講起馬來西亞，香港人比較熟悉嘅可能係吉隆坡、沙巴，至於「古晉」就應該比較陌生。古晉位於婆羅洲，屬於「東馬」嘅部分。有趣嘅係一個小小嘅婆羅洲，竟然共存咗3個國家，分別係印尼、馬來西亞以及汶萊。有興趣嚟婆羅洲嘅話，可以計劃下一次玩幾個地方。事不宜遲，睇吓小編去古晉同汶萊有咩好玩！
#小編去旅行｜婆羅洲雙城遊！一次過玩轉古晉及汶萊兩個地方！
巴哥國家公園 (Bako National Park)
嚟到古晉，最唔可以錯過嘅一定係國家公園！古晉一共有9個國家公園，小編今次去咗最古老嘅巴哥國家公園 (Bako National Park)，呢度除咗可以睇到受保護嘅長鼻猴 (Proboscis)、銀葉猴 (Silver leaf Monkey)，仲係150種雀鳥嘅棲息地。當天小編乘坐快艇抵達，落船已經見到長鼻猴家族坐喺樹上等我哋，係肉眼可以睇到嘅距離！沿紅樹森步道都見到好多長尾獼猴，啲長尾獼猴好似好習慣人類，遊人都排住隊同佢哋打卡影相 (當然都建議大家保持返一定距離)。當日行咗一小段步道，雖然較少打卡靚影，但細心欣賞，大家會發現當地獨特嘅生態。
▼巴哥國家公園
▼長鼻猴
除咗生態外，巴哥國家公園更加係地質愛好者嘅天堂，早喺乘坐快艇前往期間，可以見到不同海岸侵蝕嘅岩壁、岩柱地貌，落船沿海灘岸邊徒步，你會發現粉紅嘅砂岩、鐵礦沉積物交疊堆砌嘅加石景，岩石顏色鮮艷，層層疊疊，岩石表面佈滿經海岸侵蝕而形成流紋線條，迷人狀觀。成個巴哥國家公園行程可長可短，最短半日行程已經豐富完滿。
▼巴哥國家公園岩石
紅毛猩猩野生保育中心Semenggoh Wildlife Center
婆羅洲最有代表性嘅動物，當然係紅毛猩猩。紅毛猩猩作為人類嘅近親，佢哋嘅基因與人類相似度達97%。婆羅洲作為紅毛猩猩嘅主要棲息地，近年因不同原因銳減，唔同國家嘅政府，包括古晉，成立野生保育中心作為紅毛猩猩嘅保育及研究基地。從市區前往野生保育中心大約半小時，內有大約20多隻唔同年紀嘅紅毛猩猩。喺疫情之前，遊客如果想前往紅毛猩猩餵食區，需要另外搭Grab坐多一段5分鐘嘅車程，或者步行20分鐘，但隨著小電動車投入服務，令遊客前往餵食區更方便。
黎到餵食區，工作人員簡單講解保育中心嘅運作、紅毛猩猩嘅習性以及注意事項後，就呼喚紅毛猩猩前來餵食區，至於能唔能夠睇到紅毛猩猩，就要視乎運氣。當日我哋運氣不錯，經過大約15分鐘嘅等待，1隻成年雄性紅毛猩猩就喺餵食區進食，亦停留咗一段時間俾大家影相、觀賞，離開時更展現咗一段雨林中跳躍穿梭嘅精彩表演，大家都盡興而歸。
▼紅毛猩猩
▼紅毛猩猩野生保育中心電動車
河濱公園遊船 (Waterfront City Tour)
唔想攀山涉水，想輕鬆細味古晉嘅城市美，推薦大家去古晉河濱公園散步。唔止可以欣賞兩岸景色，附近嘅亞答街 (唐人街) 亦係地道美食、買紀念品嘅好去處。除咗喺附近用半日時間閒逛放鬆之外，小編更推薦大家乘搭遊船欣賞砂拉越河兩岸嘅景緻。每日下午5點30都有一班船，沿途不但可以遠眺宏偉嘅砂拉越州立議會大廈、瑪格麗城堡，更可欣賞砂拉越河兩岸嘅城市面貌。由於正值日落時份，遊客更可以享受夕陽下古晉嘅美好。
