日本開關後，唔少人已經迫不及待返鄉下。除咗熱門嘅東京、大阪，近年越黎越多人鍾意去九州旅行。九州位於日本本島嘅西南方，主要有7個縣，分別係福岡縣、大分縣、佐賀縣、長崎縣、熊本縣、鹿兒島縣以及宮崎縣。小編為大家持續更新九州最新旅遊資訊，以及搜羅各個最新景點。覺得淨係玩九州唔夠喉？小編中準備咗東京旅遊資訊、大阪旅遊資訊、京都旅遊資訊、名古屋旅遊資訊，快啲計畫你旅程嘅下一個目的地啦！
福岡縣
【Mister Donut櫻花麻糬冬甩】
櫻花季即將開始，日本Mister Donut都再度推出應節嘅冬甩，四款櫻花麻糬冬甩代表櫻花開花嘅四個階段，分別係「花蕾」、「半開」、「滿開」、以及今年新增嘅「櫻花飄舞」，由2月28日開始發售，去到3月下旬。每年都大受歡迎嘅櫻花麻糬冬甩口感煙韌，「花蕾」撒上國產大豆製成嘅黃豆粉，「半開」採用新鮮嘅櫻花豆沙製成，「滿開」就以櫻花豆沙配上車厘子味巧克力碎，「櫻花飄舞」使用北海道產嘅紅豆沙配上白朱古力、車厘子味巧克力碎。如果拎住去賞櫻花打卡一定好有feel！
Mister Donut
【Mister Donut x GODIVA】
朱古力控注意！$17就食到GODIVA冬甩！
日本Mister Donut同GODIVA合作，推出四款冬甩，包括焦糖朱古力冬甩、堅果朱古力冬甩、朱古力Ganache冬甩、朱古力國王批。頭三款冬甩堂食324日圓 (約$17)、拎走330日圓 ($18)，而朱古力國王批堂食356日圓 (約$19)、拎走363日圓 (約$20)。四個款式都已經喺全日本Mister Donut門市發售。$20內就食到GODIVA，最近去日本嘅話一定要試下先得！
Mister Donut
【LAWSON士多啤梨季開始】
士多啤梨控注意！
日本LAWSON便利店士多啤梨季開始，推出18款同「ICHIBIKO」合作嘅士多啤梨商品，由即日起已經開始發售！當中最受觸目嘅就係士多啤梨牛奶雪糕 (180日圓 約$10)、士多啤梨牛奶 (248日圓 約$13)、士多啤梨牛奶三文治 (462日圓 約$25)等等。「ICHIBIKO」係日本超人氣嘅士多啤梨甜品專門店，今次同LAWSON合作，唔係好貴嘅價錢就可以食到呢啲甜品，好想每樣都試下啊～
【日本麥當勞焦糖奶油批、比利時朱古力批】
繼之前好評如潮嘅燉牛肉批、朱古力三角批，日本麥當勞再推出焦糖奶油批、比利時朱古力批！將會喺1月10日起發售。焦糖奶油批混入奶油餅乾，咬落去即刻散發濃濃嘅奶油香氣，而比利時朱古力批使用比利時黑朱古力內餡，帶出微微苦澀嘅口感。兩款批嘅售價為210日圓 (約$11)，經過麥當勞嘅話不妨試下！
【日本麥當勞士多啤梨三角批、燉牛肉批】
冬天最適合就係食暖笠笠嘅批！
日本麥當勞最近推出兩款新批，分別係士多啤梨三角批、燉牛肉批！士多啤梨三角批內餡使用超濃郁嘅士多啤梨巧克力奶油，加上超可愛嘅貓貓粉紅色包裝。而燉牛肉批係日本麥當勞超人氣商品，已經連續兩年秋冬回歸登場，以牛肉、薯仔、紅蘿蔔等食材燉煮嘅香濃內餡，配上金黃酥脆嘅外皮，一食落去全身都暖笠笠～呢兩款批都係秋冬期間限定，士多啤梨三角批已經開始發售，售價為180日圓 (約$9)，而燉牛肉批就會喺12月6日起發售，售價為220日圓 (約$12)，最近會去日本嘅話一定要試啊！
【福岡11月降初雪】
福岡落雪啦！
日本喺11月18日多數地方天氣都不穩定，位於九州嘅福岡觀測到本季首波降雪，係睽違10年再度喺11月就降初雪！比往年提早足足30日！日本氣象協會表示，因為強烈冷空氣喺18日進入以西日本為主等地區，所以造成今次嘅初雪。計畫去福岡玩嘅朋友，記得著多件衫保暖啊～
【免費派發福岡往長崎等路線車票】
