平機票攻略！泰國、馬來西亞、印尼、新加坡、越南優惠機票全分析！幾錢先係入手價？

東南亞幾時都岩哂快閃遊兼hea下resort！小編直接話哂俾你地知泰國、馬來西亞、印尼、新加坡、越南同柬埔寨唔同城市嘅機票最低價、入手價、正常價，一次過哂冷俾你睇！

最後更新：2019年12月27日

注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。

最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。

泰國

曼谷係最多航空公司都有執飛而且比較多機票優惠，今年大大小小出咗超過60次優惠添！傳統航空以埃及航空減得最低連稅$1,123，平飛仲要係12月頭先出，但就限Last Minute快閃出發。之後排第2至4次序分別係埃塞俄比亞航空、皇家約旦航空同阿聯酋航空，4間航班公司嘅時間都無得選擇，限晚去午返，時間上岩打工仔多啲，而最低價都係千1至千2尾到，比較突出嘅係埃塞俄比亞航空包2件23KG行李，而且喺紅日假期或暑假都有平飛，性價比超高！

港航今年狀況比較浮動，就算平極都要$1,371，所以可以不理。至於龍頭大佬泰航同國泰，兩間都被迫加入減價戰，減到去最平連稅千5同千6就有交易，而且航班時間選擇比其他公司多好多，可早機去午機/晚機返都可以！不過兩間都唔算出得好多優惠，見到有平就要搶喇！泰航子公司泰國微笑航空，最低連稅價$1,414，但只包20KG行李。

曼谷線廉航得HK Express同AirAsia，不過價錢唔算廉，keep住最低連稅都要$800，不過可以自製openjaw玩埋清邁/布吉又係另一個賣點喇，但留意AirAsia係飛曼谷廊曼DMK機場呀！

傳統航空公司嘅布吉線一向企得幾硬，港龍今年連稅2千1左右，入手價都要預2千5。而泰航同泰國微笑航空仲要無咗影添，反而有得揀下新航轉機去，但價錢同直航差唔多，勝在服務好！

廉航上布吉同曼谷一樣得HK Express同AirAsia，AirAsia最平來回連稅$819，入手價預$1,000！HK Express 價錢上都係差唔多，不過好在可以早機出發晚機返。

港龍飛清邁上年無出過優惠，所以建議都係留意返廉航AirAsia同HK Express。AirAsia賣過最平$768，入手價預$1,100；HK Express賣過最平$831，入手價預$1,000。留意返AirAsia係早去早返、HK Express係午去晚返，所以大家可以分開買飛，去程買AirAsia，回程HK Express，咁就可以早去晚返玩到盡啦！

去蘇梅的話直航就只有曼谷航空獨市，價錢一直高企，不過今年都出咗個幾抵嘅價錢連稅$2,841咋！另外賣服務嘅新航都出過轉機價$2,112，可以多個選擇都唔錯。想再平啲飛，又唔怕坐船嘅話，可以先搭AirAsia去曼谷，然後直接喺同一個機場坐AirAsia去Surat Thani，再搭船去蘇梅會平好多。

越南

越南近年越嚟越受歡迎，開放咗電子簽之後更加多人快閃去越南玩返幾日！香港飛越南嘅直航航點有5個，包括胡志明市、河內、峴港、芽莊同埋富國島。而胡志明市同河內線呢兩個大城市比較多航空公司營運，不停有減價戰。今年越南航空超越港航成為最低價榜首，最平試過$1,112同$1,151，平時入手價連稅$1,300至$1,400就飛到喇！而港航最低價都係貴幾十蚊，入手價差唔多。

而廉航有Jetstar (河內)同越捷航空Vietjet (胡志明市)，越捷最低價去到$577，平時入手預$900，時間唔算好晚去下午返；至於Jetstar就每1至2個月有優惠，15週年優惠價$502咋！

港航同埋越南航空包埋行李同埋飛機餐都咁平，比較之下廉航唔算太吸引。兩間要揀嘅話，河內就無咩所謂，不過胡志明市就一定揀返越南航空，事關港航時間好差，來回都係凌晨機！

