講起去日本旅行，除咗最熱門嘅東京、大阪之外，京都作為世界著名嘅古都，散發著同大城市截然不同嘅魅力，因此亦深受遊客喜愛。唔少人都會選擇去大阪玩嘅時候順便去京都，如果大家都想咁樣玩，可以參考由關西機場出發去京都交通攻略。小編為大家整理京都嘅最新消息，例如交通資訊、最新景點，記住睇埋落去！
交通資訊
【京都巴士一日周遊券9月起停售】
相信好多人去京都玩嘅時候都有買過「京都巴士一日券」，但係呢款車票將會喺今年9月停止發售啦。由京都市交通局推出嘅「京都巴士一日券」，係好多遊客到訪京都必買嘅車票，有咗佢就可以更方便地周圍去。但係因為去京都玩嘅遊客太多，令前往主要觀光景點嘅巴士經常塞滿遊客，影響到當地居民嘅日常生活。局方見到呢個情況，決定由9月起停止發售「京都巴士一日券」，希望藉此分散觀光人流。
如果已經買咗呢張車票嘅話，2024年3月底前仍然可以使用。不過即使呢張車票即將停售，官方仍然保留「地下鐵+巴士一日券」呢個組合，所以如果大家去京都玩嘅時候想搭巴士，可以考慮下買呢個套票！
景點資訊
【二条城光雕投影夜間賞楓】
就黎到楓葉季，除咗喺日間睇楓葉，仲可以試下夜間賞楓！日本知名光雕藝術團隊「NAKED」與京都世界遺產二条城合作，於10月27日至12月3日期間，舉辦《NAKED GARDEN ONE KYOTO 2023》！活動將以「月與秋夜賞花」為主題，透過結合虛擬技術及實體景觀，帶黎不一樣嘅楓葉景色。除咗可以睇到夜間楓葉點燈，仲可以欣賞喺二条城上演嘅夜間光雕表演。如果呢段時間會去京都，一定要去睇下咁特別嘅二条城！
NAKED GARDEN ONE KYOTO 2023
- 地址： 京都市中京区二条通堀川西入二条城町541 元離宮二条城 (地圖)
- 營業時間：晚上6點 – 晚上10點 (最後入場時間晚上9點)
- 電話：+81 057-0200-888
- NAKED GARDEN ONE KYOTO 2023官方網站
【京都車站購物地標KYOTO TOWER SANDO4月22日重新開幕】
黎緊會去京都旅行嘅話有福啦！京都車站前嘅購物地標KYOTO TOWER SANDO於4月22日重新開幕！
KYOTO TOWER SANDO係一間位於京都塔下嘅購物商場，商場於4月1日迎來開幕6年黎嘅首次大規模裝修，並於4月22日重開。今次嘅工程主要翻新地下一樓、二樓嘅寬敞空間，到時候將會有七間新嘅人氣品牌進駐，包括由和菓子老舖伊藤軒所開設嘅「果菓伊藤軒咖啡廳」、喺京都營業超過20年嘅人氣海鮮居酒屋ANJI全新品牌「京都湯泡飯KASTUO」、主理人曾經榮獲世界甜點大賽亞軍嘅「SUGiTORA」等等，仲會有京都車站一帶最大面積嘅Starbucks。以後去京都車站搭車之前可以去醫肚、買手信先！
KYOTO TOWER SANDO
- 地址： 京都市下京区烏丸通七条下る東塩小路町721-1 (地圖)
- 營業時間：B1F 早上11：00 – 晚上11：00；1F 早上10：30 – 晚上8：30；2F 早上10：30 – 晚上7：00
- 電話：+81 075-746-5830
- KYOTO TOWER SANDO官方網站
【兔年必去：京都兔仔神社】
踏入兔年，相信唔少人都會搵下有咩應節嘅地方可以去，日本人都唔例外！日本有旅遊平台就統計咗十個最熱門有關「兔」嘅景點，今次就同大家介紹第三位嘅京都「兔仔神社」！
