美航減價減埋去墨西哥，價錢夠哂Surprise兼且優惠好罕見呀！只限3月出發，來回墨西哥城$1,609 (連稅$3,843)、坎昆$1,631 (連稅$3,697) 咋！從未見過咁平，其中飛墨西哥城只係需要轉一次機，不過等轉機要成18個鐘都幾攞命！
【出發日期】
3月7日至28日 (必須於3月29日前完成旅程)
【停留期限】
1個月
【訂飛網址】
Trip.com (連稅$3,844 起)
美國航空官網 (連稅$3,861 起)
持有香港特區護照者可免簽證到墨西哥旅遊，不過於美國轉機必須持有效美國簽證。
今次美航減嘅墨西哥線真係一百萬個抵，平時坐美國嘅航空飛過去七，八千蚊走唔甩，而坐加航仲更加貴！今次價錢都係3千幾蚊，直情打咗個5折呀！
不過平嘢始終航班時間會比較惡頂，好似飛坎昆分別要喺東京同達拉斯轉機，飛一程都需時21至33小時以上。
飛墨西哥城叫做坐一程好少少，不過等轉機都要18小時，仲要飛到過去洛杉磯已經夜晚，無得出機場行下！呢啲時間除非真係唔使打工，否則時間都幾難安排。
想最快搵到平飛，緊係睇返官網訂飛網頁嘅價錢！暫時見到飛坎昆嘅去程機票唔多，但總算都可以湊到幾套去足7日以上嘅機票，相反墨西哥城平飛日子都幾多下，唔難搵。
如果坐聯合航空飛墨西哥城仲會平啲，價錢只需$3,817 起，而且轉機時間短好多，不過小編自己就麻麻地聯航，寧願俾貴少少坐美國航空，哈哈！
墨西哥除咗出名嘅加勒比海及瑪雅遺址外！las coloradas 「粉紅色湖」都係著名嘅IG打卡勝地，距離坎昆需要4小時車程，來回約7小時。
不過小編網上睇唔少遊記，由於呢個粉紅色糊屬於製鹽工廠一帶，所以部分位置已經不得進入，只可以睇到一條粉紅色河仔或者去附近一個咖啡色海灘，幸運嘅話仲可以見到紅鶴，不過香港動植物公園都睇到美洲紅鸛～小編寧願望住加勒比海歎世界！
(圖片來源：Wikipedia)