今次去斯德哥爾摩有一樣非做不可嘅事，就係要參觀世界上最長且免費嘅地下畫廊 – 斯德哥爾摩地鐵站。記得好耐之前有網站嚴選世界十大最美麗地鐵站，頭幾位見到分別有台灣美麗島站、俄羅斯莫斯科嘅共青團，仲有一個印象深刻嘅就係瑞典斯德哥爾摩嘅藍白中央洞穴站。自此，去旅行順便參觀埋人地國家嘅地鐵站就成了一個習慣。
如果用「地下宮殿」去形容莫斯科地鐵站，用「地下畫廊」去形容斯德哥爾摩地鐵站就最適合不過。最早一條斯德哥爾摩鐵路係於1950年啓用，到今時今日有合共100個車站，當中47個地下車站同53個地面車站。線路方面，一共有三種顏色共七條路線，分別為藍 (10、11號線)、紅(13、14號線) 及綠 (17、18、19號線)。
留係斯德哥爾摩五日，小編合共去咗30個地鐵站，主要去齊20個藍線地鐵站同部分紅綠色線地鐵站，因為主要靚嘅洞穴地鐵站都可以係藍色線搵到。小編嚴選5大必去斯德哥爾摩地鐵站比大家參考下，等開關之後立即去瑞典打卡，影番輯靚相。
Top 5 Hallonbergen (小朋友站)
呢個站設計靈感來自童年回憶，成個站以白色做主調，代表小朋友懷住純白的心靈。而地鐵站牆身畫滿一啲好簡單嘅圖畫，一睇就知好有自己屋企隻小怪獸畫出黎嘅作品咁。我都花咗好多時間係呢個站到。
▼ 斯德哥爾摩地鐵站Hallonbergen
▼ 斯德哥爾摩地鐵站Hallonbergen
▼ 斯德哥爾摩地鐵站Hallonbergen
Top 4 Tensta (動物站)
呢個站叫動物站唔係因為佢上面有動物園，而係成個地鐵站畫滿好多小動物同樹葉，感覺好和諧同舒服。呢個都係設計師想表達嘅主題，因為呢區有好多新移民，所以咁樣嘅設計比呢區嘅居民感覺更溫柔。
▼ 斯德哥爾摩地鐵站Tensta
▼ 斯德哥爾摩地鐵站Tensta
▼ 斯德哥爾摩地鐵站Tensta
其實我好中意呢個站，不過打卡黎講又唔算特別，而且佢係最遠市中心嘅一個地鐵站，所以好多人都會忽然佢。
Top 3 Solna centrum (聖誕節站)
雖然我叫呢個站做聖誕節站，但同聖誕節一啲關係都冇,只係因為呢個站用嘅顏色好有聖誕氣氛。地鐵一到站，你就會比佢強烈對比嘅紅綠色吸引住。
▼ 斯德哥爾摩地鐵站Solna centrum
▼ 斯德哥爾摩地鐵站Solna centrum
▼ 斯德哥爾摩地鐵站Solna centrum
到落車仔細參觀，你會見到綠色嘅部分係樹林，然後你會見到好多人類工業活動，有好多樹木被砍伐，而紅色部分自自然然諗起因人類活動頻密而引起的溫室效應。呢個站嘅設計靈感正正就係70年代，瑞典社會工工業化鼎盛，反映工業化令自然环環境遭到破壞。
Top 2 Stadion (大彩虹站)
呢個站上面係瑞典奧林匹克體育館同瑞典音樂學院，所以出口掛咗M&S大英文字母。我有一日黎到，剛好遇上斯德哥爾摩馬拉松，啲運動員就係跑到呢個體育館結束賽事。
▼ 斯德哥爾摩地鐵站Stadion
講番個地鐵站，聽講因為早期地下洞穴地鐵站太陰森，所以設計師就用彩虹做裝飾，將外面多彩世界帶到入地鐵站，而依然就變成斯德哥爾摩第二人氣地鐵站。
Top 1 T-Centralen (中央轉車站)
第一位當然係呢個全球最美地鐵站之一的中央地鐵站。呢個站係唯一紅綠藍三條地鐵線嘅轉車位，月台有4層，亦都係斯德哥爾摩地鐵系統擁有最多公共藝術作品嘅車站之一。
▼ 斯德哥爾摩地鐵站T-Centralen
▼ 斯德哥爾摩地鐵站T-Centralen
1970年代先啟用嘅藍線月台層，因為內壁同天花板是係挖鑿岩壁組成，類似山洞嘅景觀效果，所以設計師就直接係牆壁上用藍白兩色畫上大型樹枝與葉片花紋，另外到轉車通道內則畫上變成工人與鷹架圖案。
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