郵輪唔係第一次坐，不但喺波羅的海坐郵輪卻係第一次，直到番愛沙尼亞終於可以一上郵輪了。
由於發現愛沙尼亞有郵輪去到奧蘭群島，於是就二話不說買咗，踏上三日兩夜奧蘭群島之旅。講起北歐，好多人都知道北歐五國，分別係芬蘭、挪威、瑞典、丹麥同冰島。除咗北歐五國，仲有三個特別地區，就係格陵蘭島、法羅群島同奧蘭群島。頭兩個係丹麥屬地，至於奧蘭群島 (Aland) 係芬蘭享有高度自治。
▼奧蘭群島一角
坐上Tanlink Silja所營運嘅Baltic Queen，由愛沙尼亞塔林港碼頭出發，第二日凌晨5點就會到首府瑪麗港。第一次係北歐坐郵輪，發現原來同香港或者亞洲坐郵輪有好大分別。唔需要早三個鐘黎Check-in，好似我係啟航前半個鐘先到碼頭，到櫃檯出飛就可以上船。
▼Baltic Queen
成隻船一共有10層，設施包括超市、酒吧、餐廳、表演廳都係6，7樓。行完曬成個Cruise Tour發現同香港玩郵輪唔同嘅，係呢到所有飲食係自費，唔同香港咁有包三餐，而且有好多一家大小。好多瑞典人趁假期就會坐郵輪去比較平嘅海羅的海三國消費，然後再坐船番瑞典，順便趁船上酒煙免稅，Shopping完先番屋企。
▼酒吧
▼房間
成晚最精彩緊係表演活動，一晚兩場Estonia Extravaganza，兩位領唱連同六位舞蹈員載歌載舞將氣氛推到最高，嫌未夠喉仲有live band表演，郵輪客可以繼續上舞池跳舞，而我就要準備做好落船準，因為船一泊岸等乘客上落完船就會立即開出。
▼表演活動
其實奧蘭群島冇咩景點可言，一般黎講奧蘭嘅旅遊旺季係夏季六至八月，天氣比較晴朗，好適合玩水上活動或者坐遊艇跳島遊覽，因為奧蘭群島有成6500個島其中只有60個有人居住。至於冬天嘅奧蘭就冇咩可以做，可以參觀下瑪麗港主島嘅歴史博物館同海事博物館。
▼歴史博物館
▼海事博物館
咁點解冇野做都咁想去呢個群島？其實因為奧蘭象徵嘅意義。其實奧蘭群島同香港有啲似，仲記得細個小學讀常識話根據基本法，香港享有高度自治，港人治港。原來奧蘭群島先後被瑞典、俄羅斯、芬蘭佔領，最後係1922年，國際聯盟(歐盟前身)決議下成為芬蘭的嘅一個自治區。原本奧蘭人都好想回歸瑞典，但時間過去，就係咁到奧蘭人由唔滿意到已經習慣自治嘅概念，島上有自己嘅區旗，郵票，報章，立法等。奧蘭到依家已經過咗99年，下年2022年就係奧蘭自治區成立100週年，黎緊呢年島上會有好多慶祝活動。
只可惜揀錯時間上奧蘭島玩，冬季十月嘅星期日，除咗博物館、超級市場同部分餐廳，其他商店幾乎全部關門。以為冇辦法感受島上人慶祝自治嘅個種興奮同開心，卻係酒店遇上好好傾嘅土生土長職員Kazim。Kazim係幫我辦入住手續嘅時候，我忍唔住問佢對奧蘭自治嘅睇法，閒聊之間都感覺到Kazim都好滿意現時自治嘅環境，因為政治上奧蘭有呢個特別身份，可以吸引更多遊客黎玩。
▼奧蘭群島一角
不過Kazim講咗一句說話，令我作為香港人係好值得反思。佢慨嘆雖然奧蘭群島的確享有高度自治，但離開奧蘭其實又冇咩人知道呢個地方，所以佢要再加以解釋，係奧蘭前面加上”芬蘭”。呢個時候我係有種感同身受，其實香港都一樣，而且國際上香港比奧蘭群島更為人所認知，有時候一句”I come from Hong Kong”已經唔需要解釋，但相反”I come from Aland ”又會有幾多人知道？可能你都會係其中一個聽到Aland，會聽成Holland嘅一人。
▼I come from Aland
生長於特別行政區，香港有好多獨有文化，我地要好好保護同保育。香港對我黎講係身份嘅認同，今日起我會更加自豪地講句，“I come from Hong Kong”，希望將來都係。
——————————————
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇
- #3 小編出走：秋日森林採菇+正宗芬蘭桑拿
- #4 小編出走：那赫爾辛基被遺忘的秋天 (六大秋葉打卡景點)
- #5 小編出走：瑞典真紅葉 – 皇家理工學院＋斯德哥爾摩市政廳
- #6 小編出走：北歐魚湯與肉丸
- #7 小編出走：世界最長的地下畫廊
- #8 小編出走：波羅的海三國 防疫措施大不同