等咗足足三年，終於都等到台灣開關啦！一講到去台灣旅行，唔少人都會即刻聯想到美食、夜市、購物。其實台灣仲有另一種玩法，就係療癒之旅！過去幾年因為疫情關係，好多香港人都被逼困喺屋企，日日對住四面牆。難得開返關，當然要去感受下台灣嘅大自然。小編早前去台灣旅行嘅時候，就plan咗一個以療癒身、心靈為主題嘅行程，好適合平時生活節奏咁急速嘅香港人，大家去台灣玩嘅時候都可以好好relax下！出發之前記住要整定入台證！亦可以睇埋台灣自由行常見Q&A！
目錄
第一站——水月休閒藍鯨魚寮
位於新竹市嘅「水月休閒藍鯨魚寮」，早期以育苗、養殖為主。魚寮主人陳彥呈自小就喺父親開設嘅養殖場長大，曾飼養過石斑、草蝦、斑節蝦等水產，後來轉型為休閒海釣場。而家佢哋結合「現撈自家畜養海鮮」及「現場烹煮無菜單料理」嘅理念，俾遊客親自撈魚，再用所得食材親自下廚，自行準備午餐。實不相瞞，小編平時好少下廚，雖然準備午餐嘅過程有啲手忙腳亂，但係覺得成個體驗好有趣！因為由食材到菜式都係自己準備，所以有種回歸大自然、原始生活嘅感覺，係平時喺香港比較少有嘅體驗。
▼水月休閒藍鯨魚寮
▼導師示範製作步驟
▼參加者親自下廚
水月休閒藍鯨魚寮
- 地址：台灣新竹縣竹北市西濱路一段69巷51-1號 (地圖)
- 電話：+886-3-556-5577
- 開放時間：上午9:00 – 下午6:00
- 水月休閒藍鯨魚寮介紹網站
第二站——森18心靈劇場
下一個目的地可以話係成個療癒行程嘅重頭戲，就係森18心靈劇場。淨係聽個名都聯想到係同「森林」、「心靈」有關。台灣近年開始流行「森林療癒」(Forest Therapy)，係一種透過應用森林環境，以增進健康嘅自然療法或環境療法。森18心靈劇場位於森林入面，喺導師帶領之下，參加者沐浴於「森林浴」之中，導師更會教導如何與樹木連結，聆聽自己內心深處嘅想法，從而放鬆身、心靈，獲得平靜。
▼森18心靈劇場環境
▼導師帶領與樹木交流
感受完大自然後，導師帶領參加者進行品茶，喺品茶嘅過程中探索自己內在潛意識。品茶時，參加者會按照自己對每種茶嘅感受填寫「意識圖」。之後導師會根據你填寫嘅文字、圖形進行講解，解讀你潛意識中嘅煩惱，並提供放鬆心靈嘅方法。
▼品茶環節
▼每人一份茶葉及意識圖
▼細味每一款茶葉
最後，導師更會進行一場「頌缽」，令參加者感受深層放鬆。閉上雙眼，乜都唔使諗，聽住頌缽嘅聲音以及輕柔嘅音樂聲，好耐都未試過咁放鬆。小編認為呢個體驗好適合平時生活壓力咁大嘅香港人！
▼頌缽環節
森18心靈劇場
- 地址：台灣南投縣名間鄉田仔村田仔巷16-8號 (地圖)
- 電話：+886-049-2273797
- 森18心靈劇場官方網站
第三站——溪頭福華渡假飯店：森林家宴
黎到晚上入住嘅酒店——溪頭福華渡假飯店，酒店位於南投縣鹿谷鄉森林裡面，雖然交通唔算特別方便，不過勝在有種遠離塵囂、被大自然包圍嘅感覺。到達後喺酒店餐廳享受「森林家宴」，酒店職員解釋叫做家宴嘅原因，係因為入住嘅客人都成為森林嘅一份子，大家都係一家人。咁warm，食起上黎特別有份人情味！菜式使用嘅食材都係南投在地物產，所以全部都好新鮮！
▼溪頭福華渡假飯店
▼溪頭福華渡假飯店
▼森林家宴
▼凍頂烏龍茶香低舒肥成雞
▼信義茶梅手工蛋糕
第四站——溪頭福華渡假飯店：頌缽
享受完森林家宴之後意猶未盡，未想返房休息？唔緊要，溪頭福華渡假飯店提供好多唔同類型嘅活動，例如瑜伽班、頌缽班、香薰班、DIY手作課程，小編當晚就體驗咗頌缽班。同日間喺森18心靈劇場體驗嘅頌缽有啲唔同，呢度提供埋一張張嘅瑜珈墊以及枕頭，甚至有埋棉被，俾參加者瞓喺度體驗頌缽。過程中導師會進行頌缽，仲會播放輕柔嘅音樂，參加者要做嘅只係閉上雙眼，放鬆身體，聆聽周圍嘅頌缽聲音，就算真係瞓著咗都無所謂。導師話進行完呢個頌缽課程後，晚上會瞓得比平時更好，更容易達到深層睡眠。小編實測當晚真係比較容易入睡，一覺瞓到天光！
▼夜間頌缽環節
第五站——溪頭福華渡假飯店：森林療癒之旅
瞓飽飽之後又係新嘅一日，喺酒店嘅Hovii Cafe享用完自助早餐之後，小編參加咗酒店嘅另一個活動。溪頭福華渡假飯店位於森林之中，酒店更加係由臺灣大學實驗林管理處研究及管理，酒店亦有好好善用呢個優勢，舉辦同森林有關嘅活動，例如晨間森林散步、夜間生態導覽活動，以及小編參加嘅森林療癒之旅。
喺「森林療癒師」嘅帶領之下，參加者喺與酒店相鄰嘅溪頭自然教育園區散步，沐浴於森林浴之中。隨後由導師帶領進行一系列舒展運動，將注意力放喺周圍大自然嘅聲音、微風嘅變化上，感受與大自然融為一體嘅感覺。導師亦解釋植物會釋放芬多精，只要逗留喺森林之中，哪怕係短短15分鐘，都會發現自身嘅壓力以及感官敏感度會有所不同。小編係第一次喺森林入面進行呢種體驗，做完後感覺好fresh，個人比平時更有精神！
▼Hovii Cafe自助早餐
▼森林療癒之旅
▼導師帶領舒展運動
溪頭福華渡假酒店
- 地址：台灣南投縣鹿谷鄉森林巷10號 (地圖)
- 電話：+886-049-2612588
- 溪頭福華渡假飯店官方網站
大家睇完呢個療癒行程之後想唔想試下呢？小編平時去台灣都係以飲飲食食、行街shopping嘅行程為主，今次初嘗大自然之旅，覺得有種不一樣嘅感覺，好似發掘咗台灣嘅另一面咁！小編認為呢類型嘅行程好適合香港人，平時返工返學生活步伐已經咁急速，去旅行嘅時候放慢腳步，好好欣賞大自然嘅美，不失為一種好選擇！
搶先直擊！台北市面及夜市現況！
台灣陸委會早前終於宣布，放寬香港居民前往台灣自由行，相信大家同小編一樣好掛住台灣！小編為大家現場直擊台北最新市況，睇下桃園機場多唔多人、士林夜市有咩唔同咗！另外，今日開始就可以申請入台證啦，記得留意片入面兩種申請方法，做足準備去台灣玩！
