fbpx
Flyday.hk 低成本旅遊情報網
Home 小編去旅行 悠遊鹿兒島 屋久島種子島全面睇

悠遊鹿兒島 屋久島種子島全面睇

by Flyday.hk
0 comment

日本咁大,除咗東京同埋大阪呢啲超熱門嘅選擇之外,其實仲有好多地方好好玩架!今次小編就去咗九州南部嘅鹿兒島。鹿兒島擁有豐富嘅天然資源,好似櫻島活火山、原始森林等,同時亦係著名嘅溫泉之鄉,仲有好多好好玩嘅離島添!一於睇下小編喺鹿兒島玩咗啲咩喇!

圍繞住鹿兒島本島有近600個離島,今次小編就去咗比較出名嘅兩個島 – 充滿神秘色彩嘅屋久島同埋一直走係科技尖端嘅種子島。

屋久島

屋久島係一座神秘幽靜嘅島嶼,自然風光濃郁,島上90%面積被遠古嘅森林覆蓋,係日本第一個被指定為世界自然遺產的地方,同時亦係宮崎駿《幽靈公主》嘅取景地,連日本人自己都視屋久島為夢想旅行地。

屋久島有幾條健行路線,由入門至挑戰級都有,而屋久杉園可以話係島內最輕鬆易行嘅路線,園區內有唔同嘅健行步道,需時三十分鐘至三小時不等,今次小編就揀咗行大約一小時嘅步道路線,沿路風景真係靚到不得了,難怪被稱為夢幻之森。

小編仲去埋附近睇三千年巨杉 – 紀元杉

係去森林探險之前,記得要帶好所有裝備,無嘅話可以喺島上租借。

@屋久島觀光服務中心

健行完仲有體力踏單車,或可以自駕遊嘅朋友記得去埋西部林道。西部林道係全世界唯一一條世界自然遺產行車路,沿路可以見到唔少野生動物,小編就好幸運咁見到好多馬騮同埋鹿,同啲小動物玩捉迷藏!

野生動物出沒注意﹗

行完山亦都可以去玩獨木舟,屋久島町嘅湖水水質超級清晰,泛舟湖上都幾寫意。而且路線難度唔大,就算小編係第一次玩獨木舟都可以輕鬆完成。

種子島

告別屋久島,小編就搭船嚟咗種子島。

種子島喺日本史上以「鐵砲傳來之地」聞名,日本的嘅第一把槍亦係由呢度傳入,種子島開發綜合中心 (鐵炮館) 詳細記錄咗呢部分歷史,並收藏咗唔少古鐵器,好學嘅小編就梗係要嚟拜訪下喇!

而種子島最令小編驚奇嘅,就係佢竟然建有日本最大的火箭發射場 -「種子島宇宙中心」!

中心門口已有一座火箭模型

可以了解到衛星同埋火箭嘅組裝過程。

宇宙中心每天都有三節免費嘅的導賞團,有專人會帶大家參觀在倉庫內的H-II火箭實物、火箭發射塔、同埋發射控制中心,最重要係費用全免!

前面就係火箭發射基地喇,離遠望到都好興奮!種子島一年大約會發射十次火箭,日本宇宙航空機構 JAXA會於約二個月前公佈發射火箭日期,世界各地嘅天文愛好者就會湧入種子島。係小編嚟之前一日就咁岩發射咗一次火箭,可惜小編訂唔到住宿,所以無緣見到火箭發射嘅一刻,嗚嗚嗚。

除咗科技以外,種子島盛產蕃薯,更係著名嘅安納芋原產地,當地人會用蕃薯嚟釀造燒酒,小編今次就去參觀高崎酒造廠!

蕃薯最當造嘅時間係十至十一月,每年呢兩個月份,工人們都會趕工,留低蕃薯最好嘅部份,連同其他原料加入酒麴菌同埋酵母進行發酵,經過各種工序,最後再用單式蒸餾機蒸餾出正宗嘅薩摩燒酒。

小編試飲過的確幾香醇易入口。

係種子島周圍行嘅時候,仲俾小編發現到一個秘境 – 千座之岩岸!千座之岩岸係一座被波浪長年拍打而成嘅海蝕洞窟,景觀因應潮汐嘅不同而變化。

個景真係靚到不得了!記得要睇岩潮退時間先去啊!

