係出發之前，小編想像中嘅亞美尼亞係古色古香，充滿住好多古建築物。不過當小編去到首都，發現原來當地都幾現代化，仔細睇睇個地圖，原來個設計大有玄機添！亞美尼亞人崇拜太陽，認為太陽係生命的象徵，所以由高空俯瞰，會見到首都中心係一個圓形，建築物呈現住放射性形狀。葉里溫可分成新城同埋舊城區，俾小編嘅感覺係好歐洲同埋井然有序，完全睇唔出僅僅一百年前曾經遭遇過悲慘嘅經歷。
除了建築物之外，當地熱情友好的人亦令小編留低深刻印象！據Lonely Planet所載，好客嘅人係亞美尼亞一大特色！小編親身經歷完的確如此，亞美尼亞人既好客程度堪比伊朗！話說我地岩岩到埗想搵找換店嘅時候，路人好詳細咁教完我地都仲係唔放心，仲想幫我地俾埋錢截的士(當然最後小編s婉拒咗)！而當小編獨自係街度閒逛嘅時間，突然有個伯伯走嚟送我一串提子，仲要係已經洗好咗，令小編過咗一個好溫暖嘅早上。
因為時間關係，今次小編只能淺遊亞美尼亞首都，但亞美尼亞其實有更多精彩的地方，好似有千年歷史的修道院，同埋未被承認的國家-納卡共和國。不過唔緊要，今次旅程的遺憾，可能係下次旅程的契機！