如果打算由福岡玩到長崎，記得免費領取「とりっぷきっぷ長崎・佐世保・ハウステンボス」車票！呢張車票由西鐵巴士推出，原價5,500日圓 (約$287)，票券內包含咗由福岡至長崎、長崎至佐世保・豪斯登堡、佐世保至豪斯登堡及福岡至佐世保・豪斯登堡嘅單程車票，一張車飛就可以去到咁多個景點！
最近有期間限定免費領取活動，只需要預先喺網上填妥表格，收到確認電郵後，喺「福岡機場國際線航站樓1樓巴士櫃台」出示電郵，就可以獲得一張車票。數量限定3,500張，先到先得！不過活動無講明係根據網上填表格嘅順序，定係喺機場領取嘅順序。如果最近會去福岡，小編建議大家可以即刻填咗表格先！
【日本JR東海新增1.5倍闊座位】
日本JR東海推出名為「S WorkP座位」(S WorkPシート) 嘅新座位，即係喺原本嘅三連座中間放一塊隔開，改裝成二人座位，變相每人有1.5個位，令空間增加。除咗空間闊落咗之外，呢款座位仲設有飲品架，前方亦有摺疊式斜檯，以便乘客使用手提電腦。
由10月20日起，「S WorkP座位」將由原本嘅「のぞみNozomi」列車擴闊至JR東海與JR西日本路線嘅「ひかりHikari」及「こだまKodama」列車。如果想坐到呢款座位，每人要額外俾多1,200日圓 (約$63)。唔少日本人都話呢個新服務好好，好值得加錢！唔知大家又會唔會買呢？
【安妮亞 x 咚兵衛腐皮烏冬】
WakuWaku！安妮亞 x 咚兵衛好可愛啊！
日清咚兵衛系列一向好受歡迎，當中嘅腐皮烏冬相信唔少人都食過。為咗迎接《劇場版 SPY×FAMILY CODE: White》即將上映，咚兵衛一共推出3款安妮亞包裝杯麵，分別係腐皮烏冬、天婦羅蕎麥麵、日清炒麵U.F.O.，全部都印有安妮亞喺上面！最特別嘅係安妮亞頭上嘅角仲變成腐皮，超得意！暫時未知道香港會唔會發售呢幾款杯麵，如果大家想收藏嘅話，去日本嘅時候記得順便入貨！
【Cyber Punk未來感神社】
日本有間超有Cyberpunk feel嘅神社！好靚啊！
早前有日本攝影師上載咗一張神社嘅相引起熱話，呢間神社樓梯兩旁嘅燈籠發出紅色嘅光，燈籠上仲有狐狸嘅圖案，非常科幻，好有未來感！有網民問係咪P圖，亦有人問係咪拍戲？
原來呢間神社係真實存在！呢度叫做「中司孫太郎稻荷神社」，位於福岡市西部，由鎌倉時代已經設立，不過將光線裝設喺神社呢個行為就係由戰後開始。呢度喺昭和30年代開始喺鳥居上裝設霓虹燈，目的係希望改善戰後民眾無精打采嘅心情，而家就換上LED燈，吸引好多人專程到訪打卡！
中司孫太郎稻荷神社
- 地址：福岡市中央区西公園13-10 (地圖)
- 電話：+81 092-781-7434
- 開放時間：早上5點 – 晚上8點
- 中司孫太郎稻荷神社官方網站
【VS Park室內運動遊樂場】
就到復活節假期，相信唔少人都準備一家大細去日本玩。如果準備去福岡，VS Park係你小朋友放電嘅好選擇！VS Park係一間結合運動、娛樂、技術元素嘅室內遊樂場，裡面嘅遊戲超過30款，適合大人、小朋友玩嘅都有，例如室內足球、棒球、壁球、射箭、攀，啱晒充滿運動細胞嘅你！呢度仲有唔少考合作嘅遊戲，就好似以前成日喺電視睇到嘅超級無敵大咕窿。除咗可以一家大細黎玩之外，亦適合朋友、情侶一齊挑戰！
▼即刻睇下特派員去玩嘅實測片段！ VS park全日本有6間分店，其中一間就喺福岡！
VS PARK WITH G Lalaport福岡店
- 地址：福岡県福岡市博多区那珂6丁目23-1他 Lalaport福岡内 (地圖)
- 電話：+81 092-558-4347
- VS PARK WITH G Lalaport福岡店官方網站
