小編一向都鍾情於東南亞天氣同美食，繼之前去完泰國同馬來西亞後，今次就去到新加坡玩番幾日！出發前仲知道濱海灣花園Garden by the bay 有最新限定阿凡達主題活動、晚間仲有聖誕仙境市集，真係可以由日玩到夜。如果你係多啦A夢fans仲可以去埋期間限定藝術展添！除此之外，今次有當地人帶路去玩同搵食，發掘新加坡最新活力同多元化一面！
「最新景點/玩樂/行程」
《阿凡達：全新體驗》登陸新加坡濱海灣花園Garden by the bay
阿凡達續集水之道已經上映啦！大家衝咗去戲院睇未呢？宜家新加坡濱海灣花園由即日起至明年3月底前，將雲霧林Cloud Forest打造潘朵拉星球電影場景，場館共分為5大展區，仲有多項互動裝置，進場後就會見到栩栩如生嘅斑溪獸於瀑布下，之後沿路一邊往前行，邊欣賞各種令人驚豔奇幻造景，邊感受同潘朵拉世界連結。想知更多可以上訂購網睇門票詳情呀！
▼場館展示咗成獸同幼獸班溪獸，無論移動型態、神色都好似真實動物！
▼大家仲可以Avatarize Yourself，睇下自己納美人個樣係點先
▼沿路或由雲霧林瀑布最高層一路往下行，仲有唔少互動體驗，好似敲擊蘑菇可以觸發螢光脈動，光線會隨著藤蔓往上爬
▼終於見到Jake同Neytiri
▼遊客可以透過AR技術裝置化身成斑溪獸，揮動雙手扮演螢幕中嘅斑溪獸，翱翔在森林當中
▼行到場館最後仲見到續集水之道世界同奇幻海洋生物 Ilu 雕塑，真係令人好想快啲睇續集呀！
▼最後唔好錯過呢個燈光投射場境，完全融入咗潘朵拉世界
熱辣辣體驗Christmas wonderland 2022 聖誕仙境
黎到新加坡濱海灣花園，仲可以玩埋晚間聖誕仙境，真係由日玩到夜，同過一個熱辣辣聖誕添！今年黎到第九屆聖誕仙境，將分為六個區域，包括St. Nick’s Square，Merry Lane、Games Village、ELFresco、Mistletoe Alley同Gingerbread Grove，處處都係打卡位，咁多年來都深受本地人同遊客入場玩樂！宜家至23年1月1日前出發都可以去玩架！>>門票詳情
▼ St. Nick’s Square位於聖誕仙境的中心地帶，是活動場地最大的活動區，21米高Spalliera矗立於此
▼仲有雙層旋轉木馬，但需要再另外買飛架！
▼Merry Lane 區域可以體驗熱帶地區「落雪」奇景
▼每晚7:45、8:45同9:45花園狂想曲Garden Rhapsody將會有燈光同音樂表演，每棵 Supertree仲會閃閃發光
▼有好多岩哂打卡聖誕華麗燈飾
首次在日本以外舉行！「THE 多啦A夢展」THE Doraemon Exhibition Singapore 2022
多啦A夢衝到黎新加坡啦！呢個展覽仲首次係日本以外舉行！於新加坡國家博物館內展示28位日本當代藝術家同藝術團體嘅畫作、雕塑、攝影等，仲首次展出2位新加坡當代藝術家羅傑瀚及攝影大師紀嘉良作品添！門票詳情
▼於Exhibition Gallery 2外就係新加坡2位藝術家展覽作品
▼仲有村上隆巨型畫作
▼係記憶麵包呀！
坐復古車！3個車轆遊新加坡市中心
想遊新加坡，唔一定要用自己雙腳行！好似小編咁參加呢個復古車遊，由司機導遊揸住vespa 復古車帶住遊市中心。由於前幾日小編已經行過牛車水China town、哈芝巷等景點，所以司機導遊就帶我地去小印度，沿路一路講解下新加坡建築物或歷史，成個行車期間都無悶場，仲帶我地去幾個壁畫打卡位幫手影靚相，唔講仲以為師傅係專業攝影師添！行程詳情
▼原以為坐係卡車會好熱，但沿途都算好清涼，不過經過大型巴士可能會吸廢氣囉。（笑）
▼行程最後仲去到Crazy Rich Asians婚禮拍攝地贊美廣場Chijmes，屬百年歷史的哥德式教堂，位於city hall 站，夜晚可以黎試下餐廳同酒吧，氣氛一流！
