講起去日本旅行，沖繩係唔少香港人去日本玩嘅熱門目的地之一。沖繩位於日本的最南端，古稱琉球，擁有眾多美麗島嶼、珊瑚礁及沙灘，係渡假、潛水勝地，仲被稱為日本夏威夷！小編為大家整理沖繩懶人包，由交通方法到景點、酒店，出發沖繩之前一定要睇晒呢篇攻略！記住睇埋日本開關懶人包、VISIT JAPAN WEB 申報教學！
無論你有無去過沖繩，呢條片都一定幫到plan 緊去沖繩嘅你！由洗唔洗自駕 、洗唔洗搬酒店、到有咩必食必玩景點都一條片答你！今次由 @沖繩 Oki-Family 為大家解答20分鐘超詳盡沖繩攻略Q&A！
▼🇯🇵2022沖繩最強Q&A超詳盡攻略🌊｜沖繩最佳季節🗓、自駕不自駕玩法🚗、最佳酒店位置🏨、必去景點📍、Shopping必行🛍、必食美食手信、冬天玩法etc
除咗日本嘅食物同Shopping Mall，小編最掛住就係日本沖繩嘅海！ 所以今次就請左 @OkiFamily 同大家去晒沖繩南北兩邊嘅3間酒店！其中一間唔只有絕美海景，仲有勁多游泳池添。當然仲有一啲去沖繩必去同必做嘅活動同美食，嚟緊飛沖繩嘅朋友就記住睇啦！
▼🇯🇵沖繩全新2間絕美海景酒店＋必去景點🌊｜2022最新沖繩旅行攻略｜沖繩美麗海水族館、萬座海濱洲際度假酒店、Blue Steak Wonder Hotel、Ryukyu Hotel&Resort
沖繩交通
▼沖繩地圖
租車自駕
沖繩係一個由南至北好長嘅島，總面積超過2000平方公里。因為面積頗大，想有效率地遊沖繩嘅話唔少人都選擇自駕。但係提提大家，因為疫情後提供租車嘅數量少咗，如果大家選擇自駕遊，記得預先預約租車會比較穩陣。租車服務有唔同車型，大家可以按照自己需要及人數選擇。
包車接送
唔識揸車或者去旅行唔想揸車咁攰？包車接送係你嘅好選擇！包車接送提供客製化服務，你想去邊度只要同司機講就得，相當彈性。包車服務按小時或日數收費，大家可按照自己需要選擇。
機場接駁巴士
機場接駁巴士亦係喺沖繩穿梭嘅好選擇。機場接駁巴士一共有17個站，分為由那霸機場往恩納村、沖繩美麗海水族館方向、沖繩美麗海水族館往恩納村、那霸機場方向。大家可以喺官方網站查看巴士時刻表、車費。如果想乘搭機場接駁巴士，可以預先喺官網購票，或即場以現金支付，想確保一定有位嘅話，喺官網預先買定飛會比較穩陣。
▼沖繩機場接駁巴士路線圖
公共巴士
沖繩亦都有公共巴士，包括僅於那霸市內行駛嘅「市內線」、連結那霸及各個區域嘅「市外線」，總共超過100種巴士路線。大家可以喺バスなび沖縄查詢巴士發車時間、路線、車資、轉乘方式等資料。
巴士路線號碼到19號為止係室內線，除咗部分巴士之外，其他都係成人240日圓、兒童 (6至11歲) 120日圓嘅統一票價。乘搭市內線巴士時，如果前後都有門，須從前方車門上車並先支付車資。落車前先按下車鈴，巴士就會喺下一站停靠，並可於後方車門落車。
路線號碼20號以上係市外線，票價會根據乘搭嘅距離有所不同。因為只有前方一個車門，要先等落車個人落完先上車。落車前先按下車鈴，電子看板上顯示嘅金額就係車資。
▼沖繩巴士
本地遊旅行團
除咗以上交通方法之外，唔少旅行平台都有推出沖繩嘅本地遊旅行團，由半日、一日，到多日嘅都有，無論日數定景點行程嘅選擇都非常豐富。唔止唔使煩交通方法，隨團仲會有導遊帶領講解！
沖繩景點
沖繩嘅景點實在太多，小編按照地理位置分佈，為大家整理咗其中一啲沖繩必去嘅景點！
那霸市——國際通
國際通係沖繩那霸非常知名嘅景點。原名「新縣道」，喺1944年沖繩島戰役之後，改名為國際通，之後隨著唔少百貨、商場建立，逐漸成為沖繩最繁華地段，係遊客必去嘅購物勝地，唔少人都鍾意去RYUBO琉貿百貨Shopping！小編之前去沖繩旅行時亦有到訪國際通，大家可以睇下小編嘅沖繩遊記，望下牧志公設臨時市場 、壺屋通、泊港漁市場有咩玩！
▼國際通
國際通
那霸市——首里城公園
