講起岐阜，大家好自然會諗去白川鄉，但係位於日本中部地區嘅縣份，又係咪只係單單得白川鄉呢個景點值得去？小編早前去大阪旅行時，一時興起揸車衝去岐阜玩咗幾日，當中有唔少第一次去嘅景點都幾值得推介俾大家！希望嚟緊去白川鄉玩嘅你，想去多幾個景點就可以參考下，發堀一下岐阜更多必去景點！
目錄
小編遊記｜來去岐阜！4日3夜岐阜行程推介
航班篇
小編今次本身係諗住係去大阪玩返一星期，一早買咗樂桃航空嘅大阪機票！樂桃嘅價錢夠平，而且經常有減價優惠同埋去程有凌晨航班，啱晒小編呢啲鍾意用盡所有時間同慳到盡嘅人！
▼ 香港至大阪嘅凌晨航班以空中巴士A320執飛，以33座位布局。
▼ 雖然樂桃係低成本航空，不過客機座位唔會係大家想像中咁迫，小編身型都有返咁上下，不過座位都非常闊落！
第一日行程：關市刃物屋三秀打刀體驗，莫內之池，群上食物模型體驗，群上傳統舞蹈體驗
關市刃物屋三秀
落機拎齊行李同攞車之後，就出發去第一個景點關市！關市係岐阜有刀刃之市之稱，刀匠係關市鍛告日本刀已經有超過800年歷史，小編一向對日本刀都有濃厚興趣，所以揀咗去刃物屋三秀aka關刃物博物館作為第一站。
▼ 一進入三秀，首先會俾各種館內嘅刀具陳設震攝到，近距離細心觀看，可以睇得出刀匠用咗唔少心機去打造每一把刀！
、
▼ 跟住刃物屋三秀二十五代刀匠藤原兼房25世及兒子藤原兼房26世就為我地介紹有關鍛刀嘅細節。傳統日本刀會用島根縣嘅鐵砂製作，先會將鐵砂於入碳中，並且係800度熔爐鍊製三日，然後再鍊好嘅鐵材打碎，再分類出五種不同嘅碳鋼，最高強度稱為玉鋼。然後會將玉鋼唔同強度嘅碳鋼以1,300度高溫融合，再不斷敲打、拉長及折壘。將刀刃塑形後，會加入黏士，型成獨特的刀刃紋路。最後反覆將刀加熱至800度，然後放入水內冷卻，整個基本鍛刀過程需要用上至少15日，係日本只有獲許可刀匠可以鍛刀，而日本大約大約200位合資格刀匠，每位刀匠只可以一個月製作兩把刀。
▼ 為咗等大家可以感受炭鋼嘅熱度，刀匠將剛打好嘅炭鋼拎出嚟俾大家近距離感受下。
▼ 之後可以入去鍛造房內，拎起鐵搥學下打鐵。睇落好似好容易，其實個鎚非常之重，房入面亦非常之熱。
▼打完鐵之後，可以著上古時大名嘅服飾，拎住真正嘅日本刀影下相(非常之重)
▼ 完成呢個「見學」之後，仲可以得到刀物屋三秀嘅刀証！
▼ 到咗小編最期待嘅環節，由戶山流會長示範居合表演！刀有幾鋒利、拔刀速刀有幾快，睇下被砍嘅竹樁就知道！
▼ 刃物屋內仲有菜刀、較剪、指甲鉗等刀具賣。
▼ 另外一樣名物就係日本刀型雪條，不過可惜當日已經賣晒，有機會大家可以試下。
關市刃物屋三秀
葉菜創作和料理Caffe
第一站用嘅時間相當之多，而且一大朝早到埗，所以非常之肚餓。午餐就選擇咗呢間葉菜餐廳。小編就揀咗呢一個大黑山燒，即係飛驒牛+美濃健康豬嘅味噌壽喜燒套餐。價錢為2,700円，可以試到兩款當地非常出名嘅豬同牛肉，非常之抵！
葉菜創作和料理Caffe
- 岐阜県関市小瀬1815 (地圖)
- 葉菜創作和料理Caffe官網
莫內之池(根道神社 無名池)
根道神社內嘅無名池，近年係社交平台爆紅，原因係因為曾經有人係到影咗張相post上社交平台之後，大家認為清晰嘅池水加上蓮花，就好似莫內嘅名畫「睡蓮」一樣咁靚，所以成為近年嘅打卡熱點！
▼ 每日朝早嘅陽光照射下，係最好嘅影相時刻，雖然小編去到已經係午後時份，但影落都唔差㗎！
▼ 唔同月份有唔同嘅花/植物觀賞，管理人好細心地列明俾大家睇！
莫內之池(根道神社 無名池)
岩崎模型製造株式會社
平時喺日本餐廳門外，都會見到唔少食物嘅模型， 佢哋都非常之高， 而食物模型嘅發源地就係岐阜縣嘅郡上八幡。 呢度製作嘅食品模型，佔全日本嘅出產量大約六成。小編今次嚟到岩崎模型製造株式會社試下整食物模型製作，價錢方面都係最平1,200日元，整完之後就可以帶返屋企做手信！