遊船船票係RM65 (約$114)，船上提供簡單小食，仲有民族舞蹈表演欣賞。由於日落遊船每日只設一班，經常爆滿，建議大家提早購票。船上不設劃位，建議大家可以提早15-30分鐘黎，較大機會坐到心水影相靚位。
▼古晉河濱公園遊船
▼古晉河濱公園遊船
後編：婆羅洲雙城下一站—汶萊
除咗以上推介，古晉仲有好多好玩嘅地方等待大家過嚟發掘，小編嘅行程又點會咁快就完結！喺古晉逗留幾日後，小編就乘坐汶萊皇家航空嘅航班，由古晉前往汶萊，展開婆羅洲下半部分旅程。
小編今次乘坐汶萊航空，一次過玩晒古晉、汶萊。相比起婆羅洲另外2個國家 (馬來西亞、印尼)，汶萊嘅國土面積相對較少，但卻係現存世界上，仍由蘇丹作為最高領袖嘅兩個國家之一，人均收入亦遠高於馬來西亞、印尼。今次嚟到呢一個保留濃厚宗教色彩，但又相對富裕嘅國家，小編都發掘到汶萊地道嘅一面。
▼ 汶萊皇家航空
掃街必去加東夜市
汶萊夜晚有咩地方玩？當然唔可以錯過加東夜市掃街！加東夜市係汶萊最出名嘅夜市，又名「1元夜市」。故明思義，用汶幣1元 (約$6元) 就可以買到小食。夜市佔地廣闊，約有上百個攤檔，而且喺室內唔會受天氣影響。夜市以售賣燒烤嘅攤擋為主，其中最出名、最受遊客歡迎嘅小食就係烤雞屁股 (又稱「七里香」)。串燒價錢非常相宜，汶幣1元就可以買到4-6串串燒，非常抵食！
除咗燒烤外，夜市仲有好多售賣東南亞國特色甜品糕點，以及當地水果飲料嘅攤擋。另外亦有一啲乾貨攤檔，建議大家預留1-2小時行。加東夜市除咗係遊客掃街好去處，更加係當地人嘅食堂。由於售賣嘅食物價格相宜，唔少當地人放工後都會特登過黎買嘢食。大家可以喺度發掘最地道嘅汶萊人生活以及文化！
▼ 汶萊加東夜市
▼ 汶萊加東夜市
▼ 汶萊加東夜市
▼ 汶萊加東夜市
▼ 汶萊加東夜市
「東方威尼斯」甘榜亞逸水上村
汶萊俾大家嘅印象係一個現代富裕嘅國家，但遠在未發現石油之前，汶萊人都係居住在水上，以發展水上聚落貿易為主。去到今日，雖然大部分汶萊人已遷往陸上居往，但稱為「甘榜亞逸」嘅水上村仍然存在。呢度擁有42個聚落，居住人口超過三萬人，有「東方威尼斯」之稱，係全世界最大嘅水上村。
當日小編喺斯里巴加灣海濱出發，乘坐「水上的士」(快艇) 前往水上村莊。水上屋與屋之間以木板連結，村莊看似簡陋，但內裡供電、衛星通訊一應俱全，而且有屬於水上村嘅學校、警局、醫院、宗教禮拜場所等。當日小編參加咗當地觀光行程，有機會進入當地人嘅水上屋參觀，品嘗簡單下午茶。
下午茶後，我哋就繼續乘快艇前往鄰近嘅紅樹林探索長鼻猴，咁啱與外出覓食嘅長鼻猴家族相遇，完滿咗喺斯里巴加灣嘅半日行程！
▼ 甘榜亞逸水上村 水上的士
▼ 甘榜亞逸水上村
▼ 甘榜亞逸水上村
▼ 長鼻猴
蘇丹登基銀禧紀念館
難得黎到全球唯二兩個以蘇丹作為元首嘅汶萊，如果想更了解「蘇丹」，就一定要黎呢個博物館！博物館建於1992年，由現任蘇丹所建，裡面收藏大量蘇丹皇室嘅文物。另外，博物館亦以大量文物、相片展示現任蘇丹於1968年登基嘅盛況，其中喺大廳更擺放咗登基大典嘅御用馬車，十分狀觀！
館內大部分地方示禁止攝影，而且有唔少保安，遊客大部分時間只能以眼睛觀賞館內收藏。喺整個參觀過程中，唔難發現現代汶萊嘅富裕及奢華，仲可以了解汶萊嘅歷史、文化，值得各位抽2-3個小時前來參觀！
▼ 蘇丹登基銀禧紀念館
▼ 蘇丹登基銀禧紀念館
