最早知道有瑞士呢個地方，大概就係睇觀樂飄飄處處聞，當時覺得藍天白雲，雪山加上大草原係最靚嘅風景，好想有一日可以去呢個國家親眼睇到，只係一直無機會，估唔到今次我等到了探訪瑞士的機會。
如果有睇過旅行團瑞士行程，好多旅行團都以瑞士三大景觀列車同四大雪山山峰做賣點。今次坐上其中一架黃金號景觀列車到愛的迫降拍攝地Interlaken湖，然後再到少女峰下小鎭Grindelwald，坐最新落成嘅纜車同有多年歷史嘅雪山火車體驗瑞士第一峰。
▼Interlaken
▼前一日Interlaken 紅葉開得漫山遍野
▼下一日Interlaken 已經白雪茫茫
今次我坐黃金號出發嘅地方就係Montreux，轉車嘅時間上SBB瑞士鐵路網即可查到，非常方便。由Montreux 出發冇幾耐，出現係眼前嘅就係無窮無盡嘅雪山同積滿雪嘅聖誕樹。黃金號景觀列車嘅特色就係270度無敵大玻璃，車速唔快，可以暖煜煜咁置身雪地當中。
▼黃金號火車
係瑞士睇到雪景故之然幸福，只可惜天氣都係不似預期，第二日因為大雪，都要改變上山行程。上少女峰用以往舊有方法係grindelwald小鎭坐3程火車先上到少女峰站。雖然天氣差，但依舊可以上到少女峰，只係上到去唯一戶外地方開放只係得全世界最高嘅聖誕樹，其他戶外地方因為大雪而關閉。一心想去少女峰但無奈只能帶住遺憾番去。
▼少女峰纜車
▼少女峰纜車
▼少女峰 (由另一小編提供)
既然改變唔到事實，唯有改變一下心情啦，其實少女峰一年有200幾日都係唔好天，所以係少女峰火車站內都準備咗好多活動，比一啲睇唔到少女峰清晰真實一面嘅遊客可以感受下，例如有環回少女峰影片，火車站展覽館，冰雕展同朱古力、鐘錶手信店等等。到落山就坐上2020年12月落成嘅新纜車，比原本上車時間減少2程火車同縮短一半時間。好彩落山個時天氣稍為轉好，所以睇到山下嘅Grienwald小鎭同茂密嘅聖誕樹，都算係今次行程嘅少少補償。
▼少女峰內部
對好多人黎講，去瑞士旅遊一般都唔會將日內瓦放入行程，因為覺得日內瓦冇咩值得睇，寧願爭取時間去多幾個雪山，坐多幾程觀景火車睇靚景。
事實上今次我停留日內瓦兩日，係日內瓦有導遊帶路，感覺原來日內瓦都有唔少活動可以做架。首先，導遊第一站帶我市內觀光同介紹下瑞士嘅地理歷史。聽導遊講，瑞士冇瑞士文，主要分咗法文區，意大利文區，瑞士德文區同日爾曼語區，其中日爾曼語又叫做古羅馬文，文法比較似德文同意大利文混合。日內瓦就係法語系地方，我導遊會講法文同英文，而我導遊口頭禪就係voilà，voila 係法文萬用語，比較似我地廣東話嘅「咁」或者「好啦」。
▼日內瓦
▼日內瓦
▼日內瓦到處都是紅葉
▼日內瓦聯合國總部
▼日內瓦聯合國總部
日內瓦市中心唔大，導遊帶我由商業區，行到教堂頂層睇盡日內瓦市風景，再行到去湖邊嘅聖誕市集都只係3個鐘左右，呢3個鐘入面，我最印象難忘係市內周圍都有瑞士泉水。瑞士各個城市內都有好多噴水池，而噴水池嘅水全部都係附近雪山流落黎嘅山水，水質非常乾淨而且飲落甘甜。
▼日內瓦聖誕市集
▼日內瓦遊船體驗
▼日內瓦遊船體驗
▼日內瓦遊船體驗
行程第二站我去咗日內瓦郊區一間叫Les Perrieres嘅葡萄酒莊園試飲葡酒。今次試飲五款白酒，一款櫻桃紅酒同兩款紅酒。酒莊職員同我地講，佢地呢個莊園係家族式經營，而瑞士出名白葡萄，酒名通常以葡萄品種命名，例如日內瓦地區盛產一種叫Chasselas嘅白葡萄酒，所以去日內瓦餐廳食野，Wine List上第一款都會見到呢款白酒。職員仲同我地講瑞士葡萄酒產量唔多，好少外銷，仲叫我飲多幾啖添。
黎到瑞士點可以唔食傳統芝士火鍋。同香港改良版唔同，真正嘅芝士火鍋，芝士係非常重口味，入口咸香。而芝士火鍋配料唔似香港打邊爐咁多，只配上肉乾，瑞士麵包同小薯仔。雖然好似好少材料，但絕對食得好飽。
▼瑞士傳統芝士火鍋
雖然最後都睇唔到少女峰嘅真面目，但每次旅行嘅小遺憾都會成為下次再重遊舊地嘅藉口，希望下次係夏天再去，可以睇到我嚮往嘅瑞士大草原加雪山景色。
特別嗚謝：瑞士國家旅遊局
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸
- #7 小編出走：世界最長的地下畫廊
- #8 小編出走：波羅的海三國 防疫措施大不同
- #9 小編出走：坐上郵輪 探訪高度自治區 奧蘭群島