講到去日本玩，相信大部分香港人都會第一時間諗起東京、大阪、北海道，呢啲熱門旅遊目的地。其實名古屋亦係一個好值得到訪嘅地區。名古屋糅合新舊風格，除咗有先進現代化嘅一面，同時亦保留古色古香嘅歷史文化建築。最近仲有一個好受歡迎嘅新景點開幕，就係吉卜力樂園！小編為大家持續更新名古屋最新旅遊資訊，以及搜羅各個最新景點。如果打算去名古屋賞櫻花，記住睇埋日本2023櫻花攻略！
交通資訊
【名古屋扶手電梯禁止行走】
做呢份工每日要搭幾多次電梯？
名古屋喺10月1日起正式實施規定，要求乘客喺扶手電梯上必須保持站立，唔可以行走或者奔跑。近日有日本網民分享照片，官方為咗令大眾知道呢項新規定，派員工著住鮮紅色制服，揹住黃色巨大手掌形狀告示牌，上面標示「STOP」，呼籲民眾企定定唔好行，減少因不當使用扶手電梯而導致嘅意外事件。香港人咁分秒必爭，可能會唔係好習慣，去到名古屋記得要遵守呢個規定！
來源：Twitter @Rabbit_D06
【名古屋4個地下鐵站改名】
隨著日本放寬名古屋航班，終於可以去名古屋玩啦！不過要留意名古屋有四個地下鐵站已經改咗名啦！
名古屋市營地下鐵有四個車站改咗名，分別係「市役所駅」改為「名古屋城駅」、「神宮西駅」改為「熱田神宮西駅」、「伝馬町駅」改為「熱田神宮伝馬町駅」、「中村区役所駅」改為「太閤通駅」。 改名嘅原因係為咗令遊客更容易搵到觀光景點，就好似本來嘅「市役所駅」咁，雖然係距離名古屋城最近嘅車站，但係車站名難以令人聯想到名古屋城，甚至仲令唔少遊客錯誤地喺隔離嘅「名城公園駅」落車，相信今次嘅改名會令遊客更加方便，更容易搵到目的地！
景點資訊
【名古屋哈利波特專門店秋季開幕】
Fans必定要朝聖！名古屋都有哈利波特專門店啦！哈利波特主題商店 (Harry Potter – Mahou Dokoro) 係專門發售官方商品嘅店鋪，由服飾、家居用品、公仔都有，上年6月於東京赤坂開設後已經大受歡迎！名古屋榮公園店將於今年秋季開幕，不過就未有確實日期，如果黎緊會去名古屋可以留意住！
哈利波特主題商店
- 地址： Oasis 21 榮公園店 B1F (オアシス21 B1F) 愛知県名古屋市東区東桜1-11-1 (地圖)
- 開放時間：早上10點 – 晚上9點
- 哈利波特主題商店購票網站
【吉卜力樂園】
相信一眾睇住宮崎駿動畫長大嘅fans一直都好希望有一個以吉卜力為主題嘅樂園，期待咗咁耐，全球首個吉卜力主題樂園終於開幕啦！
呢個位於日本名古屋愛知縣嘅吉卜力樂園 (ジブリパーク) 喺2022年11月1日正式揭幕，但係想去朝聖都唔係咁簡單，可以話係一票難求！雖然而家淨係開放咗三個園區，但係已經夠晒玩全日！三個園區都有好多還原吉卜力動畫名場面嘅打卡位，如果同小編一樣由細睇吉卜力動畫睇到大嘅話，一定每個位都影相影到唔捨得走！
好消息！日本吉卜力公園已經喺2023年3月15日起開放俾海外遊客入場啦！
如果想了解吉卜力樂園詳情、購票方法、小編直擊後嘅感想，就要睇埋吉卜力樂園攻略！
▼🇯🇵吉卜力迷必去！愛知縣吉卜力公園😍｜一片睇晒3個園區看點！📍
吉卜力樂園