【THE ROYAL PARK CANVAS 福岡中洲 8月開幕】
香港航空早前宣布開辦福岡航線，大家有無打算去玩呢？ 8月有新酒店開幕，遲啲去旅行時住宿又有多間好選擇！
THE ROYAL PARK CANVAS 福岡中洲將於8月4日開幕，由福岡機場乘搭地下鐵只需四個站就到，相當方便！酒店位於福岡市區購物精華地段「中洲」，鄰近地下鐵「中洲川端站」，周圍有美麗嘅河景、熱鬧嘅購物區，以及地道屋台小食。最特別嘅係酒店以森林系為風格，到處都被植物包圍，而三樓更有以「九州山谷」為主題嘅公共大浴場！房間則以「自然」為主題，以簡約風格嘅木頭裝潢，配上大地色系嘅傢俬，打造居家舒適嘅感覺。
宜家已經可以預訂8月4日起嘅住宿，有興趣嘅話記得去酒店官網預約啦！
THE ROYAL PARK CANVAS 福岡中洲
- 地址： 福岡県福岡市博多区中洲5丁目6 (地圖)
- 電話：+81 092-291-1188
- THE ROYAL PARK CANVAS 福岡中洲官方網站
【mina天神4月完成合併重開】
隨著日本自由行陸續恢復，福岡作為其中一個熱門嘅目的地，當地有唔少新建設施即將開幕迎接遊客嘅到來。其中一個就係大型商場「mina天神」！ 「mina天神」即將與隔離嘅「NORTH天神」合併，成為一棟面積超過6,700坪嘅大型商業娛樂設施，並於4月28日正式重新開幕！到時候會有九州最大嘅UNIQLO、LoFt！另外亦有GU、JINS進駐，更加會有JINS喺日本唯一一間咖啡店！「mina天神」鄰近地下鐵空港線「天神車站」，交通方便，以後去福岡可以盡情shopping！
mina天神
- 地址：福岡県福岡市中央区天神4丁目3-8 (地圖)
- 電話：+81 092-713-3711
- mina天神官方網站
長崎縣
【豪斯登堡聖誕市集、煙花匯演】
準備去九州過聖誕嘅話，豪斯登堡係一個好選擇！
豪斯登堡係位於九州嘅主題樂園，以歐式街道為主題，打造出異國風情嘅園區，例如佢嘅三層旋轉木馬就非常出名，金光閃閃嘅旋轉木馬同聖誕節好啱feel！ 豪斯登堡將會舉辦聖誕活動，即日起至2024年1月8日有「光之街聖誕市集」。除咗有聖誕雜貨、攤位遊戲，仲有好多特色美食，睇相都流晒口水！而聖誕重頭戲煙花匯演，就會喺12月16日、23日、24日、25日嘅晚上8點30分舉行，最特別嘅係可以睇到心型嘅煙花。喺呢度過聖誕一定好有氣氛啊！
豪斯登堡
熊本縣
【南阿蘇鐵路ONE PIECE千陽號】
ONE PIECE fans注意！日本熊本縣有千陽號列車啊！
日本熊本縣嘅「南阿蘇鐵道」經歷熊本大地震後，日前終於全線恢復營運！為咗慶祝鐵路重開，南阿蘇鐵道同日本人氣動漫ONE PIECE合作，設計出千陽號列車，並且已經開始運行啦！車身兩側印有唔少角色，車頭、車尾就有最具代表性嘅獅子頭，而車身內就有漫畫名場面，以及喺行李架上放置藏寶箱，非常有氣氛。
呢架列車除咗喺8月10日至15日每天運行之外，其餘日子只會喺逢星期四至星期日、日本公眾假期運行。每日有6班列車來往立野站與高森站，單程490日圓 (約$27)。車廂內只有48個座位，不設預約，如果滿座就無得搭㗎啦！目前千陽號預計運行一年，ONE PIECE fans一定要去朝聖！
千陽號列車時間表：
- 9:10 – 9:41 高森往立野
- 12:07 – 12:45 立野往高森
- 14:32 – 15:03 高森往立野
- 15:10 – 15:44 立野往高森
- 16:39 – 17:09 高森往立野
- 17:36 – 18:09 立野往高森
【阿蘇熊本機場新航廈3月23日開幕】
HK Express早前公布10月29日起復飛熊本。大家下次去熊本嘅時候，阿蘇熊本機場有新設施！