▼ 門口會見到一條巨型嘅岐阜香魚模型同創辦人岩崎瀧三先生嘅銅像
▼ 導師非常風趣幽默，用非常簡單易明嘅方法教大家點整作模型！
▼ 詳細過程，可以睇以下呢條片。
岩崎模型製造株式會社
- 岐阜県郡上市八幡町城南町２５０(地圖)
- 岩崎模型製造株式會社官網
ホテル郡上八幡 Hotel Gujo Hachiman
夜晚住宿就揀咗ホテル郡上八幡 Hotel Gujo Hachiman，呢到係郡上八幡唯一一間溫泉旅館，本地居民都會專程入嚟浸下溫泉。
▼ホテル郡上八幡
▼小編今次入住嘅係和式客室，非常之大同舒適。
▼ 呢到嘅溫泉有露天同室外兩種，可以望住河川山景浸溫泉，非常寫意。
▼ 住得溫泉旅館又點少得食会席料埋！除咗必食嘅飛驒牛之外，仲有岐阜非常出名嘅燒香魚！
食完飯之後，旅館有一個好特別嘅活動， 就係教大家跳舞郡上舞。 作為手腳不協調嘅確診者，就算工作人員幾出色嘅教導， 都係跳到甩手甩腳。郡上舞平時只會係祭典時候跳， 旅館想等客人 都可以感受吓呢一個非物質文化遺產，所以夜晚會安排住客一齊學跳。
ホテル郡上八幡
第二日行程：白川鄉，高山鐵路單車，古川藥草茶體驗，
白川鄉合掌造
去白川鄉，大家可能都會揀雪季或者有櫻花嘅季節去，但係小編就想去睇吓紅葉，所以就揀咗秋天去白川鄉。秋天天氣晴朗，加上山上紅葉，唔洗用filter 點影都咁靚！
▼ 建議大家先上去城山天守閣展望台，由高處影返張靚相，然後沿路行落去合掌村
▼ 想知秋天景色有幾靚，可以睇下小編嘅片！
▼ 合掌屋以全木材製成，完全無用上任何一根釘，而屋頂以芒草等牧草鋪成，係白川鄉有大大少少嘅合掌屋，行近細心欣賞就可以睇到每一個細節。
▼ 行得耐肚餓嘅話，呢到有唔少特色小食可以買嚟食下！
白川鄉合掌造
- 岐阜縣大野郡白川村荻町 (地圖)
高山鐵路單車Gattan Go!
去完白川鄉嘅你， 係咪已經好滿足，準備返番市區？但其實附近有一個隱藏景點，小編係真心推介大家去埋。 就係高山鐵路單車 Gattan Go! 由白川鄉出發，除咗揸車之外，可以坐巴士去。Gattan Go 由廢棄嘅神鋼鐵道改建而成，可以全長約3公里嘅鐵道上踩單車， 仲可以一路欣賞沿途超級靚嘅風景。 不過大家要注意，Gattan Go 只係春季至秋季期間營運， 冬天因為天氣太凍， 所以唔會開放。
▼ 詳細可以睇下小編嘅親身體驗片！
高山 Gattan Go!
- 岐阜縣飛驒市神岡町東雲1327-2 (地圖)
- Gattan Go 官網
草藥茶體驗館ひだ森のめぐみ
行咗全日，見有啲攰，所以就去咗行吓街同埋預約咗一間草藥茶體驗館，叫做ひだ森のめぐみ。 草藥文化除咗中國之外，其實日本古時都非常之盛行。
▼ 店主北平先生為大家介紹枱上各種草藥功效。
▼大家可以按照自己需要，將3-4種草藥加入濾杯內，然後加熱水浸泡，然後就可以飲用。
草藥茶體驗館ひだ森のめぐみ
高山GREEN HOTEL (高山グリーンホテル)
▼客房新淨就無需多講，空間亦相當闊落，就算兩床房都有唔少位置放行李！整體設計用上木造傢具配上簡約灰色，非常有格調！
▼窗邊有一張長梳化，可以望下夜景。
▼浴室非常闊落，浴缸亦非常之大。便廁亦係典型同浴室分隔開。
▼高山GREEN HOTEL最出名嘅其中一個賣點就係館內嘅溫泉！本陣大浴殿有露天浴池、室內浴池同桑拿。而浴池附近設有日式庭園，可以係咁靚嘅環境下浸溫泉真係莫大享受！
▼ 住得溫泉酒店，當然要揀一泊二食嘅住宿啦！無論刺身、前菜、湯同埋唔同部位嘅飛驒牛都係非常之高質，值得一試！
高山GREEN HOTEL
- 岐阜県高山市西之一色町2-180 (地圖)
- 高山Green Hotel官網
第三日行程：高山古街、宮川朝市、小坂の滝、下呂溫泉水明館