- 地址： 愛知県長久手市茨ケ廻間乙1533-1 内 Expo 2005 Aichi Commemorative Park (Moricoro Park) (地圖)
- 開放時間：平日10am – 5pm；星期六、日及公眾假期9am – 5pm
- 休園日：逢星期二
- 電話：0570-089-154
- 吉卜力樂園官方網站
- 海外遊客購票網站
相關優惠：2024福岡新酒店｜精選10間高質新酒店、鄰近地下鐵站交通方便｜有大浴場、24小時Cafe、共享廚房
餐廳資訊
【Mister Donut櫻花麻糬冬甩】
櫻花季即將開始，日本Mister Donut都再度推出應節嘅冬甩，四款櫻花麻糬冬甩代表櫻花開花嘅四個階段，分別係「花蕾」、「半開」、「滿開」、以及今年新增嘅「櫻花飄舞」，由2月28日開始發售，去到3月下旬。每年都大受歡迎嘅櫻花麻糬冬甩口感煙韌，「花蕾」撒上國產大豆製成嘅黃豆粉，「半開」採用新鮮嘅櫻花豆沙製成，「滿開」就以櫻花豆沙配上車厘子味巧克力碎，「櫻花飄舞」使用北海道產嘅紅豆沙配上白朱古力、車厘子味巧克力碎。如果拎住去賞櫻花打卡一定好有feel！
Mister Donut
【Mister Donut x GODIVA】
朱古力控注意！$17就食到GODIVA冬甩！
日本Mister Donut同GODIVA合作，推出四款冬甩，包括焦糖朱古力冬甩、堅果朱古力冬甩、朱古力Ganache冬甩、朱古力國王批。頭三款冬甩堂食324日圓 (約$17)、拎走330日圓 ($18)，而朱古力國王批堂食356日圓 (約$19)、拎走363日圓 (約$20)。四個款式都已經喺全日本Mister Donut門市發售。$20內就食到GODIVA，最近去日本嘅話一定要試下先得！
Mister Donut
【LAWSON士多啤梨季開始】
士多啤梨控注意！
日本LAWSON便利店士多啤梨季開始，推出18款同「ICHIBIKO」合作嘅士多啤梨商品，由即日起已經開始發售！當中最受觸目嘅就係士多啤梨牛奶雪糕 (180日圓 約$10)、士多啤梨牛奶 (248日圓 約$13)、士多啤梨牛奶三文治 (462日圓 約$25)等等。「ICHIBIKO」係日本超人氣嘅士多啤梨甜品專門店，今次同LAWSON合作，唔係好貴嘅價錢就可以食到呢啲甜品，好想每樣都試下啊～
【日本麥當勞焦糖奶油批、比利時朱古力批】
繼之前好評如潮嘅燉牛肉批、朱古力三角批，日本麥當勞再推出焦糖奶油批、比利時朱古力批！將會喺1月10日起發售。焦糖奶油批混入奶油餅乾，咬落去即刻散發濃濃嘅奶油香氣，而比利時朱古力批使用比利時黑朱古力內餡，帶出微微苦澀嘅口感。兩款批嘅售價為210日圓 (約$11)，經過麥當勞嘅話不妨試下！
【日本麥當勞士多啤梨三角批、燉牛肉批】
冬天最適合就係食暖笠笠嘅批！
日本麥當勞最近推出兩款新批，分別係士多啤梨三角批、燉牛肉批！士多啤梨三角批內餡使用超濃郁嘅士多啤梨巧克力奶油，加上超可愛嘅貓貓粉紅色包裝。而燉牛肉批係日本麥當勞超人氣商品，已經連續兩年秋冬回歸登場，以牛肉、薯仔、紅蘿蔔等食材燉煮嘅香濃內餡，配上金黃酥脆嘅外皮，一食落去全身都暖笠笠～呢兩款批都係秋冬期間限定，士多啤梨三角批已經開始發售，售價為180日圓 (約$9)，而燉牛肉批就會喺12月6日起發售，售價為220日圓 (約$12)，最近會去日本嘅話一定要試啊！
