離開北歐四國之後，下一個旅行目的地就係波羅的海三小國，即係愛沙尼亞、拉脫維亞同立陶宛。之前遊歷接近二十日北歐，係接近冇人戴口罩嘅情況下，早已經忘記COVID嘅存在。但回到波羅的海，落咗飛機前往酒店，見到車廂內有人戴口罩，又彷彿將你從美好國度扯回到現實。
原本波羅的海三國文化相似，景點唔多都冇咩值得講，但疫情之下，三國嘅疫情都有唔同，所以佢地嘅防疫措施都唔一樣，如果呢個時間遊覽三國就要多加留意啦。
首先講下疫情最輕同防疫措施最鬆嘅國家-愛沙尼亞講起。呢幾日我搵到一位沙發主人Yana，佢係純正愛沙尼亞人，之前做過導遊，又去過韓國半年，所以佢屋企牆上放咗幾張韓國景色嘅Postcard。Yana依家除咗有番工之外，仲有係大學教緊韓文。因為佢對我實在太好，比我鎖匙隨時番佢屋企，所以我決定煮一餐中餐比佢食。其他時間主要留係古城區。
▼愛沙尼亞
▼愛沙尼亞沙發主人Yana
至於愛沙尼亞只要室內戴口罩，而且去到餐廳，只要出示針卡就可以，博物館、景點同手信店一切如常營業，係三國入面對遊客影響最少。
▼去到愛沙尼亞餐廳，要出示針卡
▼愛沙尼亞
其次防疫措施都算鬆嘅仲有立陶宛，我係立陶宛住係一間距離火車站同晚巴士站只有步行三分鐘嘅Hostel，原因係立陶宛兩個出名嘅景色，十字架山同特拉凱城堡都需要坐火車或巴士前往。前後我係立陶宛留咗三日，感覺立陶宛都好歡迎遊客黎玩，餐廳同旅遊景點全部都有開，只係立陶宛比愛沙尼亞稍為再嚴一啲。除咗室內同乘坐交通工具要戴口罩之外，部分場所如便利店、郵局，同一時間唔可以超過2，3個客人係室內，過咗就要係外面排隊。
▼立陶宛特拉凱城堡
▼立陶宛特拉凱城堡
▼立陶宛
▼立陶宛
前往十字架山同特拉凱城堡途中分別都識到新朋友。由首都維爾鈕斯坐兩個半鐘火車就到Siaulai，呢段火車上我同一個立陶宛男仔同車廂，然後佢主動搭訕。雖然我唔會主動撩人講野，但又係來者不拒，Lukas主動聊我講野，知道雖然佢係立陶宛長大，但之後去咗美國唔同城市工作，因為疫情先番歐洲。至於去城堡個程巴士都遇上三位德國學生，我地同一間青旅但有冇點交流，直到去城堡發現同車先開始傾計，有時候緣份就係咁。
▼立陶宛十字架山
▼立陶宛十字架山
最後，疫情最緊張同防疫措施最嚴肅嘅就係拉脫維亞。拉脫維亞係歐洲近期最新收緊防疫措施嘅國家。雖然拉脫維亞有足夠嘅疫苗比市民打針，但當地接種率奇低，只有兩三成，加上歐洲開始轉季，無論流感定COVID個案都上升，醫院不勝負荷，所以當地政府決定，由10月20開始到11月15日，全國所有娛樂場所需要關閉，只有生活必需品店可以開門做生意，餐廳只可以做外賣，堂食一律禁止，而且所有鋪頭只可以開到到晚上7點，晚上8點到凌晨5點更加係宵禁，比警察捉到冇合理解釋，要罰錢架。
▼拉脫維亞
聽完係咪覺得呢個時間去拉脫維亞冇意思呢？不過我由愛沙尼亞一路南下，唔想兜路就只能夠經過拉脫維亞，所以最後都決定留兩日。同樣入拉脫維亞之前都要上網填入境表，當中因為我冇歐盟針卡要額外做COVID test。係愛沙尼亞診所做要39歐，雖然貴但即時出到證明，但最後坐巴士入拉脫維亞，全程冇人check過。
▼拉脫維亞
原本拉脫維亞都搵到沙發主人接待，但自出咗封城令，都禁止外國人探訪或住朋友屋企，所以最後都係搵咗一間古城嘅Hostel住兩晚。呢兩日九成嘅店舖都關門，但我都可以去便利店同超市買到明信片，都可以去郵票買郵票寄。唯一開門又最值得參觀就係里加中央市場，個人覺得行過當地市場先有種居住過嘅感覺。即使宵禁令原本冇乜野睇嘅里加變得更加沉悶，但係Hostel又聚集咗一班唔識死嘅遊客，正好COVID 宵禁將我地關係拉近，坐係Common Room傾計，呢個都係青旅嘅本意，旅行除咗要觀光睇景點，更重要就係同人交流文化呢。
▼拉脫維亞中央市場
雖然波羅的海三國有唔同程度嘅COVID對應措施，不過都無點阻到行程，十日波羅的海之旅好快又黎到尾升，下站將會到波蘭探一個好耐冇見嘅墨西哥朋友同埋佢個波蘭老婆，用旅行吊靴鬼嘅形式，跟住朋友黎個地道波蘭遊。
——————————————
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸
- #7 小編出走：世界最長的地下畫廊