即將離開歐盟地區，進入東歐嘅烏克蘭。今次烏克蘭之旅我停留咗係最靚最熱鬧嘅烏克蘭城市利沃夫Lviv三日，另外亦去咗首都基輔同參觀另一個人類史上最嚴重嘅事故遺址 – 切爾諾貝爾核電廠，感受一個荒廢咗30年嘅死城係有幾咁死寂。
烏克蘭都係相對容易入境嘅國家，睇番烏克蘭旅遊局指引，只要打齊兩針加買番指定嘅旅遊保險，即可入境而無需隔離，我由克拉科夫坐火車到波蘭邊境城市Przemysl，再轉另一架火車就可以直達利沃夫。由於烏克蘭唔屬於歐洲，所以離開波蘭同進入烏克蘭都會印上入境印，不過過關程度全程有入境職員上火車檢查，非常方便。
▼烏克蘭城市利沃夫Lviv
▼烏克蘭城市利沃夫Lviv
其實初到烏克蘭係有少少崩潰，黎到利沃夫火車站，眼前所有野都換上烏克蘭文字，離開火車站想問人點去市中心，結果問咗幾個都只講烏克蘭文。好彩最好都搵到熱心人教我坐巴士入市中心。今次係利沃夫搵到沙發主人Denys，但就要等佢晚上11點收工先可以搵佢，趁有幾個鐘時間當然要行下古城。
正當我想搵一間地下餐廳，但搵極都搵唔到之際，有一對熱心夫婦帶我去間餐廳，然後仲請埋我飲酒，再邀請我第二日一齊去利沃夫最華麗嘅餐廳食自助早餐，估唔到問路都可以識到朋友，旅遊就係會不斷遇到咁神奇嘅事。
▼熱心夫婦
沙發主人Denys係一個廿幾歲嘅烏克蘭男仔，佢係一間美國公司打工，所以佢要就番美國時間番工。雖然佢唔能夠陪我玩利沃夫，但佢請我食大麻同教我玩單輪單車。呢兩樣我都未試過，旅行另一個目的就係要跳出comfort zone，嘗試好多未做過嘅事。
▼沙發主人Denys
其餘嘅時間我都係自己遊利沃夫。我係勁鐘意利沃夫，雖然呢到冇咩旅遊景點，但呢到好適合hea遊，而且我覺得世界上令人開心生活嘅事利沃夫都有齊，就係Cafe、啤酒、車里車酒、朱古力同可能係世界上最好食嘅豬肋骨！
唔講唔知，利沃夫嘅咖啡可能係歐洲最早飲用晚既咖啡，由呢度將咖啡文化傳到奧地利再去到歐洲其他地方，所以利沃夫古城有好多Cafe。
▼烏克蘭咖啡
其次利沃夫嘅Lvivske啤酒都好有名，仲可以去佢個啤酒博物館試飲四款啤酒。
▼利沃夫Lvivske啤酒
▼利沃夫酒吧
最最最唔可以錯過仲有豬肋骨，70蚊港幣就可以食到成條Ribs，但餐廳冇刀叉提供，要用手食架。
▼利沃夫豬肋骨
係利沃夫飲飽食醉之後，就坐5個鐘火車去今次行程最東嘅首都基輔出發。去基輔同樣都有一個烏克蘭沙發主人比地方我住，佢叫Viktor而且他來自克里米亞。
▼烏克蘭首都基輔
▼烏克蘭首都基輔
如果有睇新聞，應該會知道2014年俄羅斯强行將原本為烏克蘭國土嘅克里米亞搶番去，所以14年之後克里米亞人由烏克蘭人身份改為俄羅斯人身份。我發夢都估唔到竟然會認識到一位來自克里米亞嘅朋友，我當然唔會放過機會問一下身份認同嘅問題啦，畢竟香港人都同樣面對緊呢個問題。
▼基輔沙發主Viktor
▼基輔朋友
Viktor嘅答案係佢覺得自己係烏克蘭人因為佢係烏克蘭讀大學，畢業之後係基輔工作，但佢話克里米亞人係講俄文，文化上比較似俄羅斯，所以好多克里米亞人都唔抗拒成為俄羅斯土地。依家克里米亞相對地穩定，好多當地人同時有烏克蘭同俄羅斯護照，果然身證認同呢個議題好難一時三刻決定得到。