第三日朝早，小編就想行下街買下手信同土產品，今日就會去高山老街同宮川朝市。
高山老街
▼高山老街至今依然保留著江戶時代嘅舊街景。街道兩旁有多間古色古香嘅老店，可以係到買下手信、小食甜品、清酒同傳統工藝品。
▼高山老街中嘅舩坂酒造店，係高山嘅人氣店之一。原本只係想去買下清酒做手信，點知獲得負責人破例為我地介紹一下釀酒過程，同參觀一下釀酒廠！
高山老街
- 岐阜縣高山市上一之町 (地圖)
宮川朝市
宮川朝市有日本三大朝市之一，朝市已經擁有超過200年歷史，係高地必去景點之一。朝市沿宮川河畔而建，每日朝早至下午12點，朝市會有唔少攤檔販賣新鮮蔬菜、工藝品、土產等等。
宮川朝市
- 開放時間：夏季6:00-12:00、冬季7:00-12:00
- 岐阜縣高山市下三之町(地圖)
小坂の滝
下一站嚟岐阜縣小坂町，有超過200個高達5米以上嘅瀑布，大部份由御嶽山過去兩次火山爆發時嘅熔岩形成。今次小編就跟住導賞團，行其中一條比較輕鬆嘅路線，除咗可以近距離睇下瀑布之外，仲有紅葉睇！而一路上有唔少地方影相都非常之靚。有係香港行過下山嘅話，哩條路線你一定應付得到！
小坂の滝
- 岐阜縣下呂市小坂町赤沼田 811-1(地圖)
下呂溫泉
行咗成日，當然想浸下溫泉。今晚就揀咗日本三大名泉之一嘅下呂溫泉，浸完哩到嘅溫泉水皮膚會變得嫩滑，所以有『美人湯』之稱！
▼ Check in 前先行一行附近嘅溫泉街。附近有一個下呂溫泉神社，手水舍入面嘅水係溫暖嘅泉水！
▼ 人氣食店GEROGERO バタースタンド，店門口已經相當有趣，除左可以買烤飯團同牛油夾心餅之外，仲有一款粉紅色嘅入浴劑，店家為咗俾大家試下，專登係門口設置一個足浴俾大家試下，非常有趣！
水明館
今晚入住嘅溫泉旅館叫水明館，係下呂一間相當老字號嘅溫泉旅館之一，足足有成90年以上歷史！
▼今次入住嘅客房係和洋式，不過唔係淨係榻榻米上有張床咁簡單，而係真係有一間和室係房內。景觀望向山，夠晒寧靜！
▼ 露天溫泉同室內大浴場都非常之大，而大浴場由檜木打造，一路浸嘅同時會聞到陣陣木香味！
▼ 晚餐款式相當之豐富，每樣都相當之精緻。
水明館
第四日 － 馬籠宿，馬賽克博物館
嚟到最後一日，行程景點因為要返大阪，所以唔可以去太多地方。不過當然會好好利用剩低嘅時間啦！
馬籠宿
係古時，連接東京同京都嘅道路─中山道。道路沿途有許多宿場町，即係驛站，而馬籠宿亦係其中之一。馬籠宿同另一個宿場町妻籠宿都榮獲米芝蓮綠色指南一星評級，係日本非常有代表性嘅景點。今日就由導賞員帶領之下，一路行一路了解下馬籠宿嘅歷史。
▼ 到達馬籠宿第一個景點，就係係觀景台遠眺一下靚景同滿山嘅紅葉！
▼馬籠宿有唔少店舖，買手信就最啱！
▼ 馬籠宿一路上有唔少水車及救火用具，主要係因為400多年前曾經發生過大火，而當時因為缺乏水源救火，所以重建後將水源引入馬籠宿，避免因大火再次燒毀建築物。
多治見市馬賽克博物館
岐阜縣多治見市笠原町唔知大家有無聽過，呢到嘅馬賽克磁磚生產量係全日本第一。呢到有一間馬賽克博物館，外型非獨突，外型就好似一個山丘(小編覺得似塊薯片)。博物館由有『建築頑童』之稱嘅日本建築大師藤森照信所設計，概念係以馬賽克原料 – 泥士作為靈感。館內除了收藏有大量昭和時期所製日本產磁磚及藝術品等，仲可以好似小編咁親手用馬賽克整手作帶返屋企留念！
▼ 多治見市馬賽克博物館
▼ 館內有唔少展品講述多治見市嘅馬賽克工業嘅歴史同製造過程
▼ 博物館最頂層嘅展區除咗有大量藝術品之外，係去打下卡都不錯。
多治見市馬賽克博物館
- 岐阜縣多治見市笠原町2082-5
總結
係岐阜玩咗幾日，雖然今次並唔係小編第一次去岐阜，但平時都可能淨係去玩一日，匆匆忙忙就走，錯過咗唔少景點！小編建議大家可以去岐阜玩耐少少，特別係自駕遊嘅朋友！