港龍航空呢一年都無峴港線嘅優惠，大家可以集中睇返廉航Jetstar、HK Express同越捷航空Vietjet啦！Jetstar 15週年優惠有出峴港，來回連稅$462堅係無得輸，平時入手價$700內都ok！至於HK Express就勝在航班時間比較多，可以早機去傍晚機返，連稅價做過$764。

至於富國島就係越捷航空Vietjet今年四月新開嘅航線，出過零蚊機票連稅$425，仲要平飛數量都幾多下！飛富國島唔使簽證，呢度又慳咗二百幾！平時入手價預$900左右。

而芽莊就係HK Express獨市，入手價大約$900左右，最平試過$691，飛過去歎下resort都唔錯！

馬來西亞

沙巴一直都係得廉航Airasia獨市，不過價錢都keep住有平，big sale嘅話最平試過連稅$488咋！算係好大方！

吉隆坡直航既傳統航空有馬印同港龍航空。馬印航空雖然唔太出名，但佢價錢平得來，旺季都有平，不過留意返最近馬印唔包行李啦。港龍航空今年試過最平$1,683，算係近年靚價！轉機仲有新航可以揀，不過價錢都偏貴除非想出去新加坡行個圈。

而廉航AirAsia同以上幾個航點一樣，都有幾個好平嘅優惠，最平連稅$590，入手價預$1,100左右。

新加坡

至於新加坡今年就相當精彩！新航為咗慶祝新嘅787客機投入服務，今年3月出咗個史無前例嘅抵價，來回連稅$787！相信呢個紀錄都好難被打破。見到咁國泰當然有跟減，但就無減到咁誇張，限2人同行來回連稅每人$1,197。平時兩間航空公司入手價都係$1,700至$1,800左右。

至於廉航，Jetstar今年都出咗個15週年優惠，優惠最平來回連稅$547，好耐都無見過呢個價錢喇！至於一般優惠價為來回連稅約$900，而時間就一般般要下午去早返。Scoot今年直情無優惠平！每次連埋稅都差唔多一千，真係等坐新航好過。

印尼

印尼最熱門嘅航點當然係峇里島喇！分別有3間傳統航空可以直航飛去，岩岩12月中嘉魯達印尼航空先推出優惠最低連稅$2,343，價錢包埋30KG 寄艙行李，仲要玩哂成個復活節都有平呀！至於香港航空嘅優惠已經無之前咁平，不過今年都試過賣到去$1,967；而港龍無出優惠所以拜拜！

如果唔介意轉機，可以留意下新航，連稅千八左右，要轉機但可以享受到優質服務！另一冷門介紹仲有汶萊皇家航空，連稅2千頭，2間入手價都要2千2至2千5！另外廉航Scoot…一樣無優惠拜拜！

柬埔寨

港龍飛暹粒嘅機票連fanfares都無見過！想再平啲就要揀廉航HK Express，一般連稅千一有交易，最平賣到去$866。

**結論：

1. 曼谷線係最熱門亦係最多優惠，間間航空公司嘅價錢都唔係差太遠，可以睇埋航班時間、行李、服務質素再作決定！

2. 廉航HK Express雖然每星期都有至少一次優惠，不過今年啲優惠都唔算平，呢一年最平要數一年前豬年驚喜優惠！至於AirAsia每季一次嘅Big Sale，賣緊大半年後出發既平飛，見到差唔多最低價/入手價可以即買。

3. 曼谷、吉隆坡、越南呢啲航點係暑假都有平飛，如果暑假一家大細想去旅行可以考慮一下。

4. 東南亞既內陸廉航非常多，包括Lion air、AirAsia、Jetstar、Scoot、Vietjet、Nok Air、Thai Smile等等，所以如果想去啲二三線航點又或者勁貴既直航航點，可以選擇坐廉航去到新加坡或吉隆坡駁機去。

5. 另外溫馨提示，清萊 (HK Express) 同喀比 (AirAsia) 已經停航或無直航去喇><。

其他平飛攻略：
日本平機票攻略
韓國平機票攻略
台灣平機票攻略
澳紐平機票攻略
歐洲平機票攻略
美加平機票攻略