我係基輔嘅時間都係參觀市中心嘅東正教堂，而我同其他香港人一樣今次去基輔嘅主要目的就係要參加切爾諾貝爾核電廠Tour。對好多香港人黎講2011年發生嘅日本福島核電事故最為人所熟悉，好多人都因為咁減少去日本或者少進食黎自福島附近嘅農作物。而講起人類史上最嚴重嘅核事故就一定係1986年4月26號發生嘅蘇聯切爾諾貝爾核電事故。然後一直成為禁區直到2011年先陸續解封並開始有導賞團入去感受核輻射嘅禍害。
切爾諾貝爾核電廠Tour有分1天，2天，3天以上導賞團，價錢都唔平架，我揀咗1天即日往番基輔都要成100歐，差唔多成千蚊港幣，而且需要預先book定出發日期，因為核電廠冇自由行，只可以報旅行團而且預先核實身份。
今次呢個核電廠之旅既興奮又緊張，畢竟呢個景點當年真係有超過50人因為接收過量輻射而死亡，之後更加有報告指出有4000人因為輻射而死於癌症，所以都擔心入面嘅輻射太强。不過參加完之後就覺得導遊好盡力咁介紹，而成個行程最印象深刻就係到訪至今荒廢咗35年嘅死城普里比亞特。
▼切爾諾貝爾核電廠殘骸
▼切爾諾貝爾核電廠殘骸
▼切爾諾貝爾核電廠殘骸
雖然呢次事故叫切爾諾貝爾，但切爾諾貝爾市距離第四核電站事故尚有段距離，真正距離最近嘅城市係普里比亞特Prypiat。當年呢個城市被蘇聯政府評為最具發展嘅新城市，人均年齡係26歲，因為好多年輕人黎到呢個核電廠工作賺錢養家。曾經輝煌嘅普里比亞特由1970開始發展，到1986年短短16年已經發展成當年最好嘅新城市，但一夜之間核事故發生，5萬人要緊急撤離而且再冇機會番黎。
▼切爾諾貝爾核電廠對比圖
▼切爾諾貝爾核電廠對比圖
今年係事故發生35年週年，就算咁多年之後，普里比亞特市內嘅核輻射依舊超標好多倍，所以我地只可以短暫停留，都唔可以隨便進入大廈，因為大廈內同泥土藏有高輻射，我地只要攞個輻射機測試就可以知道某幾個熱點由0.2mSv忽然跳升到10幾mSv，只要超過20mSv就已經係緊急區域，所以我地係死城都只係留咗2個幾鐘。
▼輻射機測
▼切爾諾貝爾核電廠殘骸
▼切爾諾貝爾核電廠殘骸
回程嘅時候，導遊比我地睇番當年普里比亞特市嘅宣傳影片，當時睇到普里比亞特生活非常美好，但有邊個估到美好嘅生活可以一夜之間變成地獄。我係到諗假如核電廠冇發生事故，呢個地方可能成為今日烏克蘭最富有嘅城市，只不過一切盡在幻想中。而今時今日四號核電廠仍然需要石棺覆蓋，如果核電廠要變番正常水平，有機會需要多一萬年上。
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸
- #7 小編出走：世界最長的地下畫廊
- #8 小編出走：波羅的海三國 防疫措施大不同
- #9 小編出走：坐上郵輪 探訪高度自治區 奧蘭群島
- #10 小編出走：夢寐以求想去的國度 – 瑞士 (少女峰、日內瓦)
- #11 小編出走：夢寐以求想去的國度 – 瑞士 (庫爾、巴塞爾)
- #12 小編出走：重新認識德國
- #13 小編出走：久未參加旅遊媒體採訪團