首里城係琉球時期嘅政治、經濟中心，其後與附近如玉陵等景點合稱為首里城公園。首里城融合中國及日本築城文化嘅獨特建築樣式及石砌技巧，具有高度的文化與歷史價值，於2000年更以『琉球王國城跡及相關遺產群』之名，被列為日本第11座世界遺產。不過因為2019年嘅一場火災，令首里城內包括正殿在內嘅9棟建築物半毀或全毀，正殿嘅復原工程預計喺2026年完成。喺呢度期間大家仍然可以到訪首里城公園，自事故後園方陸續擴大公園開放區域，宜家嘅開園面積已達事故前嘅8成左右。雖然正殿仍在修復當中，但係大家仍然可以參觀其他建築物，或者一睹正在修復中嘅首里城嘅風貌，詳情可以參考官方網站消息。
▼首里城
▼首里城開放區域
首里城公園
- 地址：沖繩縣那霸市首里金城町1-2 (地圖)
- 電話：+81 098-886-2020
- 開放時間：免費區域早上8點30 – 晚上6點；收費區域早上9點 – 中午5點半 (最後入場時間中午5點)
- 首里城公園官方網站
本島南部——沖繩世界文化王國
沖繩世界文化王國分為王國村、鐘乳石玉泉洞、毒蛇博物館三個區域，可以購買包含三個園區嘅門票，亦可單買某個區域。三個園區當中最出名嘅就係鐘乳石玉泉洞，玉泉洞全長約5公里，係日本第二大鐘乳石洞，被稱經歷30萬年歲月所形成嘅自然雕刻博物館，為非常壯觀。
而王國村可以欣賞傳統琉球舞蹈表演 (EISA太鼓舞)，仲有唔少沖繩文化體驗，例如藍染手提袋、編織杯墊等。至於毒蛇博物館裡面就有唔少沖繩特有嘅毒蛇展示，仲可以欣賞精彩嘅毒蛇表演，最後更會俾客人與無毒性嘅大蟒蛇影相留念。
▼沖繩世界文化王國
▼鐘乳石玉泉洞
沖繩世界文化王國
- 地址：沖縄県南城市玉城前川1336 (地圖)
- 電話：+81 098-949-7421
- 開放時間：早上9點 – 中午5點半 (最後入場時間中午4點)
- 沖繩世界文化王國官方網站
本島中部——萬座毛
萬座毛係位於恩納村內，係沖繩熱門嘅打卡景點。萬座毛因受海浪長年侵蝕，石灰岩嘅海岸形成遠看猶如象鼻般嘅獨特造型。萬座毛高20米嘅懸崖峭壁上係一片寬闊地帶，可以喺度眺望蔚藍嘅大海，一望無際！唔少人都鍾意係呢度欣賞夕陽景色。萬座毛海灘海水清澈，仲係浮潛、海濱垂釣嘅好地方。
▼萬座毛
萬座毛
本島中部——美國村
沖繩曾被美國統治，因此有唔少地方至今仍然感受到美國風情，當中最有代表性嘅一定係美國村。美國村係一個大型購物娛樂區，唔止有幾間大型商場、藥妝店，如AEON、SAN-A Hamby Tow，仲有一啲歐美風情嘅特色小店，大家可以喺官方網站查看有咩店鋪。
▼美國村AEON
美國村
相關優惠：立山黑部2023攻略｜4月15日開山！一文睇晒東京、大阪、名古屋出發交通｜必去景點雪之大谷、黑部水壩、御庫裏池、稱名瀑布懶人包
本島中部——殘波岬
殘波岬係沖繩本島最西端海岬，仲係沖繩嘅三大岬之一，以高30米、綿延2公里嘅斷崖絕壁聞名。呢度未經人工整理嘅天然海岸線，係釣客嘅釣魚天堂。天氣好嘅時候，仲可以喺殘波岬眺望慶良間群島。另外，約31米高嘅白色燈塔亦係殘波岬代表性嘅地標。燈塔開放入內參觀，如果對自己嘅體力有信心嘅話，不妨挑戰行到燈塔最頂端！
▼殘波岬
殘波岬
本島北部——美麗海水族館
話美麗海水族館係沖繩必去嘅景點一定當之無愧！沖繩美麗海水族館位於海洋博公園內，係全亞洲最大、全世界排名第二！館內有將近 30,000種海洋生物，其中名為「黑潮之海」嘅大型水族箱裡面展示長達 8.8 米長嘅鯨鯊，遊客可以近距離觀賞海洋生物。
▼美麗海水族館
美麗海水族館
- 地址：沖縄県国頭郡本部町石川424 (地圖)
- 電話：+81 098-926-4455
- 開放時間：早上8點半 – 晚上6點半 (最後入場中午5點半)
- 美麗海水族館官方網站
沖繩酒店推介
ANA萬座海濱洲際酒店 (ANA InterContinental Manza Beach Resort)