位於日本九州嘅阿蘇熊本機場，將會有新旅客航廈大樓於3月23日正式開幕。新航廈運用縣產木材，設計亦以木色為主，打造出闊落嘅空間感。呢度設有完善等候空間、購物商店、餐廳、咖啡廳，一共20多間店鋪。
餐廳包括以天草新鮮海鮮製作嘅壽司店「鮨 福伸」、以阿蘇自家牧場養育牛隻製做嘅牛丼料理「あか牛食堂よかよか」、販售熊本名產辛辣蓮藕嘅「おだ商店」、由熊本在地老字號茶店經營嘅「TSUGUTO」等等，全部都充滿日本特色。臨上機之前都可以食返餐好嘅，再買埋手信都仲得。大家下次去熊本玩嗰陣就可以見到煥然一新嘅阿蘇熊本機場啦！
阿蘇熊本機場
- 地址： 熊本県上益城郡益城町大字小谷1802-2 (地圖)
- 電話：+81 096-232-2311
- 阿蘇熊本機場官方網站
【南阿蘇鐵路全線恢復營運】
HK Express 10月29日起復飛熊本，唔少人都計畫去九州旅行。黎緊會去熊本縣玩嘅話交通會更加方便，因為南阿蘇鐵路將於7月全線重開！
熊本縣嘅南阿蘇鐵路依傍住阿蘇山脈而建，沿途風景非常漂亮，不過因為2016年熊本大地震，南阿蘇鐵道受到重創，一度全線停止運行。後來「中松 – 高森」路段已經喺同年恢復行駛，不過「立野 – 中松」路段就因為需要進行大工程，導致一直無辦法開通。好消息黎啦！南阿蘇鐵路早前宣布工程陸續完成，並將會喺今年7月15日恢復全線運行！屆時熊本縣入面嘅基礎交通將會全部重建完成，大家去玩又更方便啦！
大分縣
【鬼滅之刃fans必去八幡竈門神社】
適逢鬼滅之刃刀匠村篇開播，小編身為鬼滅迷，今次就為大家介紹一個日本同鬼滅息息相關嘅神社！八幡竈門神社位於九州大分縣，淨係聽個名同「竈門炭治郎」姓氏不謀而合已經知道唔簡單！呢個神社以前唔算特別出名，但係自從鬼滅播出之後人氣不斷上升，參拜人數更大增30倍，神社更推出以三個主角代表色為主題嘅御守！ 唔少fans仲會畫上同鬼滅有關嘅繪馬，相當有心思！
八幡竈門神社被譽為鬼滅迷朝聖聖地，除咗因為個名之外，仲同神社嘅「鬼造石階」傳說有關。相傳過去當地每晚都會有食人嘅鬼出現，村民因此向神求助，於是神就同鬼講「如果你可以一晚做完100級石梯，我就每晚送人俾你食，但如果你做唔到，就要從此消失於此」。結果鬼只做到99級，天就逐漸變亮，鬼亦只能落荒而逃。呢個傳說嘅內容，同鬼滅劇情裡面有食人嘅鬼，而且仲怕陽光呢一點係咪有幾分相似呢？小編都好想去朝聖啊！
八幡竈門神社
- 地址： 大分県別府市大字内竈1900番地 (地圖)
- 電話：+81 097-766-1633
- 八幡竈門神社官方網站
疫情資訊
【日本4月29日起取消3針疫苗證明】
根據日本媒體TBS，隨著日本將於5月8日將新冠病毒傳染病嘅防疫級別下調至第5類，日本亦宣布由4月29日起，入境日本的人士毋須出示新冠疫苗接種證明或檢測無確診證明。至於入境時有疑似新冠症狀嘅人，需在抵埗時進行檢測，一旦確診需要到指定的住宿設施接受治療。不過記住仍然要整Visit Japan Web！
【日本解除口罩令】
香港航空突發開咗新航線去福岡，大家係咪已經準備好出發去日本呢。大家留意日本已經解除口罩令啦！日本由今日起正式解除口罩令，無論室內或室外，都由民眾自行判斷是否佩戴口罩。JR東日本早前亦宣布，乘搭電車時無需再戴口罩，並會取消提醒乘客佩戴口罩嘅廣播。
不過有日媒做嘅網絡民調就顯示，有超過一半嘅民眾會繼續戴口罩。其實因為花粉症嚴重，喺疫情前好多日本人本身已經有戴口罩嘅習慣，所以相信即使宜家解除咗口罩令，喺日本街頭唔戴口罩嘅人數都唔會大幅上升。唔知大家去日本玩嘅時候又會唔會繼續戴口罩呢？
▼日本福岡最新商場LaLaport！朝聖最球最高高達立像