日本終於開關啦！相信唔少人已經預訂咗去東京嘅機票，出發之前記住睇咗日本自由行懶人包先。事隔幾年無去過旅行，可能大家已經忘記咗點樣由機場出市區，就等呢篇文章幫你溫故知新啦。東京有羽田、成田兩個機場，而羽田機場距離東京市區相對較近，車費亦較平。今次小編整理咗三種由羽田機場去東京市區嘅交通方法及車票價錢，分別有單軌列車、京急電鐵及利木津機場巴士，俾大家參考邊種交通最合適！小編亦都整理咗成田機場交通攻略～
【單軌列車】
由羽田機場去東京市區坐單軌電車係一個簡單、方便嘅交通方法，平均3-4分鐘就有一班車，分別有「普通」、「區間快速線」同「空港快速線」列車選擇，乘空港快速線最快13分鐘一車直達山手線濱松町站，單程價錢¥500 (約$28)，然後再轉乘JR山手線到東京車站、秋葉原、上野等站。
▼單軌列車路線圖及所需時間
【單軌電車+山手線優惠套票】
如果需要轉乘JR山手線到東京車站、秋葉原或上野等站，咁就一定要買單軌列車＋山手線優惠套票，價錢包羽田機場到濱松町站及可再轉乘JR山手線到任何一站，價錢為¥500 (約$28)，套票價錢與單程同價，但可免費轉乘JR山手線一次，所以價錢非常化算！但留意以上優惠票只限星期六、星期日及日本國定假日使用。大家可於羽田機場國際線大樓站、羽田機場第1大樓站、羽田機場第2大樓站嘅自動售票機、各機場設置嘅東京單軌電車自動售票機購票。
▼乘搭單軌列車到濱松町再轉乘JR山手線
▼乘搭單軌列車到各車站所需時間
【京急電鐵】
京急電鐵與多條鐵路路線直通運轉，分別有「普通」、「機場急行」、「特急」、「快特」和「機場快特」列車選擇，可前往新橋、東銀座、日本橋、淺草、押上、晴空塔等站，班次約5-10分鐘一班，最快只要20分鐘可直達品川站，再轉乘「JR 山手線」、「JR 京濱東北線」、「JR 東海道線」、「東海道新幹線」等，或搭多一個站到泉岳寺站轉「都營地鐵淺草線」，價錢只需¥300 (約$17)。
最快嘅「機場快特」只停大站，最慢嘅「普通」則各站皆停。要留意「機場快特」喺都營地鐵淺草線新橋站至押上站，只停靠日本橋站、東日本橋站及淺草站。大家可於京急電鐵官方網站搜尋從羽田機場出發嘅列車時間表及費用。
搭京急電鐵從羽田機場至各站價錢參考：
往北至品川站、泉岳寺站¥300 (約$17)
至橫濱車站¥340 (約$19)
經由泉岳寺站往北直通運轉都營地鐵淺草線至新橋站¥430 (約$24)
至東銀座站、日本橋站¥470 (約$27)
至淺草站、押上站¥530 (約$30)
【Welcome! Tokyo Subway Ticket】
Welcome! Tokyo Subway Ticket係京急電鐵「羽田機場至泉岳寺站來回車票」及「東京地鐵&都營地鐵24至72小時券」嘅優惠套票。大家可到京急旅遊服務中心購買，然後搭乘京急電鐵到泉岳寺，喺24至72小時內自由乘搭東京Metro地鐵及都營地鐵。購買呢個套票後可於限時內無限次乘搭，適合一日入面去多個地點嘅旅客。
套票價錢如下：
| 優惠 | 來回價錢 |
| 24小時 | 大人¥1,360 (約$77)、小童¥680 (約$39) |
| 48小時 | 大人¥1,760 (約$100)、小童¥880 (約$50) |
| 72小時 | 大人¥2,060 (約$117)、小童¥1,030 (約$59) |
▼Welcome! Tokyo Subway Ticket價錢
▼Welcome! Tokyo Subway Ticket購買方法
【利木津機場巴士】
羽田機場嘅機場巴士路線非常多，可直達新宿、池袋、澀谷、銀座、淺草、東京車站等東京市區各地，另外亦可乘至東京迪士尼、箱根、河口湖等關東近郊縣市或景點。巴士車費較貴，以新宿站為例成人票價¥1,300 (約$74)；池袋站¥1,300 (約$74)；東京迪士尼樂園¥1,000 (約$57)。大家可以喺利木津巴士官方網站查詢由羽田機場出發到各個巴士站嘅時間表及價錢。
雖然價錢最貴，但若果一家大小出發、攜帶大件行李，唔想拖著行李上落樓梯轉車，或想直達東京迪士尼、箱根、河口湖等近郊縣市便可乘搭。另外深夜需要出入機場亦可選擇！
【綜合比較】
| 優點 | 缺點 | |
| 單軌列車 | – 中間價位
– 班次最頻密 (3-4分鐘一班) |
– 如想去東京車站、秋葉原、上野等地區，到達濱松町後要轉車，拖著大型行李、有老人及小孩隨行較唔方便 |
| 京急電鐵 | – 價錢最實惠 | – 目的地較少，「機場快特」只停日本橋站、東日本橋站及淺草站
– 如果要去其他地區，有機會要轉乘電車或巴士，如拖著大型行李、有老人及小孩隨行較唔方便 |
| 利木津機場巴士 | – 如拖著大型行李、有老人及小孩隨行較方便
– 較多目的地可選擇 – 可直達熱門酒店門口 – 深夜也有班次 |
– 價錢最貴
– 車程時間較長
|
- 若要前往東半部如東京車站、秋葉原、上野等地，小編就建議搭東京單軌電車到濱松町站，再轉乘JR山手線或JR京濱東北線，乘車時間會快些。
- 若要前往澀谷、新宿、池袋等西半部地區，小編就建議搭京急電鐵到品川站轉乘JR山手線，或到大門站轉乘地鐵會較方便及快些。
- 若需要深夜出入機場，凌晨過後便沒有單軌及京急電鐵列車，利木津機場巴士是唯一選擇 (的士車費太貴了！)。另外如想直達東京迪士尼、箱根、河口湖等近郊縣市，機場巴士一定最方便！