呢個被稱為「兔仔神社」嘅地方其實係位於京都嘅「東天王岡崎神社」。因為以前附近一帶係野兔嘅棲息地，再加上東方所對應嘅天干地支係「卯」，而「卯」又代表十二生肖裏面嘅兔，所以兔仔就被視為呢個神社嘅神使。因為神社內充滿可愛嘅兔仔雕像、擺設，又以祈求懷孕、安產、求姻緣靈驗而聞名，所以一向都係相當人氣嘅神社。呢度連繪馬、御守都有兔仔造型，非常可愛。有機會嘅話兔年內一定要去下！
【BIC CAMERA JR京都站店5月7日結業】
BIC CAMERA喺京都唯一一間分店「JR京都站店」於5月7日結業，同時亦代表BIC CAMERA將撤出京都。有網民指呢間分店較偏遠，無想像中方便，再加上鄰近有地理位置較優勝嘅YODOBASHI，BIC CAMERA被比下去係在所難免。以後想行BIC CAMERA嘅話唯有去返大阪啦！
小編提提你，去日本Shopping嘅時候記住用優惠券啊！10間日本熱門商戶都有，包括BIC CAMERA！
酒店資訊
【ASAI京都四條酒店、京都都喜天麗酒店即將開幕】
日本京都今年將會有兩間新酒店開幕，仲要係來自泰國嘅酒店品牌！
泰國逾半世紀嘅酒店品牌「都喜國際」即將進軍日本，兩間位於京都嘅酒店係「ASAI京都四條酒店」、「京都都喜天麗酒店」，分別會喺今年6月及9月落成。兩間酒店都將揉合日式傳統文化及泰國風情，除咗喺餐廳菜式加入泰國元素外，仲可以享受融合古法泰式按摩及日本傳統嘅創新療法，夠晒特別！
相關優惠：關西新酒店推介｜日本首間W酒店！環球影城全新官方酒店｜大阪、奈良、京都新酒店
餐廳資訊
【安妮亞 x 咚兵衛腐皮烏冬】
WakuWaku！安妮亞 x 咚兵衛好可愛啊！
日清咚兵衛系列一向好受歡迎，當中嘅腐皮烏冬相信唔少人都食過。為咗迎接《劇場版 SPY×FAMILY CODE: White》即將上映，咚兵衛一共推出3款安妮亞包裝杯麵，分別係腐皮烏冬、天婦羅蕎麥麵、日清炒麵U.F.O.，全部都印有安妮亞喺上面！最特別嘅係安妮亞頭上嘅角仲變成腐皮，超得意！暫時未知道香港會唔會發售呢幾款杯麵，如果大家想收藏嘅話，去日本嘅時候記得順便入貨！
【Baskin Robbins x Super Mario水管雪糕】
日本連鎖雪糕店Baskin Robbins同Super Mario合作，推出一系列超靚嘅期間限定雪糕，當中最正嘅一定係Mario水管雪糕。除咗可以自己選擇雪糕嘅味道，仲會有無敵星星、磚頭造型朱古力裝飾、Mario撞擊問號磚頭嘅造型立牌！容器仲要係好經典嘅綠色水管！唔少日本人都分享食完之後可以當收納盒，甚至放迷你花草盆栽，好睇又實用，售價750日圓 (約$40)。不過呢款水管雪糕實在太受歡迎，如果想食嘅話可以要行多幾間分店先搵到。
就算買唔到水管雪糕，都可以試下其他聯名系列嘅產品，包括以「紅蘑菇」、「綠蘑菇」為設計概念嘅雪糕。如果買8球雪糕，仲可以獲得Yoshi恐龍蛋造型雪糕杯。全部產品都好精緻啊！Mario系列會發售到10月2日，一定要試下！
Baskin Robbins
【FamilyMart x GODIVA沙冰】
