瑞士少女峰之後，我再走訪Chur (庫爾) 同Basel (巴塞爾) 兩個瑞士城市，出奇地兩個城市都有驚喜。
離開Grindelwald，坐4個鐘火車去Chur。Chur係香港人眼中都唔算係熱門瑞士旅遊景點，但其實Chur都係全瑞士最古老嘅城鎮，部分偏遠地區仲有人講緊古羅馬語架。而今次我去Basel最主要目的就係去行下全瑞士最大嘅Christmas Market。
▼Chur (庫爾)
第一站就係去肉乾廠參觀，睇下佢地點樣生曬肉乾。今次我去一間位於Parpan嘅工場叫Brugger Dried Meat Factory，佢地係家族式經營，到依家已經傳到第五代。見識到佢地如何以天然方式，只用鹽醃製豬肉同牛肉，然後利用雪山嘅氣候封乾，再加以壓縮，大概三到六個月就可以送到市集賣。參觀完仲可以即場試食兩款豬牛肉乾。
▼Chur (庫爾)
小鎭Lenzerheide有個最古老嘅酒店，雖然有番咁上下歷史，但近年加建新翼，酒店各層有好多相介紹昔日雪山下放牧小村落，搖身一變成為今時今日滑雪旅遊小鎭。我地參觀完成間酒店，再係佢地餐廳食鹿肉添。鹿肉都真係第一次食，感覺比牛肉更扎實。聽職員講我地食到嘅鹿肉都係打獵攞番黎，每年秋季有兩星期時間可以比人上山打獵。
▼Chur (庫爾)
▼Chur (庫爾)
▼Chur (庫爾)
▼Chur (庫爾)
食飽之後，我就去咗隔離一個小鎭Valbella，去坐馬車Bruno Hassler感受雪山美好風光。馬車會去小鎭附近一個湖遊走一個圈。第一次坐馬車感覺都好過癮，因為沿路都係雪山同小鎭景，而且馬夫沿路同啲街坊打下招呼，幾得意架。呢日天氣仲要特別好，藍天白雲仲可以睇曬雪山嘅山峰，正好補償番上次睇唔到少女峰山頂嘅遺憾。
▼坐馬車遊Bruno Hassler
▼再見Chur (庫爾)
坐兩個鐘就去到今次行程最後一個地方 – 瑞士第三大城市Basel。Basel係德語系地區，以兩間世界上大型製藥廠而出名。今次我去Basel最主要目的就係去行下全瑞士最大嘅Christmas Market。原來Basel聖誕市集唔只大，係舊年疫情下仲被票選為最歐洲最美麗嘅聖誕市集。
▼Basel (巴塞爾)
巴塞爾旅遊局安排咗導遊黎帶我行下舊城區。原來巴塞爾歷史悠久仲可以話係瑞士嘅文化之都。導遊帶我由大Basel 經巴塞爾教堂同中橋去到小Basel，呢個城市十三世紀因做黑胡椒買賣而致富，原本中橋有分木造同石造，小Basel如果有其他國家啲人入侵，就會燒咗中橋木造嘅一邊，以保護大Basel。今時今日嘅Basel已經係瑞士文化之都，有多個博物館可以參觀，例如我參觀咗玩具博物館同藝術博物館。而每年二月都有巴塞爾狂歡節 (Basler Fasnacht/Carnival of Basel)，同巴西及威尼斯稱為三大世界級嘉年華。
▼巴塞爾博物館
剛好天黑可以去感受瑞士聖誕市集。第一次行好興奮，所有野都覺得好新奇。聽導遊講每個聖誕市集都會有一個會轉嘅金字塔，上面嘅人物有耶穌或者胡桃鉗子等人物做主題。而導遊好快手買咗杯熱紅酒比我飲，話去每個聖誕節市集熱紅酒都係必飲。第一次飲熱紅酒，以為啲酒精經熱力蒸發曬冇咩酒味，點知飲落甜甜地但又好重香料味，先知道原來唔係煮熱咁簡單，唔同鋪頭落嘅香料都未必一樣。飲完再行下啲鋪頭，發現全部都係同聖誕佈置有關嘅，例如掛係聖誕樹上嘅波波，蠟燭，星星燈咁，第一次行聖誕市集嘅我真係行成晚都唔厭。
▼巴塞爾聖誕市集
▼巴塞爾聖誕市集
最後一日離開瑞士之前，我就去咗感受下如何10分鐘步行遊三國。因為Basel位置係法國同德國境界，三個國家就係萊茵河做分界，我由Basel最邊境地方Kleinhuningen行去德國只需要5分鐘，再由德國經一條三國橋就可以行到法國，真係一橋之隔就由德文變成法文，感覺真係好神奇，而且最神奇係我以前覺得國家與國家之間需要有入境職員檢查，估唔到由瑞士行入德國再入法國，係冇任何人員檢查。仲記得以前去過泰北金三角，進入另一個國家都需要檢查身份證，今次正好體驗歐盟地區可以自由出入境。
▼步行遊三國
▼Basel (巴塞爾)
▼巴塞爾最後一餐
特別嗚謝：瑞士國家旅遊局
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸
- #7 小編出走：世界最長的地下畫廊
- #8 小編出走：波羅的海三國 防疫措施大不同
- #9 小編出走：坐上郵輪 探訪高度自治區 奧蘭群島
- #10 小編出走：夢寐以求想去的國度 – 瑞士 (少女峰、日內瓦)