【角落生物期間限定Cafe】
為咗慶祝角落生物第三部動畫電影即將上映，東京、大阪、名古屋都將會有期間限定主題Cafe！餐點以角落生物角色為主題，全部都好得意啊！好適合帶埋小朋友去！不過每個地方嘅開始、結束日期都唔同，大家要留意～ 如果打算去嘅話，可以事先喺官網預約！
BOX cafe&space 名古屋ラシック2号店
【安妮亞 x 咚兵衛腐皮烏冬】
WakuWaku！安妮亞 x 咚兵衛好可愛啊！
日清咚兵衛系列一向好受歡迎，當中嘅腐皮烏冬相信唔少人都食過。為咗迎接《劇場版 SPY×FAMILY CODE: White》即將上映，咚兵衛一共推出3款安妮亞包裝杯麵，分別係腐皮烏冬、天婦羅蕎麥麵、日清炒麵U.F.O.，全部都印有安妮亞喺上面！最特別嘅係安妮亞頭上嘅角仲變成腐皮，超得意！暫時未知道香港會唔會發售呢幾款杯麵，如果大家想收藏嘅話，去日本嘅時候記得順便入貨！
【FamilyMart x GODIVA沙冰】
$24就可以飲到超濃嘅GODIVA朱古力沙冰！日本FamilyMart聯乘GODIVA推出朱古力沙冰，由即日起再度發售，每杯只需450日圓 (約$24)！呢款由GODIVA監修嘅朱古力沙冰喺2021年開始於FamilyMart發售，每次推出都大獲好評，今次更加係首次加入杏仁碎增添口感，可可用量比起上年亦有所增加，令朱古力濃度倍增！暫時未知道今次會賣到幾時，如果呢排去日本嘅話大家可以去FamilyMart望下。呢款朱古力沙冰喺FamilyMart嘅雪櫃入面，付款後可以打開包裝，自行喺店內嘅牛奶機加入牛奶，非常方便！
疫情資訊
【日本4月29日起取消3針疫苗證明】
根據日本媒體TBS，隨著日本將於5月8日將新冠病毒傳染病嘅防疫級別下調至第5類，日本亦宣布由4月29日起，入境日本的人士毋須出示新冠疫苗接種證明或檢測無確診證明。至於入境時有疑似新冠症狀嘅人，需在抵埗時進行檢測，一旦確診需要到指定的住宿設施接受治療。不過記住仍然要整Visit Japan Web！
【日本解除口罩令】
日本由今日起正式解除口罩令，無論室內或室外，都由民眾自行判斷是否佩戴口罩。JR東日本早前亦宣布，乘搭電車時無需再戴口罩，並會取消提醒乘客佩戴口罩嘅廣播。
不過有日媒做嘅網絡民調就顯示，有超過一半嘅民眾會繼續戴口罩。其實因為花粉症嚴重，喺疫情前好多日本人本身已經有戴口罩嘅習慣，所以相信即使宜家解除咗口罩令，喺日本街頭唔戴口罩嘅人數都唔會大幅上升。唔知大家去日本玩嘅時候又會唔會繼續戴口罩呢？
▼名古屋必食必玩經典路線！2022最新打卡點｜Komeda’s Coffee、大須商店街、KOMEHYO古著、動漫商店街、矢場炸豬扒、則武之森、名古屋打卡書店
▼大阪最新大型商場🛍三井LaLaport堺｜Food Court先係本體😋｜必食漢堡扒、大阪築地海寶飯、Antiqulture古著店、Onelove寵物用品店
▼超級任天堂世界徹底攻略！3800円手帶洗唔洗買？園區竟然有隱藏景點！