鹿兒島本島

去完兩個離島,梗係要返鹿兒島市休整下喇!鹿兒島市內並唔大,無地下鐵路系統,出入可以搭電車同埋巴士。如果想好好睇下鹿兒島市嘅話,可以好似小編咁搭觀光電車!觀光電車全程七十五分鐘,途經好多熱門景點,如水族館,照國神社,西鄉隆盛像等﹗持市電、市巴士一日乘車劵唔洗額外加錢搭架!

觀光電車以復古造型打造

車廂內部 都幾舒服~

小編今次係鹿兒島市嘅時間唔算太多,第一站就去咗仙巖園。

仙巖園前身喺歷代薩摩藩主嘅別墅,佔地五公頃,庭園設計巧妙地納入山石,樹木,竹林等自然物,因應四季景色各有不同變化!呢度仲係欣賞櫻島火山嘅好地方,小編親眼見證到火山冒煙嘅情況!

藩主居住嘅「御殿」

南九州名產「兩棒餅」,有味增與醬油兩種口味,口感非常彈牙。

去遠少少,位於霧島嘅藝術之森美術館亦令小編大開眼界。呢個係一座開放式嘅藝術博物館,二十三件藝術裝置散落喺森林之中,俾每一位嚟到嘅朋友親自去探索,同作品接觸互動,領悟作品背後嘅意義。

藝術大師草間彌生嘅作品亦喺其中。

「男與女」- 一男一女的輪廓交錯融合,睇落就似風車嘅中心。

森林守護者 – 共有五個守護者隱身於森林中

搵下我喺邊~

小編真係好欣賞呢個博物館,好感受到藝術同埋自然嘅連結,鍾意藝術嘅朋友唔好錯過啊!

行完景點,嚟到鹿兒島就梗係要試下黑毛豬肉喇!小編去咗當地一間幾出名嘅燒肉店「ふぁみり庵 はいから亭与次郎本店」,佢地個燒肉拼盤份量真係大到好誇張,仲細心地用木牌介紹返肉嘅唔同部分。

鹿兒島黑毛豬肉質細嫩,油脂分布均勻,燒起上嚟真係好好食!牛肉亦都好鮮甜,真係食到小編停唔到口啊!

另一餐小編都試咗豬肉蒸鍋,食法係將黑毛豬肉同埋蔬菜一齊蒸,蒸熟後用菜包好豬肉,再放入上湯加醬食用,都幾特別。

食完黑毛豬肉都唔夠嘅話,可以去屋台村食宵夜!屋台村集合咗起過20間地道風味小店,每間店鋪都各有特色,連鹿兒島人放工後都會結伴嚟食,超級有氣氛!

燒酒係鹿兒島嘅三大名物之一,今次小編仲咁岩撞正一年一度嘅燒酒節!展場集合咗縣內113家釀酒廠嘅燒酒,可以試到唔少特色燒酒,好似薩摩燒酒、黑糖燒酒等!

門票500Yen,可以憑卷試五款燒酒

玩咗咁多活動,返到酒店當然要放鬆休息下!鹿兒島係溫泉之鄉,小編今次入住咗兩間酒店,兩間都有得歎溫泉!

@鹿兒島陽光皇家酒店

溫泉@鹿兒島陽光皇家酒店 (相片取自官網)

套房@格蘭塞雷佐酒店鹿兒島

可以對住靚景食早餐 @ 格蘭塞雷佐酒店鹿兒島

What a perfect vacation!

睇完小編咁正的行程,係咪想即刻動身飛去鹿兒島度假呢?咁就要留意下HK Express嘅優惠喇!買完平機票亦可選擇購買埋U-Biz服務,除咗可以享用環亞機場貴賓室同優先辦理登機手續外,仲包埋30KG寄艙行李同揀選舒適空間座位架!

 

HK Express 鹿兒島航線資料

去程:UO546 香港 – 鹿兒島 08:25 – 12:20 (一)、07:55 – 12:05 (二/五)、07:55 –11:50 (三/六)、07:55 – 12:00 (日)

回程:UO547 鹿兒島 – 香港 13:10 – 15:55 (一/三/六)、13:25 – 16:10 (二)、13:20 – 15:55 (五)、13:35 – 16:10 (日)

單程票價約 $798(未稅)

訂購網址:https://www.hkexpress.com/

 

相關優惠

發佈留言

This site uses Akismet to reduce spam. Learn how your comment data is processed.