平機票攻略！澳紐優惠機票全分析！幾錢先係入手價？

想飛越太平洋去澳洲同埋紐西蘭點先為知平機票？直航或轉機優惠機票幾錢先入得手？等小編將澳洲同紐西蘭既平機票入手價一一話你知啦！

最後更新：2019年12月20日

注：以下所提及的價錢為來回連稅價錢，及未包廉航寄艙行李費，以淡季作標準。價錢及建議是小編個人之經驗，只作參考用途。

最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。

澳洲：

今年悉尼/墨爾本機票價錢升幅都比較多，最低價仍然要數澳航七十週年，最抵連稅價墨爾本$3,235同悉尼$3,334，入手價預$4,300至$4,400。接力就係維珍澳洲航空，連稅最底價差唔多$3,278至$3,436，不過墨爾本2020年2月11日起停航，大家就少咗個選擇喇。3間直航國泰始終都係貴少少，不過都賣到去連稅3千5有找，之前一直企硬4千中架！

至於要喺新加坡轉機嘅新航最低價錢就維持喺$2,900至$3,000左右，而汶萊皇家航空同越南航空間唔時都有驚喜連稅價3千齊頭，入手價約$3,800，汶萊皇家航空勝在可以中停玩埋汶萊。

新航嘅珀斯最低價係6月中出現，連稅只係$2,910，其他航點都係3千頭幾吸引。

廉航方面，Scoot今年優惠完全無點介紹！因為計埋行李同新航差唔多價錢，仲有坐廉航嘅意思咩？

其他澳洲2線城市好似布里斯班，澳航直航最低價只需$3,311，而國泰都緊接開賣價只需$3,597。轉機就有新航，汶萊皇家同長榮，都係3千1至3千3到，其中坐汶萊皇家同長榮都係貪可以轉機出境玩埋唔同地方。而黃金海岸今年未見有優惠價。

國泰直航2月時出過全線澳洲優惠，直航飛阿德萊德同開恩茲3千4左右，都算幾唔錯，不過國泰現已取消直航開恩茲線。坐高質新航轉機就連稅3千頭就有交易。

成日話去塔斯曼尼亞睇粉紅極光，其實捕到優惠時連稅唔使4千就搞掂啦！可以等下維珍澳洲航空比較多優惠，隔2至3個月都會出，最低連稅價約$3,800至$4,000到。不過要特別提一提澳航，因為佢出咗一個史無前例嘅破抵價，連稅$3,449就飛到去塔斯曼尼亞喇！平常有優惠$3,900到都可入手。

另外新航間唔時都有粉紅極光優惠，但就要轉兩次機所以好少介紹！至於澳洲首都坎培拉，基本上得新航有優惠，轉機去最平$3,673。

紐西蘭線：

澳洲線對上一年就有唔少優惠出，咁紐西蘭線又點樣呢？自從無港航參一腳，直航奧克蘭線企硬變番4千尾喇！直航得番國泰同埋紐西蘭航空，間唔時會聯手出優惠，最低價喺$4,559至$4,834左右，都叫唔錯喇！

其他轉機選擇有新航、斐濟、澳航同澳洲維珍航空，優惠分別由$2,961至$4,248不等！哈哈～不過新航連稅價$2,961要4人同行先有咁平，不過2人同行每人都只係$3,288，一樣咁抵DEAL。

紐西蘭線比較冷門2線城市有基督城，皇后鎮同埋威靈頓，前者最平澳航做過連稅$3,885，入手價預約$5,000！而皇后鎮同埋威靈頓唔係成日有優惠，而且無直航機去，最平見新航連稅$3,963！

小總結：
整體嚟講澳洲線方面，因為澳航出咗個勁平嘅七十週年優惠，成功帶領其他航空公司跟住減價，同埋定期留意兩大直航熱點悉尼同墨爾本線，見到澳洲航空同維珍澳洲航空3千頭可以即入手！而新加坡航空會不定時喺星期四出I love SQ優惠，3千頭至3千中左右都係入手價！ 其他越南/汶萊皇家/長榮航空都係轉機好選擇，不妨考慮下仲可以出境玩多個國家！

至於紐西蘭方面就真係貴咗唔少，宜家一般直航優惠價都要四千尾，轉機都唔係平好多，普遍優惠價最平都要三千尾。想飛紐西蘭嘅朋友都係早啲買飛早啲享受喇！

至於廉航方面小編建議唔使點考慮Scoot同埋AirAsia，因為加埋行李真係坐番新航/越南/汶萊皇家航空好過！除非working holiday只需要買張單程飛。

其他平飛攻略：
日本平機票攻略
韓國平機票攻略
台灣平機票攻略
東南亞平機票攻略
歐洲平機票攻略
美加平機票攻略