ANA萬座海濱洲際酒店位於萬座毛恩納村內，坐擁無敵大海景。酒店外觀就好似一艘巨大嘅郵輪咁，座落於沖繩美麗嘅海面上。酒店係一個度假村嘅概念，裡面有游泳池、私人海灘、高爾夫球場、SPA等等設施，酒店更加可以安排出海釣魚，一定玩到唔捨得走！
▼酒店外觀
▼酒店房間
▼酒店泳池
沖繩蒙特利水療度假酒店 (Hotel Monterey Okinawa Spa & Resort)
沖繩蒙特利水療度假酒店位於恩納，面向沖繩著名嘅老虎海灘「Tiger Beach」，酒店一大賣點係全部客房均為海景房，喺房入面望住個海已經夠晒寫意。另外，呢度除咗有無邊際泳池，仲有沖繩為數不多嘅人造波浪泳池，啱晒一家大細黎玩！
▼酒店外觀
▼酒店房間
▼無邊際泳池
名城海灘琉球酒店&度假村 (Ryukyu Hotel & Resort Nashiro Beach)
名城海灘琉球酒店&度假村喺2022年夏天先開幕，夠晒新！呢度係全沖繩擁有最大泳池嘅酒店，淨係泳池都有六個，每個都各有特色，包括可以坐喺水泡上面漂流嘅流水泳池、無邊際泳池，鍾意玩水嘅話一定唔好錯過！
▼酒店外觀
▼酒店房間
▼流水泳池
沖繩逸之彩溫泉度假酒店 (OKINAWA HINODE RESORT ＆ HOT SPRING HOTEL)
沖繩逸之彩溫泉度假酒店位於那霸市，距離國際通只需步行5分鐘，如果想去行街shopping嘅話非常方便。酒店設有室外溫泉，可以著住泳衣浸唔怕尷尬。另外，晚上8點半至9點半係拉麵宵夜時段，拉麵口味每日轉換，每日早上10點至晚上10點仲提供飲品放題，夜晚玩完返黎可以飲返杯嘢先上房！小編之前去沖繩旅行時就入住咗呢間酒店，大家可以睇下超詳細酒店review！
▼酒店外觀
▼酒店房間
▼室外溫泉
相關優惠：【全新日本酒店】東京新酒店推介！反斗奇兵新主題酒店！澀谷型格新酒店！
沖繩殘波岬皇家飯店 (Royal Hotel OKINAWA ZANPAMISAKI)
沖繩殘波岬皇家飯店鄰近殘波岬海灘、殘波岬燈塔，如果打算喺殘波岬暢玩，或者鍾意享受陽光與海灘嘅話，呢間酒店就再適合不過。除此之外，呢間酒店仲提供沖繩比較少有嘅戶外浴場體驗，除咗露天岩石浴池場，仲有室內浴池、桑拿。
▼酒店外觀
▼酒店房間
▼戶外浴場
相關優惠：【全新日本酒店】大阪新酒店推介！2023年3月開幕超近關西機場、臨空城Outlet！日本首間W酒店！環球影城全新官方酒店！名設計師型格新酒店！
沖繩常見問題Q&A
Q：咩季節去沖繩最好？
A：每年嘅5月、7月、10月、11月係最適合去沖繩嘅時候。7月颱風唔算多，而且全年黎計係最乾嘅一個月份，所以好有陽光與海灘嘅感覺。而5月、10月、11月嘅天氣仍然可以落水，最重要係酒店價錢唔算太貴。
Q：沖繩天氣係點？
A：大家去沖繩記得要帶外套，因為即使係夏天，無咗太陽之後天氣會突然變涼好多，而秋冬亦會更加凍。另外，沖繩一大特色就係會突然落暴雨，除咗攜帶雨具之外，大家亦要留意天氣報告。小編為大家推介兩個日本人常用嘅天氣APP，分別係「WNI」、「Yahoo!天気」，佢哋可以喺落雨前10分鐘通知你。
Q：去沖繩玩需唔需要搬酒店？
A：沖繩係一個由南到北好長，例如由國際通去美麗海水族館都要差唔多2小時車程。如果只係住一間酒店，去唔同景點所需嘅交通時間一來一回已經無咗大半日。所以小編建議大家最好搬一次酒店，可以一間較近國際通，另一間較近本島北部。
覺得以上景點未夠喉？不如試下喺沖繩釣魚！去得沖繩食海鮮就緊係要食最新鮮嘅！有咩新鮮得過自己釣完即刻搵居酒屋煮～？今次就有 @OkiFamily 帶大家體驗出海包船行程，仲有識中文嘅船家，分全日或半日行程，無論新手定老手都適合！
▼沖繩自己晚餐自己釣！🎣另類包船出海釣魚行程(中文溝通OK!) 🐟XX円一人代客烹調居酒屋