又黎到呢個既熟悉又陌生嘅地方
上兩個月被急召返香港，今次一於去個長既 No Plan Is My Plan 係小編嘅座右銘
直到上機前一刻 小編都未計劃好行程同會去嘅國家 大家有建議嗎？
▼空洞的禁區
疫情下的一趟旅行
唔經唔覺仲有幾個月，就係疫情肆虐全球2週年。對於鐘意去旅行嘅香港人黎講，當時有邊個會諗到封關，而且仲會係封咁耐？相信絕大部分香港人同小編一樣，起碼有2年以上冇出過國，旅遊心癮一直痕痕癢癢。但無奈回港需要最少14日酒店隔離，對於假期少嘅我地，又的確冇出走嘅勇氣。
▼唔少人排隊等check in
亞洲國家開關仍舊遙遙無期，好多亞洲國家依舊要保持0確診或者疫情一直反覆。但相反地球嘅另一端，即使對面變種病毒威脅，南北美洲、歐洲、非洲國家採取病毒共存政策，仲陸逐開放關口，甚至容許入境旅遊。尤其係大部分歐洲國家，只要打齊2針或再加上72小時內PCR核酸報告，即可入境。對於每年都要去旅行嘅我黎講，無疑係一個非常吸引嘅條件。只係唯一要接受返到香港，要住酒店隔離14日，就算以最平嘅隔離酒店為例，每晚$500，14晚都要另加$7,000。
▼Duty Free十間有九間無開
於是，小編決定要去就要去一個悠長旅行，咁先可以抵返隔離酒店嘅費用。8月開始就做咗少少資料搜集，發現芬蘭係成個歐洲入面，入境最寬鬆嘅國家。低風險國家旅客或已打齊2針人士入境而且無需要提供核酸報告。然後再上芬蘭航空搜尋一下機票，發覺價錢同之前差唔多，最後買咗一張2個幾月嘅機票(唔包寄槍行李)，連稅$4,300。
▼唔知幾耐無見既登機牌
以前去旅行，都會翻查下每個國家需唔需要做簽證。不過疫情下嘅旅行就變得複雜好多，因為要上每一個國家嘅網站睇睇佢地嘅入境限例。例如佢地接唔接受香港入境？打香港嘅針接唔接受？需唔需要做PCR test？因為呢2個幾月小編都打算去十幾個國家，所以都要睇得好清楚，而且仲要留意佢地嘅入境限制有冇改變，變相令今次旅行變成冒險之旅。
▼以前旅行回憶返哂黎
No Plan Is My Plan係小編嘅座右銘，直到上機前一刻，我都未計劃好哂行程同會去嘅國家。話說今次去歐洲主要目的都係以Backpacker形式、探下朋友，又想體驗下唔同城市、國家嘅生活節奏。更重要嘅係，想知道佢地同肺炎共存嘅模式可唔可行，歐洲人嘅生活又係咪已經回歸正常？
10月1日，小編係香港機場辦理好登機手續，加上出發前一日係網站填好健康申報表。非常順利咁登上早上9時10分嘅航班。當上到機見到空姐嗰一刻，我知道今趟旅程將會係既開心又充滿未知數…..
▼今趟旅程將會既開心又充滿未知數
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