AirAsia即將推出Super+ Premium計劃，俾咗年費之後全年無限次直飛泰國、馬來西亞等地，一律唔使俾機票錢，只係需要俾票價以外嘅稅項同埋附加費。呢個計劃將會喺12月5日早上10點開始發售，聽落幾適合一年要飛幾次呢啲國家嘅人！
AirAsia係一間黎自馬來西亞嘅廉價航空公司，其實佢哋之前已經推出過一個類似嘅計劃，叫做Super+ Lite，不過就無香港份。黎緊即將開賣嘅Super+ Premium計劃香港終於可以受惠啦！呢個Super+ Premium計劃每年年費RM2,288 (約$4,080)。只要俾咗呢個年費之後全年由香港出發去泰國、馬來西亞、菲律賓嘅機票都會係免費，只係需要俾機票以外嘅稅項同埋附加費 (例如機場稅、燃油附加費等等)。聽落都幾適合一年之內會多次往返呢三個國家嘅旅客，就等小編為大家實測下係咪真係咁抵先。
▼Super+ Premium及Super+ Lite計劃服務範圍比較
▼從香港出發可以前往嘅目的地
【係咪每一日都有得飛？】
雖然Asia Super+ Premium官方網站話只要買咗呢個計劃之後就可以全年不限次數任飛，但係小編發現雖然係不限次數，但係其實可以選擇嘅日子有限，並唔係每一日都有得飛。就算揀到啱心水嘅日子都唔一定book到，因為每班機都有固定名額。
以由香港出發去泰國為例，宜家揀出年1月嘅航班已經就黎full曬 (Very Lmited)。揀出年2月嘅話會比較多仲係Available，不過都唔係日日有得飛。旺季例如8月就更加誇張，宜家睇已經有一半航班係紅色，一半係黃色。
▼2023年1月從香港出發去泰國航班資訊
▼2023年2月從香港出發去泰國航班資訊
▼2023年8月從香港出發去泰國航班資訊
▼2023年8月從香港出發去泰國航班資訊
泰國一直係好受香港人歡迎嘅旅遊地點！大家又知唔知曼谷新開咗好多景點呢！今次小編就同大家介紹ICONSIAM商場同埋The One Ratchada夜市！
▼兩個曼谷必去新景點！ ICONSIAM商場入面竟然有室內夜市｜拉差達火車夜市再度開幕
不過小編諗到一個更加抵嘅方法，就係用佢呢個plan去遠啲嘅地方！例如由香港出發，最終目的地係澳洲、馬爾代夫等較遠地方嘅話，可以利用Super+ Premium計劃先由香港飛去吉隆坡，之後再喺吉隆坡轉機去目的地。因為吉隆坡都喺Super+ Premium計劃嘅服務範圍入面，所以兩程機都唔使俾機票錢，只需要俾其他雜費。不過就要夾啱香港去吉隆坡、吉隆坡去澳洲呢兩程機嘅時間。
【實測用Super+ Premium計劃後平幾多】
以Super+ Premium計劃航班schedule入面有嘅5月10至17日香港飛曼谷廊曼國際機場為例，喺AirAsia官方預訂網站上面睇，費用總額係$1,526，減返$863票價之後，所有需付雜費加埋總共係$663。Super+ Premium計劃每年年費係$4,080，用呢個價黎計嘅話每年飛5個來回先可回本。
▼AirAsia官方預訂網站機票價錢
小編仲為大家實測更多購買Super+ Premium計劃後香港往返唔同地方嘅價錢。購買Super+ Premium計劃後揀機票嗰陣會見到票價嗰欄 (即圖中「1x Adult」) 會變成$0，所以右上角顯示嘅總數就係扣除票價後你需要俾嘅雜費金額。以香港往返馬尼拉為例，總數會係$593。
以下係2023年3月香港往返各地嘅價錢：
- 香港往返馬尼拉：$593
- 香港往返清邁：$663
- 香港往返曼谷：$663
- 香港往返沙巴：$655
- 香港往返吉隆坡：$691
- 香港往返布吉：$731
▼購買Super+ Premium計劃後香港往返馬尼拉價錢
【應唔應該買？適合咩人買？】
總結黎講，小編認為呢個計劃聽落係幾吸引，不過睇完實質嘅航班schedule之後就覺得未必人人都啱用。首先一年內會去咁多次泰國、馬來西亞、菲律賓嘅人應該已經唔多，而且航班嘅日子仲要唔係好彈性，淡季都要早啲plan定幾時飛先有機會搶到機票，旺季就更加難搶。如果你嘅schedule比較彈性，經常可以喺淡季飛嘅話呢個計劃可能先會對你有幫助。
【常見Q&A】
問：如何購買Super+ Premium計劃？
答：可以喺AirAsia Super App或者AirAsia官方網站上面購買
問：Super+ Premium計劃可唔可以共用？
答：唔可以。一個Super+ Premium計劃賬戶只屬於一個人，只有帳戶持有人先可以使用呢個優惠。
問：購買Super+ Premium計劃後可唔可以退款？
答：唔可以，不設退款或取消。
更多詳情可到AirAsia Super+ Premium官方網站查看。
2 comments
甘，如果由一撻地方去另外一撻地方，係唔係只要係計劃內地方（國家）就可以點飛都得，唔一定焗限香港出發
係呀，但有機只適用於直飛航班，大部分都係KL/曼谷出發