通攻略！
好想去京都睇紅葉，但又怕度度都人山人海？！跟住Claudia同Mayu行呢條嵐山公園龜山地區紅葉一日遊路線，就可以避開行竹林路線嘅人群啦！最重要係點同點之間都唔洗行超過5-10分鐘，最適合想輕輕鬆鬆自由行嵐山嘅人~！想睇紅葉嘅，必去景點有寶嚴院同祐齋亭。而想掃街嘅就唔好錯過賞味期限一分鐘嘅鯛魚燒まめものとたい焼き，同超綿密豆腐倒立雪糕京豆庵啦！
▼🍁京都紅葉季必去！小眾嵐山公園龜山地區一日遊路線🍂必去絕美紅葉倒映屋、日式紅葉庭園喝抹茶🍵、必食一分鐘賞味期限鯛魚燒｜寶嚴院、龜山家、祐齋亭、京豆庵
https://youtube.com/watch?v=IpJMeSbxhko%3Fautoplay%3D1%26mute%3D1
目錄
日本紅葉預測
因為今年氣溫比較熱，所以推測今年見頃日子都會受到影響而推遲。根據日本氣象株式會社，京都嵐山嘅預測見頃日子係11月23日。如果想知道日本其他地區嘅紅葉預測，大家可以睇埋日本紅葉見頃預報。
嵐山紅葉一日遊行程
講到紅葉季，緊係要去京都嘅嵐山啦！除咗大家平時會去嘅竹林、天龍寺之外，今次為大家介紹一個比較輕鬆嘅紅葉一日遊路線，主打唔會行得太辛苦，適合想悠閒睇紅葉、帶著一家大細嘅你～
▼紅葉一日遊路線圖
第一站｜渡月橋
今次推介嘅紅葉一日遊路線都會喺「阪急嵐山駅」附近。出站後步行幾分鐘，就會達到嵐山嘅地標「渡月橋」。大家過咗呢條橋之後，馬上轉右，就可以影到紅葉加上渡月橋嘅美景！
▼渡月橋
▼渡月橋
第二站｜嵐山よしむら
如果大家黎嵐山黎得早嘅話，非常推薦大家去食「嵐山よしむら」嘅手打蕎麥面。點解要黎得早？因為呢間蕎麥面非常多人排隊，如果午餐時間或者再晏啲黎，有機會要等30-120分鐘！所有如果大家有興趣食嘅話，建議最好早上10:30前到達，咁就有可能第一批入去！餐廳有一、二樓，如果坐到二樓嘅窗口位，就可以望住一片紅葉景色食飯！不過如果係兩個人以上，就唔可以坐窗口位～
▼嵐山よしむら
▼嵐山よしむら
嵐山よしむら
- 營業時間：早上11點 – 下午5點 (或因季節改變，可於官網查詢)
- 地址：京都府京都市右京区嵯峨天龍寺芒ノ馬場町3 (地圖)
- 電話：+81 075-863-5700
- 嵐山よしむら官方網站
第三站｜%ARABICA咖啡店
行前幾步就係好出名嘅「%ARABICA」網紅咖啡店，店外面幾乎長期都大排長龍。雖然味道應該同喺香港飲到嘅大同小異，不過醉翁之意不在咖啡～喺度嘢飲都係志在望住嵐山個靚景！
▼%ARABICA
%ARABICA
- 營業時間：早上9點 – 晚上6點
- 地址：京都府京都市右京区嵯峨天龍寺芒ノ馬場町3-47 (地圖)
- 電話：+81 075-748-0057
- 嵐山よしむら官方網站
第四站｜寶嚴院
寶嚴院嘅特別之處，就係只會喺秋天、春天先開，所以秋天黎到嵐山賞楓葉，寶嚴院係必去嘅景點！寶嚴院唔算太大，大概半個鐘就可以行完。成人門票為700日圓 (約$36)。另外，寶嚴院嘅庭院係嵐山少數可以賞夜楓嘅地方，今年賞夜楓嘅開放日期由11月11日至12月3日。如果只係想喺夜晚睇楓葉，可以將寶嚴院呢個行程放喺最後一站，夜間參拜成人門票為1,000日圓 (約$51)，不過小編覺得日間著和服影相都會好靚！
▼寶嚴院
▼寶嚴院夜楓
寶嚴院
- 營業時間：早上9點 – 下午5點
- 夜間參拜 (夜楓)：下午5點30分 – 晚上8點30分
- 地址：京都府京都市右京区嵯峨天龍寺芒ノ馬場町36 (地圖)
- 電話：+81 075-861-0091
- 寶嚴院官方網站
第五站｜お食事処 亀山家
離開寶嚴院，再往嵐山方向前進，會經過一間叫做「お食事処 亀山家」嘅地方。呢度可以一邊食嘢，一邊欣賞保津川嘅紅葉景色。比起前面介紹過食蕎麥面嘅嵐山よしむら，呢度人流無咁誇張。小編當日lunch time排隊，等大概30分鐘就有位。如果避開午餐時間，應該會再少人啲～呢度出名嘅有烏冬、關東煮、天婦羅。
▼お食事処 亀山家