新加坡雪糕博物館！粉紅迷必到！任食多款雪糕！
新加坡雪糕博物館Museum of Ice Cream Singapore係2021年開幕，由美國紐約帶入亞洲區第一家分店，整個場館以粉紅色系搭配其他繽紛色彩，入場後仲以為去咗ＭＶ拍攝地！14個獨特主題場景仲可以瘋狂打卡同任食多款雪糕，真係消暑行程必去景點！門票詳情
▼一入場小編見到整片粉紅色，即刻好想唱Ice cream chillin’ chillin’~
▼留意到重點嗎？哈哈
▼雪糕款式多到唔記得食咗咩味啦！哈哈
▼多個打卡位仲有彩虹波波池
▼Museum of Ice Cream Singapore
「吃喝盡在新加坡」
要數新加坡有咩著名美食，胡椒蟹，叻沙/喇沙，肉骨茶，蝦面一樣都唔少得！大家係餐廳、熟食中心或夜市都會搵到。今次小編去咗幾日仲跟住local 人覓食，滿足哂小編肚皮呀！
Holy crab
Holy Crab 係由私廚轉型新加坡獨立餐廳，原來仲係全國唯一擁有超過10種口味螃蟹專門店。螃蟹由斯里蘭卡新鮮入口肉蟹，開業只係約五年，連本地人都推薦，室內坐到舒服嘆胡椒蟹！
▼斯里蘭卡肉蟹肥美飽滿，仲爆多膏好邪惡，呢款以黑胡椒加自家製蟹湯及咖喱葉，入口已經辣到有麻痺感
▼呢款以雞蛋，咖喱葉，檸檬葉同自家製紅辣椒醬，入口蛋香但後勁辣，而且食蟹一定要配炸饅頭，用黎點醬汁食一流
▼仲有鹹蛋炸蝦都係必試！
▼Holy crab
YY Kafei Dian 喜園咖啡店
當地人食早餐都會去到呢啲南洋咖啡室，亦係遊客必試最local早餐之一！有一日朝早八點去到都已經大排長龍，仲要全部都係當地街坊熟客。小編即刻問佢地有咩推薦同點order，大家都會點經濟米粉、咖央麵包、半熟蛋等。佢地會外賣或者坐低再叫杯Kopi (姐係黑啡+煉奶)慢慢嘆，所以我地都叫咗呢幾款試試！教大家幾個簡單咖啡用語「Kopi黑啡+煉奶」、「Kopi O黑啡+糖」、「Kopi C黑啡+煉奶+淡奶」，去到就學當地人叫法啦！
▼半熟蛋加胡椒粉，豉油撈勻點麵包食
▼經濟米粉有炒米粉、炒麵、炸魚餅、午餐肉同香腸等
▼YY Kafei Dian 喜園咖啡店
白蘭閣街蝦麵
除了喇沙/叻沙外，蝦麵係新加坡都係當地人常吃麵類，有日去到哈芝巷時，見到呢間白蘭閣街蝦麵都有唔少人排隊。一場黎到有少少餓就坐低試試，叫左蝦同排骨雙拼，蝦身有切半，湯頭應該用上蝦頭同豬骨去熬煮，但蝦味唔算好出，麵條有點似米線加油麵。
▼蝦同排骨雙拼麵
▼白蘭閣街蝦麵
▼哈芝巷
麥士威熟食中心Maxwell Food Centre
位於牛車水附近嘅Maxwell熟食中心，已經見到幾間店面有好多人，其中一間原來係食Rojak 囉惹，呢款其實係以蔬菜同水果作為salad，有菠蘿、黃瓜、油條配上以蝦膏、碎花生、青檸等醬汁混合而成，酸甜辣味樣樣有，算係新加坡地道食品之一！另一間中國街五香貫腸都係熟食中心老店之一，我地試咗綜合拼盤，有招牌傳統福建五香捲、貫腸、豬肝卷、蛋片等。其中五香捲包著豬肉、炸得外皮香口惹味，更有特製甜辣醬。另外Maxwell地鐵站今年已正式啟用，遊客去搵食就更方便。
▼地道食品Rojak 囉惹
▼中國街五香貫腸
▼麥士威熟食中心
馬來西亞餐廳Hjh Maimunah
Hjh Maimunah位於哈芝巷附近嘅馬來西亞餐廳，早年仲獲得米芝蓮必比登推介！主打馬來西亞菜同印尼美食，包括印尼烤雞、巴東牛肉、炸豆腐等。食物份量十足又平，午市時真係勁多人外賣同堂食！
▼烤雞嫩滑多汁
▼炸豆腐成座山咁高
呢一篇小編就先介紹景點同埋美食推介，黎緊出發去新加坡可以參考小編行程去體驗，又或者等你地發掘介紹番俾我地知！下一篇仲有聖淘沙新酒店同市中心酒店介紹，記得密切留意啦。
特別鳴謝新加坡旅遊局機票住宿安排。