$24就可以飲到超濃嘅GODIVA朱古力沙冰！日本FamilyMart聯乘GODIVA推出朱古力沙冰，由即日起再度發售，每杯只需450日圓 (約$24)！呢款由GODIVA監修嘅朱古力沙冰喺2021年開始於FamilyMart發售，每次推出都大獲好評，今次更加係首次加入杏仁碎增添口感，可可用量比起上年亦有所增加，令朱古力濃度倍增！暫時未知道今次會賣到幾時，如果呢排去日本嘅話大家可以去FamilyMart望下。呢款朱古力沙冰喺FamilyMart嘅雪櫃入面，付款後可以打開包裝，自行喺店內嘅牛奶機加入牛奶，非常方便！
【立體繡球花雪糕】
食得嘅繡球花？會唔會太靚！ 6月至7月係繡球花嘅季節，除咗賞花之外，仲可以試下繡球花雪糕！位於京都嘅(THISIS)SHIZEN 一邊係花店，售賣盆栽、植物，另一邊係就茶屋，一向會推出花卉造型嘅雪糕！而家推出緊嘅繡球花雪糕，朱古力cone裡面裝住雪糕，上面仲有一朵朵嘅繡球花！呢啲繡球花原來係人手用豆蓉製作而成，有啲似和菓子，睇得又食得，打卡一流！暫時未知道呢款繡球花雪糕會賣到幾時，想試嘅話就要盡快啦！
(THISIS)SHIZEN
- 地址：日本京都府京都市中京区烏丸通姉小路下ル場之町586-2 新風館1F (地圖)
- 營業時間：茶屋早上8點 – 晚上11點；植物屋早上10點 – 晚上7點
- 電話：+81 07-5585-5226
- (THISIS)SHIZEN官方網站
【貢茶京都二年坂店開幕】
日本人對珍珠奶茶嘅狂熱拍得住香港人，所以好多連鎖台式飲品店喺日本都有設立分店。京都就有間新嘅貢茶分店開幕，不過睇落同一般貢茶好唔同！ 呢間貢茶「京都二年坂店」以日本家屋為外觀，改建自大正時代初期嘅建築，仲融合咗二年坂周圍嘅景觀，希望藉此宣揚京都嘅魅力。
店內運用咗柔和色調嘅木材、和紙藝術等元素，非常有特色！呢間分店提供兩款限定飲品，分別係宇治抹茶奶茶、黑糖宇治抹茶奶茶。分店位置鄰近清水寺、八坂神社，以後行完景點可以過去坐低飲杯野！
疫情資訊
【日本4月29日起取消3針疫苗證明】
根據日本媒體TBS，隨著日本將於5月8日將新冠病毒傳染病嘅防疫級別下調至第5類，日本亦宣布由4月29日起，入境日本的人士毋須出示新冠疫苗接種證明或檢測無確診證明。至於入境時有疑似新冠症狀嘅人，需在抵埗時進行檢測，一旦確診需要到指定的住宿設施接受治療。不過記住仍然要整Visit Japan Web！
【日本解除口罩令】
日本由今日起正式解除口罩令，無論室內或室外，都由民眾自行判斷是否佩戴口罩。JR東日本早前亦宣布，乘搭電車時無需再戴口罩，並會取消提醒乘客佩戴口罩嘅廣播。
不過有日媒做嘅網絡民調就顯示，有超過一半嘅民眾會繼續戴口罩。其實因為花粉症嚴重，喺疫情前好多日本人本身已經有戴口罩嘅習慣，所以相信即使宜家解除咗口罩令，喺日本街頭唔戴口罩嘅人數都唔會大幅上升。唔知大家去日本玩嘅時候又會唔會繼續戴口罩呢？
唔少人都會將大阪、京都放入同一個旅程入面，如果你都諗住會去埋大阪，就即刻睇下大阪有咩好玩啦！
▼🇯🇵大阪市中心最美溫泉！打卡打到手軟📸｜空庭溫泉♨️梅田出發10分鐘⏱邊日幾點入場最抵玩？
▼大阪最新大型商場🛍三井LaLaport堺｜Food Court先係本體😋｜必食漢堡扒、大阪築地海寶飯、Antiqulture古著店、Onelove寵物用品店
▼🐷比551蓬萊好食嘅大阪豬肉包？2800円牛治？！2022難波心齋橋必食美食🇯🇵｜551HORAI、二見豬肉包、わなか章魚燒🐙、心齋橋三文治🥪、不易糊軟雪糕🍦