▼お食事処 亀山家
お食事処 亀山家
- 營業時間：早上11點30分 – 下午4點
- 地址：京都府京都市右京区嵯峨亀ノ尾町 (地圖)
- 電話：+81 075-861-0759
- お食事処 亀山家Tabelog介紹
第六站｜祐斎亭
大家可能聽過京都嘅琉璃光院，係每逢紅葉季非常爆滿嘅景點。如果預約唔到琉璃光院，喺嵐山有一個類似嘅地方，叫做祐斎亭。祐斎亭一年四季都會開放，不過如果紅葉季黎記得要預約先！成人門票係2,000日圓 ($103)，可以參觀30分鐘。
祐斎亭而家係一個藝術家做染布嘅工作坊，呢度可以影相嘅位置主要分為三個部分，包括川端康成部屋、窗之部屋、水鏡。小編最鍾意嘅係窗之部屋，可以喺窗外面近距離見到紅葉，再加上上方嘅屋簷，影出黎古色古香，非常唯美～
▼川端康成部屋
▼窗之部屋
▼水鏡
祐斎亭
第七站｜嵐山公園 龜山地區展望台
行大概5分鐘嘅山路，黎到嵐山公園 龜山地區展望台，可以眺望保津川嘅峽谷景色。呢段山路唔算太難行，唔係好辛苦就可以睇到一大片紅葉景色，好值得黎啊！
▼嵐山公園 龜山地區展望台
第八站｜まめものとたい焼き 嵐山本店
行山之後當然要補充體力～返到黎嵐山人山人海嘅大街，呢度有一間鋪叫做「まめものとたい焼き」，售賣賞味期限只有一分鐘嘅鯛魚燒！紅豆餡嘅鯛魚燒裡面夾住一塊完整嘅牛油，所以喺一分鐘內食會最好味。鯛魚燒嘅外皮好薄但係好脆，紅豆餡亦好足料，推薦！
▼まめものとたい焼き 嵐山本店
▼まめものとたい焼き 嵐山本店
まめものとたい焼き 嵐山本店
- 營業時間：早上10點 – 下午5點
- 地址：京都府京都市右京区嵯峨天龍寺芒ノ馬場町40-8 嵐山昇龍苑1F (地圖)
- 電話：+81 075-354-6166
- まめものとたい焼き 嵐山本店官方網站
第九站｜手作り工房 京豆庵 嵯峨嵐山店
淨係食一樣甜品唔夠喉？咁一定要食埋另外一樣好出名嘅甜品，就係京豆庵 人手做嘅豆腐雪糕！呢間「手作り工房 京豆庵」嘅雪糕，就算成個反轉都唔會跌落黎，就咁睇都知有幾綿密、濃郁！除咗豆腐味，小編亦都好推介芝麻味！
▼手作り工房 京豆庵 嵯峨嵐山店
▼手作り工房 京豆庵 嵯峨嵐山店
手作り工房 京豆庵 嵯峨嵐山店
- 營業時間：早上10點 – 下午5點
- 地址：京都市右京区嵯峨天龍寺立石町2-1 (地圖)
- 電話：+81 075-881-3560
- 手作り工房 京豆庵 嵯峨嵐山店官方網站
跟住呢條片遊大阪地下街，就唔再怕迷路～今次Claudia同Mayu會帶大家去新梅田食道街，阪急三番街同大阪最大地下街Whity！仲會食盡人氣同隱世美食！
▼大阪美食都在地底？梅田地下街美食攻略2023! 😋| 隱世超新鮮立食壽司🍣食完會發光？日本必食生冬甩🍩｜新梅田食道街 | 阪急三番街 | Whity | 大阪必食
https://youtube.com/watch?v=RBbl582votM%3Fautoplay%3D1%26mute%3D1
大阪除咗黑門市場之外，竟然仲有一個超抵食嘅魚市場🐟竟然仲可以批發價爆食魚生?! 今次Claudia 同Mayu 就帶大家去呢個市場睇下，想知邊幾間店最值得食同要幾點去就記住睇片～
▼喺大阪市中心批發價食魚生?! 🐟HK$1.5 一隻甜蝦／HK$4.7帆立貝😍幾點起身先食到好西？｜大阪本地人去嘅魚市場－大阪木津市場
https://youtube.com/watch?v=-a5RGViLW_Q%3Fautoplay%3D1%26mute%3D1
喺大阪想去Outlet 終於唔使去臨空城啦！🤩今次Claudia同Mayu會帶大家去大阪門真市新開嘅Lalaport同三井Outlet💰，呢度一共有成二百五十幾間舖頭咁多！🛍而且商場入面仲有一個黑門市場、角落生物遊樂場，仲唔係最新食買玩最強商場?!😍
https://youtube.com/watch?v=77M7Kt65n1Q%3Fautoplay%3D1%26amp%3Bmute%3D1