國泰航空Cathay Pacific聯乘本地素食餐廳VEDA by Ovolo 設計出全新機上素食餐膳,由即日起至24年6月乘坐由香港出發嘅指定長途航班嘅特選經濟及經濟艙就可品嚐到!小編有幸可以一嘗今次全新素食飛機餐,味道亦令小編改變對素食嘅固有印象!希望大家之後有機會可以試下!
國泰航空|國泰航空聯乘VEDA by Ovolo推出全新機上素食餐膳
國泰航空多年嚟一直秉承住可持續發展嘅理念,無論燃料、機上用品等方面,致力減少碳排放及推動碳扺銷計劃。今次就聯乘本地素食餐廳VEDA by Ovolo,為由香港出發嘅指定長途航班嘅特選經濟及經濟艙設計出全新機上素食餐膳。國泰表示今次合作原因主要係認為VEDA及Ovolo奧華酒店嘅Plant’d 全素食計劃理念與其可持續發展理念相乎。希望可以為旅客提供多樣性、健康及對環境傷害較低嘅餐膳選擇。
國泰航空 X VEDA by Ovolo 全新素食航膳菜單*
特選經濟客艙
- 前菜:孟買腰果甘筍沙律/鷹嘴豆蓉配烤椰菜花及醃紅洋蔥
- 主菜:南印度椰香雜菌咖喱配小茴香飯/摩洛哥燴雜菜配羊奶芝士及北非珍珠米/泰式乾炒紅咖喱腰果豆腐配椰香飯
經濟客艙
- 前菜:中東紫藜麥小米沙律/地中海式薯仔沙律
- 主菜:泰北椰香咖喱雜菜麪/煙燻番茄芝士咖喱配小茴香飯/咖喱雜菜配薄荷香飯
*菜單菜式或會根據供應情況而有所變更
今次菜單由國泰航空及⾹港奧華酒店⾏政總廚Raul Tronco一同設計,行政總廚Raul Tronco 表示今次計劃難度非常之高,需要考慮到客人於高空中味蕾會大受影響,食材限制等因素,經過長時間嘗試終於成功,Raul亦感到非常滿意。小編一直接觸到嘅素食,大部份都係利用大豆類或培植肉去模仿肉類菜式。而今次菜式並無故意咁做,而係利用唔同素食材料搭配香料、不同類型蔬果及醬汁炮製而成。總廚Raul Tronco亦反問小編一句「你覺得自己食緊嘅係素食嗎?」,Raul亦表示希望今次菜單唔係只為素食人士已設,而係多一款機上餐膳俾大家選擇!
▼ 特選經濟客艙餐膳 – 中東紫藜麥小米沙律 配 泰式乾炒紅咖喱腰果豆腐配椰香飯
▼ 經濟客艙餐膳 – 地中海式薯仔沙律 配 咖喱雜菜配薄荷香飯
小編試咗幾款前菜及主菜,菜式入面嘅香料、香草味道恰到好處。係機上面口淡淡,食返啲帶有香料味嘅菜式,的確可以醒神一下!小編覺得最好食嘅係泰北椰香咖喱雜菜麪,菜式喺以清邁一道湯麵作為靈感,一入口就食到醒神嘅香茅同檸檬葉味,微微嘅辣味加上香濃椰奶味,非常之惹味!另一道煙燻番茄芝士咖喱配小茴香飯,用上印度芝士 (Panner),口感結實,奶味濃郁,加上微微煙燻味道,味道相當之夾!食完之後再配上一杯清爽嘅白酒,真係一大享受!希望日後可以係機上再食多次啦!
▼ 泰北椰香咖喱雜菜麪
▼ 煙燻番茄芝士咖喱配小茴香飯