大鄉里坐飛機 與 入境芬蘭篇
兩年冇坐過飛機，終於登上芬蘭航空機艙一刻，心情好複雜。感覺好似第一次坐飛機，又緊張又興奮，但分別在於第一次坐飛機係緊張坐飛機多啲，而今次係興奮個行程多啲。由於目前唔多國際航班，飛機準時9點10分離開香港國際機場。
▼好耐無見既登機牌
香港直飛芬蘭只需要9個鐘鬆啲，第一次坐芬蘭航空感覺非常良好！好好彩upgrade左去Comfort Economy，服務差唔多但個位闊啲。2年冇坐飛機到呢刻再出發，原來一切幾乎都冇變過。成程機入面，照舊派2次飛機餐，分別係牛油雞配飯同茄汁長通粉。
▼芬蘭航空 Economy Comfort
▼芬蘭航空Clean Kit
▼一上機每人派支水
▼好耐無食既飛機餐，好懷念！
另外都會有2次派餐飲服務，聽聞芬蘭航空嘅藍莓汁好好飲，所以好似啲外國人飲酒咁隊左好幾杯 (後記：原來太好飲，香港都有得賣啦！)
▼芬蘭航空藍莓汁
唯一唔同係空中服務員同旅客都帶上口罩，因為少咗旅客，大家距離遠咗，作為乘客嘅我地就緊係舒服咗啦。
▼萬里無雲既天空
芬蘭慢香港5個鐘，所以坐完10個鐘飛機，抵達芬蘭都只係同一日嘅下午2點。赫爾辛基機場唔大，一落就會見到轉機處。今次班機由香港飛芬蘭，好多乘客之後會轉機去其他歐洲城市，變相小編係少數入境芬蘭嘅旅客。由於已經打齊2針，又來自低風險地區，加上入境前已經填好電子健康申報表，所以一到步就可以直接去移民局辦理入境程序。
成個入境程序只需5分鐘內就完成。關員好Nice，但係要有心理準備會問你一連串問題，例如今次我被問到
黎芬蘭有咩目的？
有冇回程機票？
係芬蘭打算留幾耐？
之後會去咩國家？
帶咗幾多錢入黎玩？
有冇book到住宿？
等等……
所以提提大家就算冇咩計畫都好，都要book定啲住宿同回程機票，咁就冇問題了。成個過程無需要量體溫，都唔需要即場做Covid Test，更加唔需要隔離就已經可以離開機場。
▼ 赫爾辛基機場
機場有火車出市區，單程4.1€。坐火車出市區沿路見到好多黃黃綠綠嘅樹，已經睇到好興奮。我相信今次芬蘭之旅將會感受到更多秋日色彩。
▼ 等梗火車出市區
▼秋天既芬蘭實在太靚啦！
下回待續…
入境芬蘭網站參考：https://bit.ly/3lcREG5
入境芬蘭前必須填好健康申報表：https://bit.ly/3uNtvsN
1 comment
我在九月底坐芬蘭航空返香港, 藍莓汁真係好好飲。